ઇન્ડિયા એસોસિએશન ઓફ નોર્થ ટેક્સાસ (IANT) દ્વારા 31 જાન્યુઆરી 2026ના રોજ SLPS કોમ્યુનિટી સેન્ટરમાં ભારતના 77મા પ્રજાસત્તાક દિવસ અને 49મા ઇન્ડિયા ડેની ઉજવણી ભવ્ય અને ઉત્સાહભેર કરવામાં આવી. સમગ્ર કાર્યક્રમમાં દેશભક્તિ, સાંસ્કૃતિક વૈવિધ્ય અને સમુદાય એકતાનો અદભૂત સંગમ જોવા મળ્યો.
બપોરે લગભગ ૪ વાગે પરેડ પછી રાષ્ટ્રધ્વજ ફરકાવવાની વિધિ કરવામાં આવી, જેમાં સૌએ એકસાથે રાષ્ટ્રગીત ગાઈને ભારત માતાને શ્રદ્ધાંજલિ અર્પી. ત્યારબાદ બાળકો અને યુવાનો દ્વારા રજૂ કરાયેલા દેશભક્તિ ગીતો, નૃત્ય પ્રસ્તુતિઓ અને સાંસ્કૃતિક કાર્યક્રમોએ સમગ્ર માહોલને દેશપ્રેમથી ભરપૂર બનાવી દીધો.
વિશેષ આકર્ષણ તરીકે વિવિધ રાજ્યોથી પ્રેરિત નૃત્ય, દેશભક્તિ સ્કિટ, જૂથ નૃત્ય અને સંગીત પ્રસ્તુતિઓ રજૂ કરવામાં આવી, જેને દર્શકો તરફથી જબરદસ્ત પ્રતિસાદ મળ્યો. નાના બાળકોની માસૂમ અને ઊર્જાવાન પ્રસ્તુતિઓએ સૌના દિલ જીતી લીધા.
IANTના પ્રમુખ મહેન્દ્રરાવ અને તેમની ટીમે તમામ મહેમાનો, સ્વયંસેવકો, કોરિયોગ્રાફરો, પ્રાયોજકો અને ભાગ લેનાર તમામ કલાકારોનો દિલથી આભાર માન્યો. તેમણે જણાવ્યું કે, “આ કાર્યક્રમ માત્ર ઉજવણી નથી, પરંતુ ભારતીય સંસ્કૃતિ, એકતા અને ગૌરવને આગળ વધારવાનો પ્રયાસ છે.”
આ પ્રસંગે અનેક સમુદાયના આગેવાનો, સામાજિક કાર્યકરો, શિક્ષણવિદો અને ભારતીય સમુદાયના સભ્યો મોટી સંખ્યામાં ઉપસ્થિત રહ્યા. સમગ્ર કાર્યક્રમ સુવ્યવસ્થિત રીતે અને શિસ્તબદ્ધ આયોજન સાથે સફળતાપૂર્વક સંપન્ન થયો.
ઇન્ડિયા એસોસિએશન ઓફ નોર્થ ટેક્સાસ, જે 1962થી સતત સમુદાય સેવા આપી રહી છે, તેવા કાર્યક્રમો દ્વારા ટેક્સાસમાં ભારતીય સંસ્કૃતિ, પરંપરા અને વારસાને જીવંત રાખવામાં મહત્વપૂર્ણ ભૂમિકા ભજવી રહી છે.
આ ભવ્ય ઉજવણીએ ભારતીય સમુદાયમાં નવી ઉર્જા, ગૌરવ અને એકતાની ભાવના પ્રેરિત કરી.
About The Author
