રાજ્યના મુખ્યમંત્રી ભૂપેન્દ્ર પટેલે વલસાડ જિલ્લાના ધરમપુર સ્થિત પ્રમુખસ્વામી વોકેશનલ ટ્રેનિંગ સેન્ટર (PSVTC)ની મુલાકાત લીધી હતી. આ મુલાકાત પ્રમુખસ્વામી મહારાજની 104મી જન્મજયંતિ મહોત્સવની ઉજવણીનો ભાગ હતી.
BAPS સંસ્થા દ્વારા સંચાલિત PSVTC આદિવાસી વિસ્તારના યુવાનોને ઉદ્યોગ-લક્ષી તાલીમ અને ટેકનિકલ કૌશલ્ય પૂરા પાડીને આત્મનિર્ભર બનાવવામાં અગ્રણી ભૂમિકા ભજવે છે. સંસ્થાની કામગીરીની સમીક્ષા કર્યા બાદ મુખ્યમંત્રીએ એક ઐતિહાસિક જાહેરાત કરી હતી.
તેમણે PSVTC ને હવે PPP (પબ્લિક-પ્રાઇવેટ પાર્ટનરશિપ) મોડેલ હેઠળ સામેલ કરવાની ઘોષણા કરી. આ નિર્ણયથી સંસ્થાની તાલીમની ગુણવત્તા અને વ્યાપ વધારવામાં મદદ મળશે. આ પ્રસંગે તાલીમ પૂર્ણ કરનારા 1,000 થી વધુ સફળ વિદ્યાર્થીઓમાંથી પ્લેસમેન્ટ મેળવનારા યુવાનોને મુખ્યમંત્રીના હસ્તે નિમણૂકપત્રો એનાયત કરવામાં આવ્યા હતા.
