Chotila Highway Accident | સુરેન્દ્રનગર (Surendranagar) જિલ્લાના અમદાવાદ-રાજકોટ નેશનલ હાઈવે (National Highway) પર મોડી રાત્રે એક હૃદયદ્રાવક અકસ્માત સર્જાયો હતો. ચોટીલા (Chotila) તાલુકાના સાંગાણી (Sangani) ગામના પાટિયા પાસે અમદાવાદથી જૂનાગઢ તરફ જતી એક ખાનગી લક્ઝરી બસ (Luxury Bus) ડામર ભરેલા ટેન્કર (Tanker) સાથે ધડાકાભેર અથડાતા ભીષણ આગ ફાટી નીકળી હતી. આ ગોઝારી ઘટનામાં 4 મુસાફરો બસની અંદર જ જીવતા ભડથું થઈ ગયા હતા, જ્યારે 10 થી વધુ લોકો ગંભીર રીતે દાઝી જવાથી ઇજાગ્રસ્ત થયા છે.
અકસ્માતનું કારણ અને ઘટનાક્રમ આ ઘટના રાત્રે આશરે 1:30 વાગ્યાની આસપાસ બની હતી. હાઈવે પર જઈ રહેલા એક ડામર ભરેલા ટેન્કરનું અચાનક ટાયર ફાટ્યું હતું, જેના કારણે તેની ગતિ ધીમી પડી ગઈ હતી અથવા તે ઉભું રહી ગયું હતું. આ દરમિયાન પાછળથી પૂરઝડપે આવી રહેલી મધુરમ ટ્રાવેલ્સની ખાનગી બસ ટેન્કરના પાછળના ભાગે જોરદાર રીતે અથડાઈ હતી. અથડામણ એટલી પ્રચંડ હતી કે બસમાં તાત્કાલિક શોર્ટ સર્કિટ (Short Circuit) થયું હતું અને ડામર ઢોળાવાને કારણે આગે વિકરાળ સ્વરૂપ ધારણ કર્યું હતું.
મુસાફરોની વ્યથા અને બચાવ કામગીરી અકસ્માત સમયે મોટાભાગના મુસાફરો ગાઢ નિદ્રામાં હતા. આગ લાગતા જ બસમાં ચીસાચીસ મચી ગઈ હતી. જાગી ગયેલા કેટલાક મુસાફરોએ બારીના કાચ તોડીને બહાર કૂદકો માર્યો હતો, પરંતુ કમનસીબે કેટલાક મુસાફરો નીચે ઢોળાયેલા ગરમ ડામર પર પડ્યા હતા. ઘટનાસ્થળે હાજર પેટ્રોલ પંપના કર્મચારી અજય મેવાડા અને અન્ય સ્થાનિકોએ ફાયર એક્સટિંગ્યુશર (Fire Extinguisher) અને ધોકા વડે કાચ તોડીને આશરે 25 થી 30 લોકોના જીવ બચાવ્યા હતા.
BSF જવાનની બહાદુરી આ બસમાં મુસાફરી કરી રહેલા અને રજા પર આવેલા BSF જવાન નરેન્દ્રભાઈ રાઠોડે પોતે દાઝી ગયા હોવા છતાં અદમ્ય સાહસ બતાવી અન્ય મુસાફરોને બસમાંથી બહાર કાઢવામાં મદદ કરી હતી. હાલમાં તમામ ઇજાગ્રસ્તોને સારવાર અર્થે રાજકોટ (Rajkot) સિવિલ હોસ્પિટલ ખસેડવામાં આવ્યા છે.
તંત્રની કાર્યવાહી ચોટીલા SDM એચ.ટી. મકવાણાએ જણાવ્યું હતું કે, બસમાં ફસાયેલા 4 લોકો એવી સ્થિતિમાં હતા કે તેમને બહાર કાઢવા અશક્ય હતા, જેના કારણે તેઓ જીવતા સળગી ગયા હતા. મૃતકોમાં અમદાવાદથી જૂનાગઢ જઈ રહેલા વૃદ્ધ દંપતી જબ્બારભાઈ ખિંચી અને નસુબેન ખિંચીનો સમાવેશ થાય છે તેવી પ્રાથમિક માહિતી મળી છે. મૃતદેહો એટલી હદે સળગી ગયા છે કે તેમની ઓળખ માટે હવે DNA ટેસ્ટ (DNA Test) કરવો પડે તેવી સ્થિતિ છે. ફાયર બ્રિગેડની ટીમે ભારે જહેમત બાદ આગ પર કાબૂ મેળવ્યો હતો. હાલ પોલીસે ગુનો નોંધી વધુ તપાસ હાથ ધરી છે.