Manav Shah Golf | વિશ્વની સૌથી પ્રતિષ્ઠિત અને કપરી ગણાતી ગોલ્ફ ટુર્નામેન્ટ (Golf tournament) ‘યુએસ ઓપન’ (US Open) માં આ વર્ષે એક અનોખો ઈતિહાસ રચાવા જઈ રહ્યો છે. આ પ્રતિષ્ઠિત સ્પર્ધામાં એક ગુજરાતી પરિવારનો 34 વર્ષીય ગોલ્ફર (Golfer) માનવ શાહ પણ રમતો જોવા મળશે.
માનવ શાહની આ પ્રથમ મેજર ટુર્નામેન્ટ (Major tournament) હશે, પરંતુ ગોલ્ફના આ સર્વોચ્ચ શિખર સુધી પહોંચવા માટેની તેની સફર સહેજ પણ આસાન રહી નથી. સામાન્ય રીતે વૈશ્વિક સ્તરના ખેલાડીઓ મોંઘી એકેડેમીમાં ટ્રેનિંગ લેતા હોય છે, જ્યારે માનવ શાહે સરકારી અને પબ્લિક ગોલ્ફ કોર્સ પર સખત સંઘર્ષ કરીને આ સફળતા મેળવી છે.
માનવ શાહનો જન્મ એક એવા પરંપરાગત ગુજરાતી પરિવારમાં થયો છે જ્યાં તબીબી વ્યવસાય (Medicine) ને જ કરિયરનો સર્વોત્તમ માર્ગ માનવામાં આવે છે. તેના પરિવારમાં મોટા ભાગના સભ્યો ડોક્ટર (Doctor) છે.
સ્વાભાવિક રીતે જ, પરિવારની ઈચ્છા હતી કે માનવ પણ મોટો થઈને ડોક્ટર બને અને લોકોની સેવા કરે. કેલિફોર્નિયા (California) ના બેકર્સફિલ્ડ (Bakersfield) માં જન્મેલા અને ઉછરેલા માનવ શાહે શરૂઆતમાં પરિવારના આ સપનાને માન આપ્યું હતું.
તેણે પ્રતિષ્ઠિત યુનિવર્સિટી ઓફ કેલિફોર્નિયા, લોસ એન્જલસ (UCLA) માં પ્રી-મેડ પ્રોગ્રામ (Pre-med program) માં એડમિશન (Admission) પણ લીધું હતું. જોકે, અભ્યાસ દરમિયાન જ તેને સમજાયું કે તેનું ભાવિ મેડિકલ લેબોરેટરીમાં નહીં, પરંતુ લીલાછમ ગોલ્ફ કોર્સ (Golf course) પર છે.
જ્યારે તેની સાથે ભણતા અન્ય વિદ્યાર્થીઓ મોડી રાત સુધી લાઈબ્રેરીઓમાં પુસ્તકો સાથે સમય વિતાવતા હતા, ત્યારે માનવ કલાકો સુધી મેદાન પર ગોલ્ફ સ્ટિક (Golf stick) સાથે પરસેવો પાડતો હતો.
પોતાના પેશન (Passion) ને ઓળખીને તેણે એક અત્યંત મુશ્કેલ નિર્ણય લીધો અને મેડિકલનો અભ્યાસ અધવચ્ચે જ છોડી દીધો. ત્યારબાદ તેણે યુનિવર્સિટીમાંથી પોલિટિકલ સાયન્સ અને ઈન્ટરનેશનલ રિલેશન્સ (Political Science and International Relations) માં બેચલર્સ ડિગ્રી (Bachelor’s degree) મેળવી અને પોતાનો સંપૂર્ણ સમય ગોલ્ફને આપવાનું નક્કી કર્યું. જોકે, આ નિર્ણય તેની લાઈફમાં લાંબા ગાળાની અનિશ્ચિતતા અને આર્થિક સંઘર્ષ લઈને આવ્યો હતો.
