રોહિત શર્માના સંન્યાસની અફવાઓ પર કેપ્ટન શુભમન ગિલે તોડ્યું મૌન, આપ્યું મોટું નિવેદન

Rohit Sharma Retirement Rumours | ઇંગ્લેન્ડ (England) પ્રવાસ પર રમાયેલી વનડે સિરીઝ (ODI Series) ના ત્રીજા અને નિર્ણાયક મુકાબલા પહેલા ભારતીય ટીમના વરિષ્ઠ ઓપનર રોહિત શર્મા (Rohit Sharma) ના ભવિષ્ય અને સંન્યાસ (Retirement) ને લઈને સોશિયલ મીડિયા પર અનેક અટકળો લગાવવામાં આવી રહી હતી.

કેટલાક મીડિયા અહેવાલોમાં એવો પણ દાવો કરવામાં આવ્યો હતો કે લોર્ડ્સ (Lord’s) ના ઐતિહાસિક મેદાન પર રમાનારી મેચ રોહિત શર્માની છેલ્લી આંતરરાષ્ટ્રીય મેચ હોઈ શકે છે.

જોકે, મેદાન પર ઉતરીને રોહિત શર્માએ શાનદાર 138 રનની ઇનિંગ રમીને પોતાના બેટથી આ તમામ અફવાઓનો જડબાતોડ જવાબ આપ્યો છે.

મેચ પૂરી થયા બાદ યોજાયેલી પ્રેસ કોન્ફરન્સ (Press Conference) માં ભારતીય ટીમના કેપ્ટન શુભમન ગિલ (Shubman Gill) એ રોહિત શર્માના સંન્યાસની અફવાઓ પર સંપૂર્ણ વિરામ મૂકી દીધું હતું.

ગિલે પત્રકારોના સવાલોનો જવાબ આપતા સ્પષ્ટ કર્યું હતું કે, “રોહિત ભાઈએ અમને સંન્યાસ વિશે એવું કંઈ જ કહ્યું નથી. અમને આ વિષય પર વાત કરવાનો મોકો પણ નથી મળ્યો.

મને લાગે છે કે આ બધી બાબતો માત્ર મીડિયામાં જ ચાલી રહી છે. ટીમની અંદર કે ડ્રેસિંગ રૂમ (Dressing Room) માં આ પ્રકારની કોઈ જ ચર્ચા થઈ નથી.” ગિલે પોતાની વાત પર ભાર મૂકતા ફરીથી પુનરાવર્તન કર્યું હતું કે ખેલાડીઓ વચ્ચે આ બાબતે કોઈ જ વાતચીત થઈ નથી.

મેચની વાત કરીએ તો ઇંગ્લેન્ડ દ્વારા આપવામાં આવેલા 388 રનના વિશાળ લક્ષ્યનો પીછો કરતા રોહિત શર્માએ 110 બોલમાં 138 રનની વિસ્ફોટક ઇનિંગ રમી હતી. પોતાની ઇનિંગ દરમિયાન તેમણે ઇંગ્લેન્ડના બોલરો પર સતત દબાણ જાળવી રાખ્યું હતું.

નોન-સ્ટ્રાઇકર એન્ડ (Non-Striker End) પર હાજર શુભમન ગિલે રોહિત શર્માની પ્રશંસા કરતા કહ્યું, “હું મોટાભાગે તેમની સામે છેડે ઉભો રહીને તેમને નજીકથી નિહાળી રહ્યો હતો. તેઓ બેટિંગ દરમિયાન એકદમ શાંત હતા.

પાવરપ્લે (Powerplay) માં અમે વાત કરી રહ્યા હતા કે નવી બોલ પર કેટલા આક્રમક શૉટ્સ રમવા જોઈએ, કારણ કે શરૂઆતમાં રન બનાવવા સરળ નહોતા. પરંતુ રોહિત ભાઈએ પરિસ્થિતિને બહુ સારી રીતે સમજી અને ખૂબ જ ઓછા સમયમાં 60-70 રન જોડી દીધા.”

આ વિવાદ વચ્ચે ભારતીય ક્રિકેટ કંટ્રોલ બોર્ડ (Board of Control for Cricket in India – BCCI) ના સચિવ દેવજીત સૈકિયા (Devajit Saikia) એ પણ સ્થિતિ સ્પષ્ટ કરતા જણાવ્યું હતું કે રોહિત શર્માના વનડે સંન્યાસના સમાચાર તદ્દન ખોટા છે.

રોહિત શર્મા ભારતીય વનડે ટીમ (Team India) ના નિયમિત સભ્ય છે અને જ્યાં સુધી તેઓ પસંદગીકારો (Selectors) ની યોજનાઓનો ભાગ છે, ત્યાં સુધી તેઓ દેશ માટે રમતા રહેશે. લોર્ડ્સ વનડે તેમનો છેલ્લો આંતરરાષ્ટ્રીય મુકાબલો નહોતો.

જોકે, આ મેચમાં ભારત 388 રનના સ્કોરનો પીછો કરતા 27 રનથી હારી ગયું હતું, જેના કારણે ઇંગ્લેન્ડે આ સિરીઝ 2-1 થી જીતી લીધી હતી. પરંતુ મેચ બાદ સૌથી વધુ ચર્ચા ભારતની હારની નહીં, પરંતુ રોહિત શર્માના શાનદાર કમબેક (Comeback), તેમની સદી અને સંન્યાસની અફવાઓ પર શુભમન ગિલ અને બીસીસીઆઈ (BCCI) દ્વારા આપવામાં આવેલા સત્તાવાર નિવેદનોની રહી હતી.