ક્રૂડ ઓઈલના ભાવમાં મોટો ભડકો: અમેરિકા-ઈરાન મંત્રણા નિષ્ફળ જતાં ભાવ 100 ડોલરને પાર

વૈશ્વિક સ્તરે ફરી એકવાર આર્થિક સંકટના વાદળો ઘેરાયા છે. પાકિસ્તાનના (Pakistan) ઈસ્લામાબાદમાં (Islamabad) 21 કલાક ચાલેલી અમેરિકા (USA) અને ઈરાન (Iran) વચ્ચેની શાંતિ વાટાઘાટો અનિર્ણિત રહેતા તેની સીધી અસર કાચા તેલના બજાર પર પડી છે. મંત્રણા નિષ્ફળ ગયા બાદ ટ્રમ્પ (Trump) પ્રશાસન દ્વારા ઈરાની બંદરોની નાકેબંધી (Blockade) કરવાની જાહેરાત કરવામાં આવતા આંતરરાષ્ટ્રીય બજારમાં (International Market) ક્રૂડ ઓઈલના ભાવમાં અચાનક ઉછાળો આવ્યો છે.

ક્રૂડ ઓઈલમાં 8 ટકાનો તોતિંગ વધારો સોમવારે આંતરરાષ્ટ્રીય બજારમાં કાચા તેલના ભાવમાં 8 ટકાથી વધુનો ઉછાળો જોવા મળ્યો છે, જેના કારણે કિંમત ફરીથી 100 ડોલર (Dollar) પ્રતિ બેરલને પાર કરી ગઈ છે.

• WTI ક્રૂડ: 8 ટકાની તેજી સાથે 104.24 ડોલર પ્રતિ બેરલ.

• બ્રેન્ટ ક્રૂડ (Brent Crude): 7 ટકાના વધારા સાથે 102.29 ડોલર પર ટ્રેડ થઈ રહ્યું છે.

હોર્મુઝ સ્ટ્રેટ (Strait of Hormuz) પર સંકટ ઈસ્લામાબાદ મંત્રણા ફેઈલ થતા હોર્મુઝ સ્ટ્રેટમાં ટેન્શન વધી ગયું છે. આ રૂટ દુનિયાના 20 ટકા તેલ પુરવઠા (Oil Supply) માટે લાઈફલાઈન સમાન છે. સાઉદી અરેબિયા, ઈરાક અને યુએઈ (UAE) જેવા દેશો આ માર્ગ પર નિર્ભર છે. અમેરિકન સેન્ટ્રલ કમાન્ડ (CENTCOM) દ્વારા ઈરાની પોર્ટ્સની નાકેબંધી જાહેર કરાતા આ માર્ગ હવે જોખમમાં છે.

ટ્રમ્પનું આગામી પગલું: ‘બોમ્બિંગ ઓપરેશન’? રિપોર્ટ્સ મુજબ, રાષ્ટ્રપતિ ડોનાલ્ડ ટ્રમ્પ મંત્રણા નિષ્ફળ જતાં નારાજ છે. ‘વોલ સ્ટ્રીટ જર્નલ’ (Wall Street Journal) ના અહેવાલ મુજબ, ટ્રમ્પ હવે ઈરાન વિરુદ્ધ ફરીથી ‘બોમ્બિંગ ઓપરેશન’ શરૂ કરવા પર વિચાર કરી રહ્યા છે. અમેરિકા ઈરાન પર આર્થિક અને સૈન્ય દબાણ વધારવા માટે તમામ જહાજોને રોકવાની યોજના બનાવી રહ્યું છે.