Minab School Deadly Air Strike | ઈરાનના મિનાબમાં એક પ્રાથમિક શાળા પર થયેલા ભયાનક મિસાઈલ હુમલાએ વિશ્વભરમાં ચકચાર મચાવી છે. આ હુમલામાં 168 માસૂમ બાળકો સહિત કુલ 175 લોકોના મોત થયા છે. ઈરાને (Iran) આ નરસંહાર માટે સીધો જ અમેરિકન નૌસેનાના (US Navy) બે ઉચ્ચ અધિકારીઓને જવાબદાર ઠેરવ્યા છે અને તેમના ફોટા જાહેર કરીને તેમને ‘કાતિલ’ ગણાવ્યા છે.
અમેરિકન અધિકારીઓ પર ગંભીર આરોપ : ભારત, દક્ષિણ આફ્રિકા અને નાઇજીરિયામાં આવેલા ઈરાની દૂતાવાસોએ સોશિયલ મીડિયા પર અમેરિકન યુદ્ધ જહાજ USS સ્પ્રુઅન્સ (USS Spruance) ના બે અધિકારીઓના નામ જાહેર કર્યા છે. જેમાં કમાન્ડિંગ ઓફિસર Leigh R. Tate અને એક્ઝિક્યુટિવ ઓફિસર Jeffrey E. York સામેલ છે. ઈરાનનો દાવો છે કે આ બંનેએ જાણીજોઈને ત્રણ વાર ટોમહોક મિસાઈલ (Tomahawk Missile) છોડવાનો આદેશ આપ્યો હતો.
અમેરિકાનો બચાવ અને તપાસ : બીજી તરફ, અમેરિકાએ આ હુમલાને ‘ઈન્ટેલિજન્સ ફેલ્યોર’ (Intelligence Failure) ગણાવ્યો છે. ‘ધ ન્યૂયોર્ક ટાઈમ્સ’ના અહેવાલ મુજબ, જૂના નકશા અને ડેટાના કારણે મિસાઈલ સૈન્ય મથકને બદલે નજીકની શાળા પર પડી હતી. રાષ્ટ્રપતિ ડોનાલ્ડ ટ્રમ્પે (Donald Trump) આમાં ઈરાનની હથિયાર પ્રણાલીની ખામી હોવાની શંકા વ્યક્ત કરી છે, જ્યારે ઈરાને આને ઈરાદાપૂર્વક કરાયેલું ‘યુદ્ધ અપરાધ’ ગણાવ્યું છે. આ હુમલો 28 ફેબ્રુઆરીના રોજ થયો હતો, જેના કારણે સમગ્ર પશ્ચિમ એશિયામાં તણાવ ચરમસીમાએ પહોંચ્યો છે.