- શિવરાજપુર ભારતના બ્લૂ ફ્લેગ બીચની યાદીમાં સામેલ, સ્વચ્છ પાણી અને સ્કુબા ડાઇવિંગ માટે લોકપ્રિય સ્થળ
- VGRCના આયોજનથી શિવરાજપુર અને સ્થાનિક પ્રવાસન ક્ષેત્રના મહત્વને ઉજાગર કરવામાં આવશે
Shivrajpur Blue Flag Beach News | ગુજરાતના પ્રવાસન ક્ષેત્રમાં નોંધપાત્ર વૃદ્ધિ જોવા મળી રહી છે, જેમાં દ્વારકાથી 12 કિલોમીટર દૂર સ્થિત શિવરાજપુર દરિયાકિનારો આંતરરાષ્ટ્રીય સ્તરે પ્રવાસીઓ માટેનું મુખ્ય આકર્ષણ બની ગયો છે. વર્ષ 2023 અને 2024માં કુલ 13 લાખ 58 હજારથી વધુ પ્રવાસીઓ (2023માં 6,78,647 અને 2024માં 6,80,325) એ આ બીચની મુલાકાત લીધી છે, જે રાજ્યના આર્થિક વિકાસમાં મોટો ફાળો આપી રહ્યું છે અને સ્થાનિક રોજગારીને પ્રોત્સાહન આપી રહ્યું છે.
આ દરિયાકિનારાને 2020 માં બ્લૂ ફ્લેગ બીચ સર્ટિફિકેશન મળ્યું હતું, જે તેને ભારતના શ્રેષ્ઠ બીચની યાદીમાં સામેલ કરે છે. આ પ્રમાણપત્ર પાણીની ગુણવત્તા, પર્યાવરણની જાળવણી, સુરક્ષા અને સેવાઓ જેવા 32 માપદંડોના આધારે આપવામાં આવે છે. શિવરાજપુર બીચ સ્કુબા ડાઇવિંગ, બોટિંગ અને સ્કિઇંગ જેવી જળ રમતો માટે પણ લોકપ્રિય છે. આ સફળતા વડાપ્રધાન શ્રી નરેન્દ્ર મોદીની ‘દેખો અપના દેશ’ પહેલ સાથે સુસંગત છે, જે પાંચ શ્રેણીઓ હેઠળ સ્થાનિક પ્રવાસનને પ્રોત્સાહન આપવાનો ઉદ્દેશ્ય ધરાવે છે.
રાજ્ય સરકાર પ્રવાસન અને સ્થાનિક આર્થિક વિકાસને વધુ પ્રોત્સાહન આપવા માટે પગલાં લઈ રહી છે. ક્ષેત્ર વિશિષ્ટ રોકાણ આકર્ષવા માટે વાઇબ્રન્ટ ગુજરાત રિજનલ કૉન્ફરન્સ (VGRC) નું આયોજન કરવામાં આવી રહ્યું છે. તેની બીજી આવૃત્તિ 8-9 જાન્યુઆરીએ રાજકોટમાં કચ્છ અને સૌરાષ્ટ્ર વિસ્તાર પર કેન્દ્રિત થશે. આ કૉન્ફરન્સમાં શિવરાજપુર જેવા પ્રવાસન આકર્ષણોને ખાસ ઉજાગર કરવામાં આવશે, જે દર્શાવે છે કે આયોજનબદ્ધ વિકાસ દ્વારા રાજ્ય વિકસિત ગુજરાત@2047 તરફ આગળ વધી રહ્યું છે.
About The Author
