AC Side Effects | હાલમાં ઉનાળાની ભીષણ ગરમીનો કહેર વર્તાઈ રહ્યો છે. આવા સમયમાં અસહ્ય તડકામાંથી ઘરે પરત ફરતા જ દરેક વ્યક્તિ એસીને (Air Conditioner) સૌથી ઓછા તાપમાન એટલે કે 16 કે 17 ડિગ્રી પર સેટ કરી દે છે જેથી રૂમ તરત જ ઠંડો થઈ જાય. આપણે વિચારીએ છીએ કે આનાથી આપણને જલ્દી રાહત મળશે, પરંતુ વાસ્તવિકતામાં આ પદ્ધતિ સ્વાસ્થ્ય માટે અત્યંત જોખમી સાબિત થઈ શકે છે. આટલા નીચા તાપમાને સતત એસી ચલાવવાથી માત્ર તમારા ઘરનું વીજળીનું બિલ જ રોકેટની જેમ વધતું નથી, પરંતુ તે તમને બીમાર કરીને હોસ્પિટલના મોટા બિલ ચૂકવવા પણ મજબૂર કરી શકે છે.
થર્મલ શૉક અને ઇમ્યુનિટી પર હુમલો
જ્યારે તમે બહારના 40 થી 45 ડિગ્રીના ધગધગતા તાપમાનમાંથી સીધા આવીને 16 ડિગ્રીવાળા એકદમ ઠંડા રૂમમાં બેસો છો, ત્યારે તમારા શરીરને ગંભીર ‘થર્મલ શૉક’ (Thermal Shock) લાગે છે. અચાનક થતા આ મોટા તાપમાનના ફેરફારને આપણું શરીર સરળતાથી સહન કરી શકતું નથી. તેના કારણે લોહીની નસો અચાનક સંકોચાઈ જાય છે, જે બ્લડ સર્ક્યુલેશન (Blood Circulation) પર ખરાબ અસર કરે છે. આનાથી શરીરની ઇમ્યુનિટી (Immunity) નબળી પડે છે અને લોકોને વારંવાર શરદી, ઉધરસ, કફ અને ગળામાં ઇન્ફેક્શનની (Infection) ફરિયાદ થવા લાગે છે.
સાંધાનો દુખાવો અને સ્નાયુઓમાં જકડન
સતત અત્યંત નીચા તાપમાનમાં બેસવા કે સૂવાથી શરીરના સ્નાયુઓ અને નસો પર ખૂબ જ ખરાબ અસર પડે છે. 16-17 ડિગ્રીની ઠંડી હવા સીધી શરીર પર લાગવાથી સાંધાનો દુખાવો (Joint Pain) અને સ્નાયુઓની જકડન વધી જાય છે. ખાસ કરીને જે લોકોને પહેલેથી જ આર્થરાઈટિસ (Arthritis) કે સાઈનસની (Sinus) તકલીફ છે, તેમના માટે આ સ્થિતિ ખૂબ જ પીડાદાયક બની શકે છે. આ સિવાય ઠંડી હવાના કારણે માથાનો દુખાવો પણ સામાન્ય બની જાય છે, જે ધીમે-ધીમે માઇગ્રેનનું (Migraine) સ્વરૂપ લઈ શકે છે.
ત્વચા અને આંખોમાં ડ્રાયનેસ
ઓછા તાપમાન પર ચાલતું એસી રૂમની હવામાંથી બધી જ ભેજ સોષી લે છે. હવા ડ્રાય (Dry) થવાને કારણે તમારી ત્વચા (Skin) અને આંખો પર તેની ખૂબ માઠી અસર થાય છે. સતત ઠંડી અને સૂકી હવામાં રહેવાથી ત્વચામાં ડ્રાયનેસ (Dryness) અને ખંજવાળ આવવા લાગે છે. સાથે જ આંખોનો ભેજ ખતમ થવાથી ‘ડ્રાય આઈઝ’ની (Dry Eyes) સમસ્યા થઈ જાય છે, જેનાથી આંખોમાં બળતરા અને લાલાશની ફરિયાદ શરૂ થાય છે.
એસી ચલાવવાની સાચી રીત કઈ?
ડોક્ટરો અને બ્યુરો ઓફ એનર્જી એફિશિયન્સીના (Bureau of Energy Efficiency) જણાવ્યા અનુસાર, માનવ શરીર માટે 24 થી 26 ડિગ્રીનું તાપમાન સૌથી બેસ્ટ (Best) અને હેલ્ધી માનવામાં આવે છે. આ તાપમાન પર એસી ચલાવવાથી શરીર પર કોઈ ખરાબ અસર પડતી નથી અને રૂમમાં સારી કૂલિંગ (Cooling) પણ જળવાઈ રહે છે. સૌથી મોટી વાત એ છે કે 24 ડિગ્રી પર એસી ચલાવવાથી વીજળીનો વપરાશ પણ ઘણો ઓછો થાય છે, જેનાથી તમારું લાઇટ બિલ કંટ્રોલમાં રહે છે.