અમેરિકાના કેલિફોર્નિયામાં પ્રખ્યાત BAPS સ્વામિનારાયણ મંદિરમાં ચોરી: બે શખ્સોની ધરપકડ કરાઈ

BAPS Temple Burglary | દક્ષિણ કેલિફોર્નિયાના (Southern California) ચીનો હિલ્સમાં (Chino Hills) આવેલા વિશ્વપ્રસિદ્ધ BAPS શ્રી સ્વામિનારાયણ મંદિરને (BAPS Shri Swaminarayan Mandir) નિશાન બનાવનાર બે ચોરોની પોલીસે ધરપકડ કરી લીધી છે.

સૅન બર્નાર્ડિનો કાઉન્ટી શેરિફ ડિપાર્ટમેન્ટના (San Bernardino County Sheriff’s Department) જણાવ્યા અનુસાર, પકડાયેલા આરોપીઓની ઓળખ 48 વર્ષીય ડેવિડ સાંચેઝ (David Sanchez) અને 32 વર્ષીય જોસેફ હર્નાન્ડીઝ (Joseph Hernandez) તરીકે થઈ છે. આ બંને આરોપીઓ ચીનો હિલ્સના જ સ્થાનિક રહેવાસી છે.

પોલીસ અધિકારીઓના જણાવ્યા મુજબ, ચાલુ મહિનાની શરૂઆતમાં આ શખ્સો મંદિરના પરિસરમાં ગેરકાયદેસર રીતે ઘૂસ્યા હતા અને ત્યાંથી કિંમતી સામાનની ચોરી કરીને ભાગી ગયા હતા.

વ્યાપક તપાસ બાદ ડિટેક્ટિવ્સે સર્ચ વોરંટ (Search Warrant) જાહેર કરીને આરોપીઓના ઘરે દરોડા પાડ્યા હતા, જ્યાંથી મંદિરમાંથી ચોરાયેલો સામાન રિકવર (Recover) કરવામાં આવ્યો છે. જોકે, સુરક્ષાના કારણોસર પોલીસે ચોરાયેલા સામાનની ચોક્કસ યાદી કે તેની કિંમત જાહેર કરી નથી.

બંને આરોપીઓ પર ચોરી (Burglary) ઉપરાંત ગુનાહિત કાવતરું (Conspiracy) અને ગેરકાયદેસર હથિયાર રાખવાના ગંભીર ગુનાઓ નોંધવામાં આવ્યા છે. ધરપકડ દરમિયાન એક આરોપી પાસેથી એવી બંદૂક (Firearm) મળી આવી છે જેનો સિરિયલ નંબર ભૂંસી નાખવામાં આવ્યો હતો.

ઉલ્લેખનીય છે કે, ચીનો હિલ્સનું આ BAPS મંદિર ઉત્તર અમેરિકાના (North America) સૌથી મોટા હિન્દુ મંદિરોમાંનું એક છે અને ત્યાં દર વર્ષે હજારો શ્રદ્ધાળુઓ દર્શનાર્થે આવે છે. અગાઉ વર્ષ 2025 માં આ મંદિરની દીવાલો પર ભારત-વિરોધી સૂત્રો લખીને તોડફોડ કરવામાં આવી હતી, જેને હેટ ક્રાઈમ (Hate Crime) તરીકે તપાસવામાં આવ્યો હતો. જોકે, હાલની આ ચોરી પાછળ કોઈ ધાર્મિક ભેદભાવ કે દ્વેષ હોવાના પુરાવા મળ્યા નથી.