લંડનમાં 36મા માળેથી પડતું મુકતા ભારતીય મૂળના દંપતી અને તેમના 9 વર્ષના પુત્રનું મોત

લંડનના સાઉથ લંડન વિસ્તારમાં આવેલી એક ગગનચુંબી ઈમારતના 36મા માળેથી નીચે પડવાને કારણે જીવ ગુમાવનાર ભારતીય મૂળના (Indian-origin) પરિવારની સત્તાવાર ઓળખ જાહેર કરવામાં આવી છે.

આ હૃદયદ્રાવક ઘટનામાં જીવ ગુમાવનારાઓમાં 46 વર્ષીય અદિતિ વિજય પરલકર, તેમના 47 વર્ષીય પતિ રાકેશ નારાયણ પાઈ અને તેમનો 9 વર્ષનો માસૂમ પુત્ર સિડ પાઈ પરલકર સામેલ છે. આ ઘટનાને પગલે લંડનમાં વસતા ભારતીય સમુદાય અને સ્થાનિક રહીશોમાં ભારે આઘાતની લાગણી વ્યાપી ગઈ છે.

આ કરુણ ઘટના 27 મે ના રોજ સવારે આશરે 7:30 વાગ્યે એલિફન્ટ એન્ડ કેસલ (Elephant and Castle) વિસ્તારના ચર્ચયાર્ડ રો ખાતે બની હતી. 45 માળની હાઈપોઈન્ટ ટાવર બ્લોક (Highpoint tower block) ઈમારતના 36મા માળે આવેલી બાલ્કનીમાંથી, જે જમીનથી આશરે 400 ફૂટ ઊંચી હતી, ત્યાંથી આ પરિવારે કૂદકો માર્યો હતો.

ઘટનાની માહિતી મળતા જ મેટ્રોપોલિટન પોલીસ (Metropolitan Police), લંડન એમ્બ્યુલન્સ સર્વિસ, એર એમ્બ્યુલન્સ અને ફાયર બ્રિગેડ સહિતની ટીમો તાત્કાલિક ઘટનાસ્થળે દોડી ગઈ હતી, પરંતુ પેરામેડિક્સના તમામ પ્રયાસો છતાં ત્રણેયને બચાવી શકાયા નહોતા અને તેમને ઘટનાસ્થળે જ મૃત જાહેર કરવામાં આવ્યા હતા.

‘ડેઈલી મેલ’ના અહેવાલ મુજબ, પોલીસ આ સમગ્ર ઘટનાને સામૂહિક આત્મહત્યા અને હત્યા (Murder-Suicide) ના શંકાસ્પદ કેસ તરીકે જોઈને તપાસ કરી રહી છે.

પુત્રની બીમારી અને ડિપ્રેશનના કારણે તણાવમાં હતો પરિવાર
આ દંપતી વર્ષ 2000 ના દાયકાની શરૂઆતમાં લંડન આવીને વસ્યું હતું અને ફાઇનાન્સ તથા કન્સ્ટ્રક્શન કન્સલ્ટિંગ ક્ષેત્રે પ્રતિષ્ઠિત પ્રોફેશનલ્સ (Professionals) તરીકે પોતાની કન્સલ્ટન્સી ફર્મ (Consultancy Firm) ચલાવતું હતું.

મિત્રોના જણાવ્યા અનુસાર, તેમનો પુત્ર સિડ જન્મથી જ ગંભીર સ્વાસ્થ્ય સમસ્યાઓનો સામનો કરી રહ્યો હતો. તે બોલી શકતો નહોતો, તેને લર્નિંગ ડિસેબિલિટી (શીખવામાં અસમર્થતા), આંશિક વિકલાંગતા અને કિડનીની ગંભીર બીમારી (Kidney Disease) હતી.

પરિવારે વર્ષ 2020માં ભારતમાં (India) પણ તેની સારવાર કરાવી હતી અને ત્યારબાદ તેઓ યુકે (UK) પરત ફર્યા હતા. બાળકની આવી સ્થિતિને કારણે માતા અદિતિ લાંબા સમયથી ડિપ્રેશન (Depression) અને માનસિક તણાવનો સામને કરી રહી હતી.

જો કે, મિત્રો માટે એ માનવું મુશ્કેલ છે કે આ સુસાઈડ પેક્ટ (Suicide Pact) હોઈ શકે, કારણ કે રાકેશ (જેમને મિત્રો રોબિન તરીકે ઓળખતા) સ્વભાવે ખૂબ જ શાંત અને મજબૂત વ્યક્તિ હતા.

સ્થાનિક સાંસદ (MP) નીલ કોયલે (Neil Coyle) બિલ્ડિંગના રહીશોને પત્ર લખીને આ ઘટના પર ઊંડું દુઃખ વ્યક્ત કર્યું છે અને સ્વીકાર્યું છે કે બાળકની ગંભીર સ્વાસ્થ્ય જટિલતાઓએ પરિવારની આવી પરિસ્થિતિમાં ફાળો આપ્યો હોઈ શકે છે.

તપાસકર્તાઓને પાડોશીઓ પાસેથી એવી પણ માહિતી મળી છે કે ઘટનાના થોડા અઠવાડિયા પહેલા આ ફ્લેટમાંથી વારંવાર ઝઘડા અને ચિંતિત કરનારા અવાજો આવતા હતા.

મેટ્રોપોલિટન પોલીસના એક્ટિંગ ડિટેક્ટિવ સુપ્રિટેન્ડેન્ટ ડેન વ્હિતને (Dan Whitten) જણાવ્યું હતું કે, “અમારી સંવેદનાઓ મૃતકોના પરિવારજનો સાથે છે.

અમે આ ઘટના પાછળના સાચા તથ્યો શોધવા માટે ખુલ્લા મનથી તપાસ કરી રહ્યા છીએ.” પોલીસે આ મામલે મીડિયા અને જનતાને કોઈપણ પ્રકારની અટકળો કે અફવાઓ ફેલાવવાથી દૂર રહેવા માટે વિનંતી કરી છે.