Badrinath Dham 2026: ભગવાન વિષ્ણુના પરમ ધામ બદ્રીનાથના કપાટ 23 એપ્રિલ 2026 ના રોજ વહેલી સવારે 6 વાગ્યે ભક્તો માટે ખોલી દેવામાં આવ્યા છે. વૈદિક મંત્રોચ્ચાર અને ભક્તિમય વાતાવરણ વચ્ચે આગામી 6 મહિના સુધી શ્રદ્ધાળુઓ અહીં દર્શન કરી શકશે. પરંતુ, આ પવિત્ર ધામ સાથે જોડાયેલા કેટલાક વિજ્ઞાનથી પર એવા રહસ્યો છે, જે આજે પણ શ્રદ્ધાળુઓ અને સંશોધકો માટે આશ્ચર્યનો વિષય છે.
અખંડ જ્યોતનું રહસ્ય : બદ્રીનાથ ધામનું સૌથી મોટું આશ્ચર્ય તેની ‘અખંડ જ્યોત’ છે. જ્યારે શિયાળામાં ભારે હિમવર્ષાને કારણે મંદિરના કપાટ બંધ કરવામાં આવે છે, ત્યારે ગર્ભગૃહમાં (Sanctum Sanctorum) ઘીનો એક મોટો દીવો પ્રજ્વલિત કરવામાં આવે છે. આશ્ચર્યની વાત એ છે કે, 6 મહિના બાદ જ્યારે મંદિર ફરી ખૂલે છે, ત્યારે આ જ્યોત તેટલી જ તેજસ્વી હાલતમાં જોવા મળે છે. માનવામાં આવે છે કે આ સમયગાળા દરમિયાન દેવતાઓ સ્વયં ભગવાનની પૂજા કરે છે.
શાંત વાતાવરણ અને જીવજંતુઓ: બદ્રીનાથ ધામની અન્ય એક ખાસિયત એ છે કે મંદિરની સીમામાં કૂતરાઓ ક્યારેય ભસતા નથી. કહેવાય છે કે નર-નારાયણ (Nar-Narayan) ના ધ્યાન ભંગ ન થાય તે માટે પ્રકૃતિ પણ અહીં મૌન પાળે છે. વળી, એવી પણ માન્યતા છે કે આ વિસ્તારના સાપ અને વીંછી ઝેર વગરના (Non-venomous) હોય છે અને કોઈને હાનિ પહોંચાડતા નથી. વિજ્ઞાન કદાચ આ વાતોને ન સ્વીકારે, પરંતુ કરોડો શ્રદ્ધાળુઓ માટે આ બદ્રીનાથની સાક્ષાત્ દિવ્યતા છે.