માનવ શાહની દાયકાઓ જૂની આકરી મહેનત અંતે રંગ લાવી, જ્યારે તેણે તાજેતરમાં ડલાસ એથ્લેટિક ક્લબ (Dallas Athletic Club) ખાતે યોજાયેલી અત્યંત કપરી 36-હોલ (36-hole) ની ફાઈનલ ક્વોલિફાઈંગ (Final qualifying) સ્પર્ધામાં ‘5-અંડર-પાર’ (5-under-par) નો શાનદાર સ્કોર નોંધાવ્યો હતો.
આ શાનદાર પ્રદર્શનની મદદથી તેણે ‘શિનેકોક હિલ્સ’ (Shinecock Hills) ખાતે યોજાનારી યુએસ ઓપનની મુખ્ય ટુર્નામેન્ટની ટિકિટ મેળવી લીધી છે.
અમેરિકામાં જન્મેલો અને ઉછરેલો હોવા છતાં માનવ શાહના મૂળ હંમેશાં ભારત (India) સાથે મજબૂતાઈથી જોડાયેલા રહ્યા છે. તેના પિતા ગુજરાત (Gujarat) ના છે અને તેની માતા મુંબઈ (Mumbai) ની છે. તે દર વર્ષે ભારતમાં રહેતા પોતાના દાદા-દાદીની મુલાકાત લેવા આવે છે.
તાજેતરમાં જ તેણે એશિયન ટૂર (Asian Tour) અને ભારતની ગોલ્ફ પ્રીમિયર લીગ (Golf Premier League) માં ભાગ લીધો હતો, જેણે તેને પોતાની સંસ્કૃતિની વધુ નજીક લાવવામાં મદદ કરી છે.
માનવના જણાવ્યા અનુસાર, આ ટૂર દરમિયાન અન્ય ભારતીય ગોલ્ફરો સાથે હિન્દી (Hindi) માં વાતચીત કરવાથી તેનો આત્મવિશ્વાસ ઘણો વધી ગયો હતો. આ સાંસ્કૃતિક જોડાણે જ તેને માનસિક બળ પૂરું પાડ્યું છે.
અત્યારે વૈશ્વિક ગોલ્ફ જગતમાં પીજીએ ટૂર (PGA Tour) અને લિવ ગોલ્ફ (LIV Golf) વચ્ચે ચાલી રહેલા વિવાદ અંગે પણ માનવે ચિંતા વ્યક્ત કરી હતી. સાઉદી અરેબિયાના પબ્લિક ઈન્વેસ્ટમેન્ટ ફંડ (PIF) દ્વારા 2026 ની સીઝન પછી લિવ ગોલ્ફનું ફંડિંગ બંધ કરવાની જાહેરાત કરાતા રમતમાં અનિશ્ચિતતા વધી છે.
આ અંગે માનવે જણાવ્યું કે, પ્રોફેશનલ ખેલાડીઓ માટે વૈશ્વિક સ્તરે ક્વોલિફાય થવાના માર્ગો ખુલ્લા રહેવા જોઈએ જેથી ઉભરતા ખેલાડીઓને સમાન તક મળી શકે.
હવે જ્યારે તે પોતાની પ્રથમ યુએસ ઓપનની તૈયારી કરી રહ્યો છે, ત્યારે તેનું માનવું છે કે આ મેગા ટુર્નામેન્ટ (Mega tournament) માં માત્ર ટેકનિકલ સ્કીલ્સ (Technical skills) કામ નથી આવતી, પરંતુ તમારું માનસિક મનોબળ (Mental toughness) સૌથી મોટો તફાવત ઊભો કરે છે. શારીરિક અને ભાવનાત્મક કસોટી કરતી આ વર્લ્ડ ક્લાસ (World class) સ્પર્ધામાં પોતાની માનસિક સ્થિતિને શાંત અને મજબૂત રાખવી એ જ તેનું એકમાત્ર લક્ષ્ય છે.