કિંજલ રબારી વિવાદ : પાટીદાર માતાએ રબારી સમાજના અગ્રણીઓને કરી દીકરી પરત આપવા આજીજી

ગુજરાતમાં કિંજલ રબારી (Kinjal Rabari) ના લગ્નનો વિવાદ હજુ શાંત થયો નથી ત્યાં ખેડા (Kheda) જિલ્લામાંથી વધુ એક ચકચારી કિસ્સો સામે આવ્યો છે. કઠલાલ (Kathlal) તાલુકાના લસુંદ્રા ગામના પાટીદાર પરિવારે સોશિયલ મીડિયા (Social Media) પર વીડિયો વાયરલ (Viral Video) કરીને પોતાની દીકરી પલકને પરત મેળવવા રબારી સમાજના અગ્રણીઓને ભાવુક અપીલ કરી છે.

માતા રેણુકાબેન પટેલે (Renukaben Patel) રબારી સમાજના આગેવાન ઠાકરબાપાને સંબોધીને કહ્યું છે કે, “મને મારી દીકરી પાછી આપો.”

મળતી વિગતો અનુસાર, પલક કોલેજ (College) ગયા બાદ ઘરે પરત ફરી ન હતી. બાદમાં પોલીસ (Police) તપાસમાં જાણવા મળ્યું કે તેણે રબારી સમાજના પિયુષભાઈ દિલીપભાઈ સાથે લગ્ન (Marriage) કરી લીધા છે.

માતાએ સ્પષ્ટ કર્યું છે કે આ લગ્ન તેમની મરજી વિરુદ્ધ થયા છે અને તેમને આ સંબંધ મંજૂર નથી. વીડિયોમાં તેમણે ઠાકરબાપાના એ જૂના નિવેદનનો ઉલ્લેખ કર્યો જેમાં તેમણે અન્ય સમાજની દીકરી ન લેવાની વાત કરી હતી.

આ પહેલા રૂની ગામના ચૌધરી પરિવારનો (Chaudhary Family) પણ આવો જ એક વીડિયો વાયરલ થયો હતો. કિંજલ રબારીના કિસ્સામાં સમાધાન બાદ હવે અન્ય પરિવારો પણ પોતાની દીકરીઓ પરત મેળવવા આશા રાખી રહ્યા છે. પાટીદાર મહિલાની આ આજીજીએ હાલ સોશિયલ મીડિયા પર ભારે ચર્ચા જગાવી છે.