મહારાષ્ટ્રના મંત્રી રાધાકૃષ્ણ વિખે પાટીલની ભત્રીજી નીલા વિખે પાટીલ સ્વીડનની સંસદમાં ચૂંટાયા

Nila Vikhe Patil | મહારાષ્ટ્રના જાણીતા રાજકીય પરિવાર સાથે સંબંધ ધરાવતા અને ભારતીય મૂળના નીલા વિખે પાટીલે સ્વીડનની રાજનીતિમાં મોટો ઇતિહાસ રચ્યો છે.

41 વર્ષીય ગ્રીન પાર્ટીના નેતા નીલા વિખે પાટીલ સ્વીડનની સંસદ (Riksdag) માં સ્ટોકહોમ સિટી મતવિસ્તારમાંથી સભ્ય તરીકે ચૂંટાઇ આવ્યા છે.

સ્વીડનમાં તાજેતરમાં યોજાયેલી સંસદીય ચૂંટણીમાં ડાબેરી પક્ષોના વિરોધ પક્ષ મોરચાએ જીત મેળવી છે, જેના પગલે નીલા 349 સભ્યોવાળી સંસદમાં પહોંચ્યા છે.

નીલા વિખે પાટીલનો જન્મ સ્વીડનમાં થયો હતો, પરંતુ તેમણે તેમના બાળપણના પ્રારંભિક વર્ષો મહારાષ્ટ્રના અહેમદનગરમાં વિતાવ્યા હતા. તેઓ મહારાષ્ટ્રના અગ્રણી શિક્ષણવિદ્ અશોક વિખે પાટીલની પુત્રી છે.

આ ઉપરાંત, તેઓ ભૂતપૂર્વ કેન્દ્રીય મંત્રી બાળાસાહેબ વિખે પાટીલની પૌત્રી અને મહારાષ્ટ્રના કેબિનેટ મંત્રી રાધાકૃષ્ણ વિખે પાટીલની ભત્રીજી છે. તેમના પરદાદા વિઠ્ઠલરાવ વિખે પાટીલે એશિયાની પ્રથમ સહકારી ખાંડ કારખાનાની સ્થાપના કરી હતી.

ચૂંટાયા બાદ પોતાની ખુશી વ્યક્ત કરતા નીલાએ જણાવ્યું હતું કે સ્વીડનની 349 સભ્યોની સંસદનો હિસ્સો બનવું એ ગર્વની વાત છે અને તેઓ દેશ તથા શહેરના વિકાસ માટે યોગદાન આપવા આતુર છે.

તેમણે ઉમેર્યું કે તેઓ એવા લોકોનો અવાજ બનવા માંગે છે જેઓ મતદાન નથી કરી શકતા અને બાળકોના ઉજ્જવળ ભવિષ્ય તથા સ્વચ્છ પર્યાવરણ માટે કામ કરવા ઈચ્છે છે.

તેમણે પોતાના દાદા બાળાસાહેબ વિખે પાટીલને યાદ કરતા કહ્યું કે જ્યારે તેઓ 15 વર્ષના હતા ત્યારે દાદાએ તેમને રાજ્યનું બજેટ વંચાવ્યું હતું.

સ્વીડનની રાજનીતિમાં આશરે 25 વર્ષથી સક્રિય રહેલા નીલા અગાઉ સ્વીડનના વડા પ્રધાન કાર્યાલયમાં રાજકીય સલાહકાર તરીકે પણ સેવા આપી ચૂક્યા છે. તેમણે નાણાં, કર અને આવાસ જેવા મહત્ત્વપૂર્ણ વિભાગો સંભાળ્યા છે.

આ સિવાય તેઓ સ્ટોકહોમ સિટી કાઉન્સિલમાં પણ સભ્ય રહી ચૂક્યા છે. વિદેશમાં મોટી સફળતા મેળવવા છતાં નીલા આજે પણ ભારત સાથે પોતાનો ગાઢ નાતો ધરાવે છે અને ભારતીય સંસ્કૃતિ તથા મિત્રો સાથે જોડાયેલા હોવાનું ગર્વ અનુભવે છે.