અમેરિકામાં ખોટી ઓળખ આપી નાગરિકતા મેળવનાર ભારતીય મૂળના વ્યક્તિ સામે ડીનેચરલાઇઝેશન કેસ નોંધાયો

US Denaturalisation Case | અમેરિકાના કન્સાસ ડિસ્ટ્રિક્ટ (District of Kansas) ના યુએસ અટોર્ની ઓફિસ (US Attorney’s Office) દ્વારા ભારતીય મૂળના એક વ્યક્તિ સામે નાગરિકતા રદ કરવાનો સિવિલ કેસ (Civil Case) દાખલ કરવામાં આવ્યો છે.

કન્સાસના ઓલેથે (Olathe) માં રહેતા હરિન્દર સિંહ (Harinder Singh) ઉર્ફે હરિન્દર સિંહ સંઘેડા ઉર્ફે રશપાલ સિંહ પર આરોપ છે કે તેમણે પોતાની ખરી ઓળખ અને ભૂતકાળનો ઈમિગ્રેશન હિસ્ટ્રી (Immigration History) છુપાવીને ગેરકાયદેસર રીતે અમેરિકી નાગરિકતા મેળવી હતી.

અમેરિકી ઈમિગ્રેશન એન્ડ નેશનાલિટી એક્ટ (Immigration and Nationality Act) અનુસાર, જો કોઈ વ્યક્તિએ સત્ય છુપાવીને, ખોટી માહિતી આપીને કે ગેરકાયદેસર રીતે નાગરિકતા મેળવી હોય, તો તેની સિટિઝનશિપ (Citizenship) રદ થઈ શકે છે અને નેચરલાઇઝેશન સર્ટિફિકેટ (Certificate of Naturalisation) રદ કરી શકાય છે.

અમેરિકી સત્તાવાળાઓના જણાવ્યા અનુસાર, આરોપી સિંહનો પ્રથમ સંપર્ક 1991 માં ન્યૂયોર્કના JFK ઈન્ટરનેશનલ એરપોર્ટ (JFK International Airport) પર થયો હતો, જ્યાં તેણે પોતાનું નામ રશપાલ સિંહ (Rushpal Singh) બતાવ્યું હતું. ત્યારબાદ 1995 માં ઈમિગ્રેશન જજે તેને દેશનિકાલ (Deportation) નો ઓર્ડર આપ્યો હતો. જોકે, સરકારી રેકોર્ડ્સ અનુસાર સિંહે આ આદેશનો અમલ કર્યો ન હતો અને તે અમેરિકામાં જ રહ્યો હતો.

વર્ષ 1996 માં, આરોપીએ ઈમિગ્રેશન એન્ડ નેચરલાઇઝેશન સર્વિસ (INS) સમક્ષ હરિન્દર સિંહના નામે નવી અરજી કરી હતી. આ અરજીમાં તેણે પોતાની જન્મતારીખ, યુએસમાં પ્રવેશવાની તારીખ અને અન્ય વિગતો બદલી નાખી હતી. INS એ 2000 માં તેને પરમેનન્ટ લોફુલ રેસિડેન્ટ (Permanent Lawful Resident) સ્ટેટસ આપ્યું અને 2008 માં તેને યુએસ નાગરિક બનાવવામાં આવ્યો.

હવે યુએસ સરકારે તેની નાગરિકતા સંપૂર્ણપણે રદ કરવા અને તેનો નાગરિકતા ઓર્ડર રદબાતલ કરવા માટે કોર્ટમાં કેસ દાખલ કર્યો છે.