પાકિસ્તાને ટ્રમ્પનો પ્રસ્તાવ ફગાવ્યો: અબ્રાહમ એકોર્ડ્સમાં જોડાવાની અને ઈઝરાયેલને માન્યતા આપવાની સ્પષ્ટ ના

Abraham Accords Proposal | અમેરિકા (America) ના રાષ્ટ્રપતિ ડોનાલ્ડ ટ્રમ્પ દ્વારા સોમવારે આપવામાં આવેલા કડક રાજદ્વારી પડકાર બાદ, પાકિસ્તાને અબ્રાહમ એકોર્ડ્સ (Abraham Accords) માં જોડાવાના અને ઈઝરાયેલને ઔપચારિક માન્યતા આપવાના અમેરિકી દબાણને સંપૂર્ણપણે ફગાવી દીધું છે.

ટ્રમ્પના આ નિવેદન પર પલટવાર કરતા પાકિસ્તાનના રક્ષા મંત્રી ખ્વાજા આસિફે જણાવ્યું છે કે, આ પ્રસ્તાવ તેમની પાયાની વિચારધારાની વિરુદ્ધ છે, જે કોઈપણ સંજોગોમાં સ્વીકાર્ય નથી.

વાસ્તવમાં, સોમવારે અમેરિકી રાષ્ટ્રપતિ ડોનાલ્ડ ટ્રમ્પે પાકિસ્તાન સહિત મુસ્લિમ બહુમતી ધરાવતા દેશો સમક્ષ ઈઝરાયેલ (Israel) ને ઔપચારિક રીતે માન્યતા આપવા અને સંબંધો સામાન્ય બનાવવાની માંગ કરી હતી.

ટ્રમ્પે આ શરતને ઈરાન સાથેના કોઈપણ ઔપચારિક શાંતિ કરાર સાથે જોડી દીધી હતી. ટ્રમ્પની આ માંગ બાદ પાકિસ્તાન સામે એક અત્યંત જટિલ પરિસ્થિતિ ઊભી થઈ ગઈ છે, કારણ કે પાકિસ્તાને તેના 78 વર્ષના ઈતિહાસમાં ક્યારેય ઈઝરાયેલને દેશ તરીકે માન્યતા આપી નથી.

આ જ કારણે પાકિસ્તાનના નાગરિકો પાકિસ્તાની પાસપોર્ટ (Passport) પર ઈઝરાયેલની યાત્રા કરી શકતા નથી. હવે ટ્રમ્પના આ જ પ્રસ્તાવને પાકિસ્તાનના રક્ષા મંત્રીએ સત્તાવાર રીતે ફગાવી દીધો છે.

પાકિસ્તાનના રક્ષા મંત્રી ખ્વાજા આસિફે ‘સમા ટીવી’ (Samaa TV) ને આપેલા એક ઈન્ટરવ્યુમાં ઈઝરાયેલ પર તીખો પ્રહાર કરતા ટ્રમ્પના પ્રસ્તાવને નકારી કાઢ્યો હતો.

રક્ષા મંત્રીએ સ્પષ્ટ શબ્દોમાં કહ્યું કે, “મારું માનવું છે કે આપણે એવા કોઈપણ કરાર (Accord) માં બિલકુલ સામેલ ન થવું જોઈએ જે આપણી મૂળભૂત વિચારધારાઓની વિરુદ્ધ જતો હોય. તમે ભલા એવા લોકો સાથે વાટાઘાટોની ટેબલ પર કેવી રીતે બેસી શકો, જેમના વચનો પર એક દિવસ માટે પણ ભરોસો ન કરી શકાય?”

ખ્વાજા આસિફે ઈઝરાયેલ પ્રત્યે પાકિસ્તાનના અભિગમમાં કોઈપણ પ્રકારના ફેરફારની શક્યતાને નકારવા માટે દેશની પાસપોર્ટ નીતિ (Passport policy) નો ખાસ હવાલો આપ્યો હતો. તેમણે ગર્વથી જણાવ્યું કે, આપણો એકમાત્ર એવો દેશ છે, જેના પાસપોર્ટ પર ઈઝરાયેલનું નામ પણ સામેલ કરવામાં આવ્યું નથી. અમારું આ બાબતે બહુ જ સ્પષ્ટ વલણ છે કે ઈઝરાયેલને સ્વીકારવું અમારા માટે સંપૂર્ણપણે અશક્ય છે.

અબ્રાહમ એકોર્ડ્સ મૂળભૂત રીતે વર્ષ 2020 માં ટ્રમ્પના પ્રથમ કાર્યકાળ દરમિયાન અમેરિકાની મધ્યસ્થતામાં ઈઝરાયેલ, સંયુક્ત આરબ અમીરાત (UAE) અને બહેરીન વચ્ચે શરૂ થયેલો એક કરાર હતો, જેમાં પાછળથી મોરોક્કો, સુદાન અને કઝાકિસ્તાન પણ જોડાયા હતા.

ટ્રમ્પની આ માંગ પાકિસ્તાન માટે ગળે ઉતારવી મુશ્કેલ સાબિત થઈ રહી હતી, કારણ કે જો પાકિસ્તાન ઈઝરાયેલને માન્યતા આપે તો તેને દેશની અંદર ભારે સ્થાનિક વિરોધ અને કટ્ટરપંથી ધાર્મિક સંગઠનોના પ્રચંડ ગુસ્સાનો સામનો કરવો પડે તેમ હતો.

પાકિસ્તાનનું હંમેશાથી એ જૂનું અને અડિખમ વલણ રહ્યું છે કે ઈઝરાયેલ સાથે સંબંધો સામાન્ય બનાવવાનું કોઈ પણ પગલું માત્ર ત્યારે જ ભરી શકાય, જ્યારે ઈઝરાયેલ વર્ષ 1967 પહેલાની સરહદોના આધારે સંપૂર્ણ સ્વતંત્ર ફિલિસ્ટિન (Palestine) રાજ્યના નિર્માણની મંજૂરી આપે. આ કડક વલણને કારણે પાકિસ્તાન હવે અખાતના દેશો વચ્ચે પણ અલગ-અલગ પડી જવાના સંકટમાં મુકાયું છે.