‘તેઓ વૃંદાવનમાં હોત…’ અમિતાભ સાથે 52 વર્ષની સફર કેવી રીતે ટકી? જયા બચ્ચને ખોલ્યા સિક્રેટ

જયા બચ્ચને ક્યારેય પોતાની વાત કહેવામાં ખચકાટ અનુભવ્યો નથી અને મૉજો સ્ટોરી પર તેમની તાજેતરની વાતચીત પણ અલગ નહોતી. પેઢીઓ સાથે સંબંધોમાં આવેલા ફેરફારો વિશે વાત કરતાં, આ અનુભવી અભિનેત્રીએ અમિતાભ બચ્ચન સાથેના તેમના દાયકાઓ જૂના લગ્ન વિશે એક રસપ્રદ ટિપ્પણી કરી — અહીં સુધી કે તેમણે એ પણ કહ્યું કે અમિતાભ બચ્ચન આને તેમના જીવનની ‘સૌથી મોટી ભૂલ’ કહી શકે છે.

તેમની આ વાત ઘણી સીધી અને સચોટ હતી. તેમણે જણાવ્યું કે તેઓ લગ્નને કેવી રીતે જુએ છે, 52 વર્ષોમાં તેમના પોતાના વિચારો કેવી રીતે બદલાયા છે, અને તે નથી ઈચ્છતી કે તેમની પૌત્રી નવ્યા નવેલી નંદા ઉતાવળમાં પગલું ભરે કે લગ્ન કરે.

અમિતાભ બચ્ચન સાથેના લગ્ન વિશે
જ્યારે તેમને પૂછવામાં આવ્યું કે શું અમિતાભ બચ્ચન લગ્ન વિશે વાત કરે છે, તો જયાએ જવાબ આપ્યો, ‘મેં તેમને પૂછ્યું નથી. હોઈ શકે કે તેઓ આને ‘મારા જીવનની સૌથી મોટી ભૂલ’ કહેતા હશે, પરંતુ હું તે સાંભળવા માંગતી નથી.’

અમિતાભના પ્રેમમાં તરત જ પડી ગઈ હતી
જયાએ એ પણ કહ્યું કે લગ્ન વિશેના તેમના હાલના વિચારો હોવા છતાં, તે અમિતાભના પ્રેમમાં તરત જ પડી ગઈ હતી. જ્યારે તેમને પૂછવામાં આવ્યું કે શું તેમને તે ક્ષણ યાદ છે જ્યારે તેમને પ્રેમ થયો હતો, તો તેમણે કહ્યું, ‘શું તમારે જૂના ઘાવને ખોતરવા પડે છે? હું છેલ્લા 52 વર્ષોથી એક જ માણસ સાથે પરણેલી છું. આનાથી વધુ પ્રેમ હું ન કરી શકું. જ્યારે હું કહીશ કે લગ્ન ન કરો, તો આ વાત જૂની લાગશે… આ પહેલી નજરે થયેલો પ્રેમ હતો.’

જયાએ સંબંધો પર ખુલીને વાત કરી
મૉજો સ્ટોરી માટે બરખા દત્ત સાથે તાજેતરમાં થયેલી વાતચીતમાં, જયા બચ્ચને તેમના સંબંધો પર ખુલ્લેઆમ વાત કરી અને સ્વીકાર્યું કે તે અને અમિતાભ એકબીજાથી ખૂબ જ અલગ છે. તેમના અલગ-અલગ સ્વભાવની મજાક ઉડાવતા તેમણે કહ્યું, ‘શું તમે કલ્પના કરી શકો છો કે જો મેં મારા જેવો જ કોઈ માણસ સાથે લગ્ન કર્યા હોત? તેઓ વૃંદાવનમાં હોત અને હું ક્યાંક બીજી જગ્યાએ હોત!’

અમિતાભ અને જયા ખૂબ જ અલગ
તેમણે તેમના મતભેદો વિશે કહ્યું, ‘તેઓ બોલતા નથી. મારી જેમ પોતાનો અભિપ્રાય વ્યક્ત કરવા માટે તેઓ સ્વતંત્ર નથી. તેઓ વાતો પોતાની પાસે જ રાખે છે, પરંતુ તેઓ જાણે છે કે સાચા સમયે, સાચી રીતે પોતાની વાત કેવી રીતે કહેવી – જે હું જાણતી નથી. તેમનું વ્યક્તિત્વ અલગ છે. કદાચ તેથી જ મેં તેમની સાથે લગ્ન કર્યા.’