અમેરિકામાં મતદાન કૌભાંડ: “મને ખબર નહોતી કે હું વોટ ન આપી શકું”, કમલેશ શાહનો દાવો

Operation Protect the Vote | અમેરિકાની 2024ની રાષ્ટ્રપતિ ચૂંટણીમાં ગેરકાયદેસર રીતે વોટિંગ કરવાના આરોપમાં કેલિફોર્નિયામાં 28 વિદેશી નાગરિકો સામે કેસ દાખલ કરવામાં આવ્યો છે. આ યાદીમાં બે ભારતીય નાગરિકો, 67 વર્ષીય કમલેશ નવનીતલાલ શાહ અને 30 વર્ષીય અમનદીપ કૌર પણ સામેલ છે. ગ્રીન કાર્ડ ધારક હોવા છતાં અમેરિકી ચૂંટણીમાં મતદાન કરવા બદલ તેમની સામે ચુસ્ત ફેડરલ ગુનાહિત ચાર્જ લગાવવામાં આવ્યા છે.

કેલિફોર્નિયાના નિવૃત્ત ડેન્ટિસ્ટ  કમલેશ શાહે દાવો કર્યો છે કે તેઓ અમેરિકાના નાગરિક ન હોવાથી મતદાન કરી શકતા નથી તેની તેમને જાણ જ નહોતી. તેઓ કાયમી નિવાસી (ગ્રીન કાર્ડ ધારક) હતા, પરંતુ અમેરિકાના નાગરિક નહોતા. તેમ છતાં, તેમના પર 2024ની અમેરિકી ચૂંટણી માટે ગેરકાયદેસર રીતે મતદાર તરીકે નોંધણી કરાવવાનો આરોપ મૂકવામાં આવ્યો છે.

કેલિફોર્નિયામાં ચૂંટણીમાં મતદાન કરનારા વિદેશી નાગરિકોની યાદીમાં નામ આવ્યા બાદ કમલેશ શાહે કહ્યું કે તેઓ આ સમગ્ર પરિસ્થિતિથી અજાણ હતા અને ડરી ગયા હતા. તેમના જણાવ્યા મુજબ, લગભગ 5થી 6 વર્ષ પહેલાં અકસ્માતમાં ગંભીર ઈજા થયા બાદ તેઓ 6 મહિના સુધી કોમામાં રહ્યા હતા. ત્યારથી તેમને બોલવામાં અને ચાલવામાં પણ મુશ્કેલી પડે છે.

કમલેશે જણાવ્યું કે તેઓ તેમના દૃષ્ટિહીન રૂમમેટ સાથે મતદાન કરવા માટે સામુદાયિક કેન્દ્રમાં ગયા હતા. ત્યાં તેમની પાસેથી ઓળખપત્ર માગવામાં આવ્યું હતું. તેમણે ઓળખપત્ર અને સોશિયલ સિક્યોરિટી કાર્ડ રજૂ કર્યું હતું. ત્યારબાદ તેમને મતદાન માટેનાં કાગળો આપવામાં આવ્યા હતા.

કમલેશના કહેવા પ્રમાણે, તેમને લાગ્યું હતું કે તેઓ મતદાર તરીકે નોંધણી કરાવી રહ્યા છે. તેમને એવું પણ લાગતું હતું કે તેઓ અમેરિકાના નાગરિક હશે. તેમણે કહ્યું કે કોઈએ તેમને જણાવ્યું નહોતું કે નાગરિકતા ન હોવાથી તેઓ અમેરિકાની ચૂંટણીમાં મતદાન કરી શકતા નથી.

આ કેસમાં 30 વર્ષીય ભારતીય મૂળની અમનદીપ કૌરનું નામ પણ સામે આવ્યું છે. તે રાંચો પાલોસ વર્ડેસની રહેવાસી છે. કાયદા અમલીકરણના રેકોર્ડ અનુસાર, અમનદીપ અમેરિકાની નાગરિકતા મેળવવાનો પ્રયાસ કરી રહી હતી. તેના પર ડિસેમ્બર 2022માં ગેરકાયદેસર રીતે મતદાર નોંધણી કરાવવા અને નવેમ્બર 2024ની ચૂંટણીમાં મતદાન કરવાનો આરોપ છે.

શું છે ‘ઓપરેશન પ્રોટેક્ટ ધ વોટ’?

અમેરિકી પ્રશાસનના જણાવ્યા અનુસાર, ‘ઓપરેશન પ્રોટેક્ટ ધ વોટ’ કેલિફોર્નિયામાં ચૂંટણી સંબંધિત છેતરપિંડી શોધવા અને અટકાવવા માટેની સંકલિત કાર્યવાહી છે. આ કેસમાં કુલ 28 લોકો સામે આરોપો મૂકવામાં આવ્યા છે, જેમાં 11 વિદેશી નાગરિકોની ધરપકડ કરવામાં આવી હોવાનું જણાવાયું છે. આરોપીઓ પાસે ગ્રીન કાર્ડ હોવા છતાં તેઓ અમેરિકાના નાગરિક નહોતા. અમેરિકાની ફેડરલ ચૂંટણીઓમાં સામાન્ય રીતે માત્ર અમેરિકી નાગરિકો જ મતદાન કરી શકે છે.

આરોપોમાં નાગરિકતા મેળવવા માટેની અરજીમાં ખોટી માહિતી આપવી અને ગેરકાયદેસર રીતે મતદાર નોંધણી કરાવવી સામેલ છે. આ ગુનાઓ સાબિત થાય તો કેટલાક આરોપોમાં મહત્તમ 5 વર્ષની ફેડરલ જેલની સજા થઈ શકે છે.

અમેરિકી સરકારે 13 ઓક્ટોબરે આવા વ્યક્તિઓની યાદી કેલિફોર્નિયાને આપી હતી અને તેમની નાગરિકતાની સ્થિતિની પુષ્ટિ થાય ત્યાં સુધી તેમના ટપાલ દ્વારા મોકલાયેલા મતપત્રો અલગ રાખવાની માગ કરી હતી. કેલિફોર્નિયાએ સહકાર આપવાનો ઇનકાર કર્યો હોવાનો ફેડરલ સરકારનો દાવો છે. ત્યારબાદ સરકારે કોર્ટમાં અરજી કરી હતી. હાલ આ મામલો ચૂંટણીની વિશ્વસનીયતા અને મતદાનના કાયદાકીય નિયમો અંગે ચર્ચાનો વિષય બન્યો છે.

New: One of the green card holders charged in US DOJ voter fraud investigation said no one at the poll he showed up to told him he couldn’t vote.

Kamlesh Shah told @MaricelaDLCKCRA he has a Real ID and thought he could vote: https://t.co/23DmPYwHcr

— Ashley Zavala (@ZavalaA) October 20, 2026