તેહરાન (Tehran): ઈરાન, ઇઝરાયેલ અને અમેરિકા વચ્ચે ચાલી રહેલા યુદ્ધ દરમિયાન કતારે ઈરાન સાથે એક એવી ગુપ્ત ડીલ (Deal) કરવાનો પ્રયાસ કર્યો હતો, જે આખી દુનિયાના ઉર્જા બજારને હચમચાવી શકે તેમ હતી.
વોશિંગ્ટન પોસ્ટ (Washington Post) ના એક રિપોર્ટ અનુસાર, જંગની શરૂઆતમાં કતારે ઈરાનનો સંપર્ક કર્યો હતો. કતાર ઈચ્છતું હતું કે ઈરાન તેના સૌથી મહત્વપૂર્ણ ઉર્જા કેન્દ્ર રસ લાફાન ગેસ કોમ્પ્લેક્સ (Ras Laffan Gas Complex) ને નિશાન ન બનાવે અને બદલામાં કતાર પોતાનું ગેસ ઉત્પાદન (Gas Production) અટકાવવા તૈયાર હતું.
વૈશ્વિક બજારને હચમચાવવાનો હતો પ્લાન
કતારનો પ્લાન એવો હતો કે જો ગેસ ઉત્પાદન બંધ થઈ જાય, તો આંતરરાષ્ટ્રીય બજારમાં ઉર્જાની કિંમતો આકાશે આંબી જશે. આનાથી અમેરિકા (America) અને ઇઝરાયેલ (Israel) પર યુદ્ધ રોકવા માટે ભારે દબાણ ઊભું થઈ શકત.
જો કે, ઈરાને આ પ્રસ્તાવને ઔપચારિક રીતે સ્વીકાર્યો નહીં. આ જંગ 28 ફેબ્રુઆરીએ શરૂ થઈ હતી જ્યારે અમેરિકા અને ઇઝરાયેલે ઈરાનના પરમાણુ અને બેલિસ્ટિક મિસાઇલ (Ballistic Missile) કાર્યક્રમો પર હવાઈ હુમલા કર્યા હતા. તેના જવાબમાં ઈરાને હોર્મુઝ સ્ટ્રેટ (Strait of Hormuz) માં નાકેબંધી કરી દીધી હતી, જેનાથી વિશ્વના 20 ટકા તેલના વેપારને અસર થઈ હતી.
કતારે તમામ આરોપોને નકારી કાઢ્યા
રિપોર્ટ (Report) મુજબ, 18 માર્ચે ઈરાને રસ લાફાન અને પર્સિયન ગલ્ફ (Persian Gulf) ના અન્ય ગેસ ક્ષેત્રો પર મિસાઈલ અને ડ્રોન હુમલા (Drone Attacks) કર્યા હતા.
કતારે યુદ્ધના ત્રીજા દિવસે જ આ પ્લાન્ટ બંધ કરી દીધો હતો અને એવો દાવો કર્યો હતો કે તેને હુમલામાં નુકસાન થયું છે, પરંતુ સેટેલાઇટ (Satellite) તસવીરોમાં કોઈ મોટું નુકસાન દેખાયું ન હતું.
બીજી તરફ, કતારના ઇન્ટરનેશનલ મીડિયા ઓફિસે (International Media Office) આ તમામ અહેવાલોને તદ્દન પાયાવિહોણા ગણાવ્યા છે અને સ્પષ્ટ કર્યું છે કે ઈરાન સાથે ઉર્જા ઉત્પાદનને લઈને આવો કોઈ સમન્વય કરવામાં આવ્યો ન હતો.
