ફ્લાયદુબઈ ફ્લાઇટમાં કો-પાઇલટે હુમલો કર્યા બાદ સર્જાયેલી અફરાતફરીનો નવો વિડિયો સામે આવ્યો

Flydubai Pilot Attack | દુબઈથી તેલ અવીવ જઈ રહેલી ફ્લાયદુબઈની ફ્લાઇટ FZ1073 માં હવામાં સર્જાયેલી કટોકટીનો એક નવો વિડિયો સામે આવ્યો છે. આ ઘટનામાં ભારતીય કેપ્ટન સ્મિત મછાર પર તેમના જ ઓમાની કો-પાઇલટે કૌકપિટમાં છરી વડે હુમલો કરી પ્લેન ક્રેશ કરવાનો પ્રયાસ કર્યો હતો.

હુમલામાં ગંભીર રીતે ઘવાયેલા અને લોહીલુહાણ હાલતમાં હોવા છતાં કેપ્ટન સ્મિતે અદ્ભુત સાહસ અને ત્વરિત બુદ્ધિ વાપરીને કૌકપિટનો દરવાજો ખોલી નાખ્યો હતો.

વિડિયોમાં જોઈ શકાય છે કે દરવાજો ખુલતા જ ફ્લાઇટમાં સવાર મુસાફરો અને ક્રૂ મેમ્બર્સ અંદર ધસી ગયા હતા અને હુમલાખોર કો-પાઇલટને કાબૂમાં લીધો હતો. આ દરમિયાન પ્લેનમાં ભારે અફરાતફરી મચી ગઈ હતી અને વિમાન ઝડપથી નીચે તરફ આવી રહ્યું હતું.

પ્લેનમાં મુસાફરી કરી રહેલા ફ્લાયદુબઈના 2 અન્ય ઓફ-ડ્યુટી પાઇલટોએ તરત જ કંટ્રોલ સંભાળી લીધો હતો અને સાઉદી અરેબિયાના તબૂક એરપોર્ટ પર પ્લેનનું સુરક્ષિત ઇમરજન્સી લેન્ડિંગ કરાવ્યું હતું. પ્લેનમાં 174 મુસાફરો સવાર હતા.

ઘટના બાદ કેપ્ટન સ્મિત મછારને તુરંત તબૂકની હોસ્પિટલમાં ખસેડવામાં આવ્યા હતા જ્યાં તેમની ઇમરજન્સી સર્જરી કરવામાં આવી હતી અને ત્યારબાદ વધુ સારવાર માટે તેમને દુબઈ એરલિફ્ટ કરાયા છે. વડાપ્રધાન નરેન્દ્ર મોદી સહિત વિશ્વભરના નેતાઓએ કેપ્ટન સ્મિતની બહાદુરીની પ્રશંસા કરી છે.