અમેરિકાના ટેક્સાસમાં (Texas) એક ભારતીય રેસ્ટોરન્ટના (Indian Restaurant) માલિકે સોશિયલ મીડિયા (Social Media) પર એક વિવાદાસ્પદ વીડિયો પોસ્ટ કરીને ઓનલાઇન ચર્ચા જગાવી છે. ઇન્સ્ટાગ્રામ પર વાયરલ (Viral) થયેલા આ વીડિયોની શરૂઆતમાં તેમણે એવું વિધાન કર્યું હતું કે, “હું મારી ભારતીય રેસ્ટોરન્ટમાં ભારતીયોને નોકરી પર રાખતી નથી.”
ટેક્સાસના ન્યૂ બ્રાનફેલ્સમાં (New Braunfels) આવેલી ‘7 મંક્સ કાફે’ (7 Monk’s Cafe) રેસ્ટોરન્ટની કો-ઓનર (Co-owner) રશ્મી ભટ દ્વારા આ વીડિયો પોસ્ટ કરવામાં આવ્યો હતો. આ વિવાદાસ્પદ નિવેદન પછી સોશિયલ મીડિયા પર હજારો પ્રતિક્રિયાઓ આવી છે અને યુઝર્સ આ બાબતને હાયરિંગ પ્રક્રિયા, કલ્ચરલ ઓથેન્ટિસિટી (Cultural Authenticity) અને વિવિધતાના મુદ્દાઓ સાથે જોડીને અલગ-અલગ મંતવ્યો આપી રહ્યા છે.
View this post on Instagram
રશ્મી ભટના જણાવ્યા અનુસાર, તેમની હાયરિંગ ફિલોસોફી (Hiring Philosophy) કોઈપણ વ્યક્તિની જાતિ કે કલ્ચરલ બેકગ્રાઉન્ડ કરતાં તેના સારા વલણ, કામ કરવાની પદ્ધતિ અને કંઈક નવું શીખવાની ઈચ્છાને વધુ પ્રાથમિકતા આપે છે. તેમણે સ્પષ્ટતા કરી કે જ્યારે તેમણે અને તેમની માતાએ આ રેસ્ટોરન્ટ શરૂ કરી, ત્યારે તેઓ સ્થાનિક સમુદાયના સભ્યો, જેમ કે હાઇસ્કૂલ અને કોલેજના વિદ્યાર્થીઓ, સિંગલ મધર્સ (Single Mothers) અને નિવૃત્ત લોકોને રોજગારીની તકો આપવા માંગતા હતા.
રશ્મી ભટે એમ પણ કહ્યું કે, આ વીડિયો પાછળનો હેતુ એ માનસિકતાને પડકારવાનો હતો કે કોઈ કલ્ચરલ ફૂડ રેસ્ટોરન્ટમાં (Ethnic Restaurant) કામ કરતા કર્મચારીઓ તે જ સંસ્કૃતિના હોવા જોઈએ. તેમના ઘણા સ્ટાફ મેમ્બર્સ (Staff Members) એવા હતા જેમણે રેસ્ટોરન્ટ જોઈન કર્યા પહેલા ક્યારેય ભારતીય ભોજન ચાખ્યું ન હતું, પરંતુ હવે તેઓ મેનૂ (Menu) વિશે સંપૂર્ણ માહિતી ધરાવે છે અને ગ્રાહકોને વાનગીઓ સજેસ્ટ પણ કરે છે.
જોકે, આ નિવેદનથી ભારે વિવાદ પણ સર્જાયો છે. કેટલાક લોકોએ તેમની ઇન્ક્લુઝિવ (Inclusive) પોલિસીની પ્રશંસા કરી છે, તો વળી કેટલાક યુઝર્સે તેના પર ભેદભાવનો (Discrimination) આરોપ લગાવ્યો છે.
એક યુઝરે સવાલ ઉઠાવ્યો કે, “જો તમે જાણીજોઈને કોઈ એક ચોક્કસ જાતિને બાકાત રાખતા હોવ તો તેને ઇન્ક્લુઝિવ કઈ રીતે કહી શકાય? તમારી આ પોલિસી ગેરકાનૂની હોઈ શકે છે.” જ્યારે અન્ય ગ્રાહકોએ સ્વાદની પ્રમાણિકતા અંગે ચિંતા વ્યક્ત કરતા કહ્યું કે તેઓ ભારતીય ફૂડ કોઈ ભારતીય વ્યક્તિ દ્વારા જ બને તેવું પસંદ કરે છે.
