Driving Licence Norway | વિદેશમાં વસતા ભારતીયો માટે ત્યાંના સ્થાનિક નિયમો અને પ્રક્રિયાઓ ઘણીવાર આશ્ચર્યજનક અને ખર્ચાળ સાબિત થતી હોય છે.
તાજેતરમાં નોર્વેમાં રહેતા એક ભારતીય યુવકનો કિસ્સો સોશિયલ મીડિયા પર ભારે ચર્ચામાં આવ્યો છે, જેમાં તેણે નોર્વે જેવા યુરોપિયન દેશમાં ડ્રાઇવિંગ લાયસન્સ મેળવવા પાછળ થયેલા ખર્ચનો ખુલાસો કર્યો છે.
આ યુવકે જણાવ્યું કે નોર્વેમાં ડ્રાઇવિંગ લાયસન્સ કઢાવવું એ કોઈ સામાન્ય બાબત નથી અને તેના માટે તેણે ભારતીય ચલણ મુજબ અંદાજે 6 લાખ રૂપિયા જેટલી માતબર રકમ ખર્ચ કરવી પડી છે.
આ રકમ સાંભળીને ભારતમાં રહેતા લોકો ચોંકી ગયા છે, કારણ કે ભારતમાં આ પ્રક્રિયા ખૂબ જ સરળ અને નજીવા ખર્ચે પૂરી થઈ જાય છે.
નોર્વેમાં ડ્રાઇવિંગ લાયસન્સ મેળવવાની પ્રક્રિયા અત્યંત કડક, લાંબી અને વ્યવસ્થિત હોય છે. ત્યાં માત્ર ડ્રાઇવિંગ ટેસ્ટ પાસ કરી લેવાથી લાયસન્સ મળી જતું નથી, પરંતુ ફરજિયાત ડ્રાઇવિંગ લેસન્સ, થિયરી ક્લાસ, સેફ્ટી કોર્સ, રાત્રિ ડ્રાઇવિંગ તાલીમ અને સ્લિપરી રોડ (બરફવાળા રસ્તા) પર વાહન ચલાવવાની વિશેષ તાલીમ લેવી પડે છે.
આ દરેક સ્ટેપ માટે અલગ-અલગ ભારે ફી ચૂકવવી પડે છે. આ જ કારણ છે કે નોર્વેમાં ડ્રાઇવિંગ શીખવું અને લાયસન્સ મેળવવું એ સામાન્ય નાગરિક માટે મોટો આર્થિક બોજ બની જાય છે.
બીજી બાજુ, જો આ પ્રક્રિયાની સરખામણી ભારતીય ટ્રાન્સપોર્ટ સિસ્ટમ સાથે કરવામાં આવે, તો ભારતમાં ડ્રાઇવિંગ લાયસન્સ મેળવવાની પ્રક્રિયા ખૂબ જ ઝડપી અને ઓછી ખર્ચાળ છે.
ભારતમાં લર્નિંગ લાયસન્સથી લઈને પરમેનન્ટ લાયસન્સ મેળવવા સુધીનો કુલ ખર્ચ થોડા હજાર રૂપિયામાં જ પૂરો થઈ જાય છે.
જોકે ભારતમાં પણ હવે રોડ સેફટી અને પારદર્શિતા વધારવા માટે ટેસ્ટના નિયમો કડક કરવામાં આવ્યા છે, પરંતુ નોર્વે કે અન્ય યુરોપિયન દેશોની તુલનામાં અહીં ખર્ચ નહિવત સમાન છે.
આ ભારતીય યુવકના અનુભવે સોશિયલ મીડિયા પર એક નવી ચર્ચા જગાવી છે કે કેવી રીતે વિકસિત દેશોમાં કાનૂની અને લાયસન્સ પ્રક્રિયાઓ નાગરિકો માટે ખૂબ ખર્ચાળ સાબિત થાય છે.
આ કિસ્સો વિદેશી મુસાફરી અને ત્યાં સ્થાયી થવા માંગતા યુવાનો માટે આંખ ઉઘાડનારો સાબિત થઈ રહ્યો છે.
