અમેરિકામાં હિન્દુ મંદિર પર ગોળીબારનું કાવતરું નિષ્ફળ, રાઇફલ જામ થતાં હુમલો અટક્યો

Hindu Temple Attack | અમેરિકાના ઇલિનોઇસ રાજ્યના ઓરોરા શહેરમાં આવેલા હિન્દુ મંદિર પર સામૂહિક ગોળીબાર કરવાની કથિત યોજનાનો પોલીસે પર્દાફાશ કર્યો છે.

આ કેસમાં 19 વર્ષીય એલેક્ઝાન્ડ્રોસ પાપોરાકિસની ધરપકડ કરવામાં આવી છે. તપાસકર્તાઓના જણાવ્યા અનુસાર, આરોપી ભારતીય મૂળના લોકોને નિશાન બનાવવાની યોજના ધરાવતો હતો.

જોકે, તેની રાઇફલમાં ખામી સર્જાતાં કથિત હુમલો આગળ વધી શક્યો નહોતો. આરોપીના એક સહકર્મચારીએ સમયસર પોલીસને જાણ કરતાં સંભવિત મોટી દુર્ઘટના ટળી હતી.

એનડીટીવીના અહેવાલ મુજબ, આરોપી અમેરિકાના પેલેટાઇન વિસ્તારમાં રહેતો હતો અને ટેકો બેલ રેસ્ટોરન્ટમાં કેશિયર તરીકે કામ કરતો હતો.

તપાસમાં સામે આવેલી માહિતી અનુસાર, તે રવિવારે તેની માતાના ઘરેથી ઓરોરા સ્થિત હિન્દુ મંદિર તરફ ગયો હતો. ત્યાં મોટી સંખ્યામાં ભારતીયોને નિશાન બનાવવાનો તેનો ઇરાદો હોવાની પોલીસને શંકા છે.

તપાસકર્તાઓ માને છે કે તેનું નિશાન દક્ષિણ-પશ્ચિમ ઓરોરામાં આવેલું સૌથી મોટું હિન્દુ મંદિર, શ્રી વેંકટેશ્વર સ્વામી (બાલાજી) મંદિર હોઈ શકે છે. જોકે, ચોક્કસ સ્થળ અંગે તપાસ ચાલુ છે.

અહેવાલ મુજબ, આરોપીએ કથિત રીતે ગોળીબાર કરવાનો પ્રયાસ કર્યો હતો, પરંતુ તેની રાઇફલ જામ થઈ જતાં તે ત્યાંથી નીકળી ગયો હતો. ત્યારબાદ તે ઘરે પાછો ફર્યો અને હથિયારની ખામી દૂર કરવાની રીત જાણવા માટે ઇન્ટરનેટ પર શોધખોળ કરી હતી.

આ દરમિયાન તેણે પોતાના સહકર્મચારીનો સંપર્ક કરીને ગોળીબાર કરવાની કથિત યોજના વિશે માહિતી આપી હતી. આરોપીએ અગાઉ સહકર્મચારીને રવિવારનો દિવસ ખાસ હોવાનું પણ જણાવ્યું હતું. બાદમાં હથિયાર જામ થતાં સ્થળ પરથી ઝડપથી નીકળી ગયાની વાત પણ કરી હતી.

આરોપીના નિવેદનો અને તેના વર્તન અંગે શંકા જતાં સહકર્મચારીએ પોલીસને જાણ કરી હતી. તપાસમાં મળેલી માહિતીના આધારે પોલીસે કાર્યવાહી હાથ ધરી અને આરોપીને ફરી મંદિર તરફ પહોંચે તે પહેલાં જ ઝડપી લીધો હતો. આ ઘટનામાં સહકર્મચારીની સતર્કતા મહત્વપૂર્ણ સાબિત થઈ હતી.

પોલીસે આરોપીના ઘરની તપાસ દરમિયાન બદલાવ કરેલી એઆર-શૈલીની રાઇફલ, આશરે 300 કારતૂસ, બોડી આર્મર, પેટ્રોલ ભરવાનાં કેન અને સ્વસ્તિકનાં ચિહ્નો સહિતની વસ્તુઓ મળી આવ્યાનું જણાવ્યું છે.

તપાસકર્તાઓને આરોપી દ્વારા લખવામાં આવેલું હોવાનું મનાતું એક ઘોષણાપત્ર પણ મળ્યું હતું. તેમાં જાતિવાદી વિચારો, હિંસા અને ભારતીયો સહિત વિવિધ સમુદાયો પ્રત્યે નફરત વ્યક્ત કરવામાં આવી હોવાનું પોલીસે જણાવ્યું છે.

પોલીસના જણાવ્યા અનુસાર, આરોપી ભારતીયો, યહૂદીઓ, આફ્રિકન અમેરિકનો અને અન્ય બિનશ્વેત સમુદાયોને લઈને નફરતભર્યા વિચારો ધરાવતો હોવાનો આક્ષેપ છે.

તે પોતાને શ્વેત સર્વોપરિતાવાદી અને નિયો-નાઝી વિચારધારાથી પ્રભાવિત ગણાવતો હોવાનું પણ તપાસમાં સામે આવ્યું છે. જોકે, આ તમામ બાબતો આરોપ સામેના આક્ષેપો અને તપાસમાં મળેલી માહિતી પર આધારિત છે.

આ કેસમાં આરોપી સામે આતંકવાદી ધમકી આપવાનો અને ગેરકાયદેસર રીતે હથિયાર રાખવાનો એક-એક આરોપ નોંધવામાં આવ્યો છે. પોલીસ તથા તપાસકર્તાઓ ઘટનાના તમામ પાસાંની તપાસ કરી રહ્યા છે.

બીજી તરફ, બાલાજી મંદિરના સંચાલકોએ જણાવ્યું છે કે તેઓ ઓરોરા પોલીસના સતત સંપર્કમાં છે. શ્રદ્ધાળુઓ, કર્મચારીઓ અને સ્વયંસેવકોની સુરક્ષાને પ્રાથમિકતા આપીને મંદિર ખાતે સુરક્ષા વધારવામાં આવી છે.

અહેવાલ મુજબ, સવારે 9થી રાત્રે 9 વાગ્યા સુધી સશસ્ત્ર સુરક્ષા વ્યવસ્થા વધારવા સહિતનાં પગલાં લેવામાં આવ્યાં છે, જેથી શ્રદ્ધાળુઓ સુરક્ષિત વાતાવરણમાં દર્શન કરી શકે.