ટ્રમ્પે 20 મિનિટના ભાષણમાં ઈરાન અને હોર્મુઝ મુદ્દે દુનિયાને શું કહ્યું….

અમેરિકા (USA), ઈઝરાયલ (Israel) અને ઈરાન (Iran) વચ્ચે ચાલી રહેલું યુદ્ધ હવે એક નિર્ણાયક વળાંક પર આવી ગયું છે. અમેરિકન પ્રમુખ ડોનાલ્ડ ટ્રમ્પે (Donald Trump) તાજેતરમાં 20 મિનિટનું ઐતિહાસિક સંબોધન આપતા અનેક મોટા દાવા કર્યા છે. ટ્રમ્પે સૈન્ય વિજયનો (Military Victory) હુંકાર ભરતા જણાવ્યું કે છેલ્લા ચાર અઠવાડિયામાં અમેરિકન સેનાએ અત્યંત ઝડપી અને નિર્ણાયક જીત મેળવી છે.

તેમણે દાવો કર્યો કે ઈરાનની નૌકાદળ (Navy) અને વાયુસેના (Air Force) હવે લગભગ ખતમ થઈ ચૂકી છે અને ઈસ્લામિક રિવોલ્યુશનરી ગાર્ડ કોર્પ્સ (IRGC) નું કમાન્ડ નેટવર્ક તોડી પાડવામાં આવ્યું છે. ટ્રમ્પના મતે, ઈરાનની મિસાઇલ અને ડ્રોન ક્ષમતાને એટલી હદે નુકસાન પહોંચાડવામાં આવ્યું છે કે યુદ્ધના ઇતિહાસમાં આટલા ઓછા સમયમાં કોઈ દુશ્મને આટલી મોટી પાયમાલી વેઠી નથી.

જીતના દાવા વચ્ચે જંગ ચાલુ રહેવાના સંકેત એક તરફ જીતનો દાવો છે, તો બીજી તરફ આ જંગ હજુ અટકવાના કોઈ સંકેત નથી. પ્રમુખે સ્પષ્ટ કર્યું છે કે આગામી 2 થી 3 અઠવાડિયામાં ઈરાનને વધુ કડક જવાબ આપવામાં આવશે. તેમણે ઈરાનના ઓઇલ ઇન્ફ્રાસ્ટ્રક્ચર (Oil Infrastructure) પર હુમલાની સીધી ચેતવણી પણ આપી છે. ટ્રમ્પે વ્યૂહાત્મક રીતે મહત્ત્વપૂર્ણ એવા હોર્મુઝ સ્ટ્રેટ (Strait of Hormuz) અંગે મોટું નિવેદન આપતા કહ્યું કે અમેરિકાને હવે તેની જરૂર નથી. જે દેશો આ જંગમાં સાથ નથી આપી રહ્યા તેમને તેમણે ‘ગદ્દાર’ ગણાવ્યા છે.

ટ્રમ્પના દાવા મુજબ, ઈરાન હાલ ભારે દબાણમાં છે અને તેણે યુદ્ધવિરામ (Ceasefire) માટે વિનંતી કરી છે. અમેરિકન પ્રમુખે મક્કમતાથી જણાવ્યું કે તેમનું મુખ્ય લક્ષ્ય ઈરાનને પરમાણુ હથિયારોથી (Nuclear Weapons) દૂર રાખવાનું છે. આમ, વિજયનો ઉત્સાહ અને ભવિષ્યના જોખમો વચ્ચે ટ્રમ્પના નિવેદનોએ વિશ્વભરમાં ‘શાંતિ કે સંઘર્ષ’ના પ્રશ્નને વધુ ગૂંચવી દીધો છે.