Riyan Parag Vaping | રાજસ્થાન રોયલ્સ (Rajasthan Royals)ના સ્ટાર ઓલરાઉન્ડર રિયાન પરાગ (Riyan Parag) એકવાર ફરી વિવાદોના વંટોળમાં ફસાયા છે. આ વખતે વિવાદ તેમના બેટિંગ પર્ફોર્મન્સને કારણે નહીં, પરંતુ સોશિયલ મીડિયા પર વાયરલ થયેલા એક શંકાસ્પદ વીડિયોને કારણે સર્જાયો છે.
પંજાબ કિંગ્સ (Punjab Kings) સામેની મેચ દરમિયાન ડ્રેસિંગ રૂમમાંથી એક ક્લિપ સામે આવી છે, જેમાં પરાગ કથિત રીતે ‘વેપિંગ’ (Vaping) એટલે કે ઈ-સિગરેટ પીતા હોવાનું દેખાય છે. આ ઘટના બાદ ભારતીય કાયદા અને BCCI ના કડક નિયમોને લઈને ચર્ચાઓ તેજ બની છે.
શું છે સમગ્ર ઘટના? મેચ દરમિયાન ટીવી બ્રોડકાસ્ટમાં એક ક્ષણ એવી કેદ થઈ જેમાં રિયાન પરાગ ડ્રેસિંગ રૂમમાં બેઠા છે અને તેમના હાથમાં એક ચમકતી ડિવાઈસ છે. થોડી જ સેકન્ડોમાં તેમના મોઢામાંથી ધુમાડો નીકળતો જોવા મળ્યો હતો. જોકે આ વીડિયો સંપૂર્ણપણે સ્પષ્ટ નથી, પરંતુ નેટીઝન્સ દાવો કરી રહ્યા છે કે તે ઈ-સિગરેટ જ હતી. રમતગમતના ચાહકો હવે પરાગના આ બેજવાબદાર વર્તન બદલ કડક કાર્યવાહીની માંગ કરી રહ્યા છે.
ભારતીય કાયદો અને વેપિંગ :જો તપાસમાં સાબિત થાય કે રિયાન પરાગ ખરેખર વેપિંગ કરી રહ્યા હતા, તો તેમની મુશ્કેલીઓ વધી શકે છે. ભારત સરકાર દ્વારા 2019 માં ‘ઈ-સિગરેટ નિષેધ અધિનિયમ’ લાગુ કરવામાં આવ્યો હતો. આ કાયદા હેઠળ ભારતમાં ઈ-સિગરેટનું ઉત્પાદન, વેચાણ અને સંગ્રહ કરવા પર સંપૂર્ણ પ્રતિબંધ છે. પ્રથમવાર નિયમ તોડવા બદલ 1 વર્ષની જેલ અથવા ₹1 લાખ સુધીનો દંડ થઈ શકે છે. સ્ટેડિયમ જેવા સાર્વજનિક સ્થળો પર આ પ્રકારની પ્રવૃત્તિ કરવી એ ગંભીર કાયદાકીય અપરાધ છે.
BCCI ના નિયમો અને સંભવિત પ્રતિબંધ ક્રિકેટના મેદાન અને ડ્રેસિંગ રૂમ ‘ક્લીન ઝોન’ ગણાય છે. આઈપીએલ કોડ ઓફ કન્ડક્ટ (Code of Conduct) મુજબ, ડ્રેસિંગ રૂમમાં કોઈપણ પ્રકારના નશીલા પદાર્થો કે ધૂમ્રપાનની મંજૂરી હોતી નથી. જો પરાગ દોષિત જણાશે, તો BCCI તેમની મેચ ફીમાં કાપ મૂકી શકે છે અથવા અમુક મેચો માટે તેમને સસ્પેન્ડ (Suspend) પણ કરી શકે છે. હજુ સુધી રાજસ્થાન રોયલ્સ કે બોર્ડ તરફથી સત્તાવાર નિવેદન આવ્યું નથી, પરંતુ આ વિવાદ પરાગની કારકિર્દી અને છબી પર ચોક્કસપણે નકારાત્મક અસર પાડી શકે છે.