બ્રિટનમાં કાર રેસે માતા-દીકરીનો જીવ લીધો, ભારતીય મૂળના 2 યુવકોને કુલ 28 વર્ષની જેલ

UK car race | બ્રિટનમાં જાહેર રસ્તા પર પૂરઝડપે કાર ચલાવી રેસ લગાવવાના કારણે એક માતા અને તેની 4 વર્ષની દીકરીનાં મોત નીપજાવનારા ભારતીય મૂળના 2 યુવકોને કુલ 28 વર્ષની જેલની સજા ફટકારવામાં આવી છે.

ઇંગ્લેન્ડના લીડ્ઝ શહેરમાં બનેલી આ દુઃખદ ઘટનામાં હાર્દીપ ભાચુને 12 વર્ષ અને જસકમલ રિયાતને 16 વર્ષની જેલની સજા ફટકારવામાં આવી છે. બંનેને 6 વર્ષ સુધી વાહન ચલાવવા પર પ્રતિબંધ પણ મૂકવામાં આવ્યો છે.

આ ઘટના 16 જાન્યુઆરી, 2023ના રોજ સવારે આશરે 8:30 વાગ્યે લીડ્ઝના સ્કોટ હોલ રોડ પર બની હતી. 27 વર્ષીય જસ્ટિના હુલબોજ પોતાની 4 વર્ષની દીકરી લેના ચેપ્ચોર સાથે શાળાએ જઈ રહી હતી.

તે દરમિયાન હાર્દીપ ભાચુની સફેદ ઓડી ટીટી આરએસ કાર બેકાબૂ બનીને રસ્તા પરથી ફૂટપાથ પર ચડી ગઈ હતી અને માતા-દીકરીને અડફેટે લીધી હતી. ત્યારબાદ કાર નજીક આવેલી વર્ટુ જગુઆર લીડ્ઝ કાર ડીલરશિપની દીવાલ સાથે અથડાઈ હતી. આ અકસ્માતમાં માતા અને દીકરી બંનેનાં ઘટનાસ્થળે જ મોત નીપજ્યાં હતાં.

કોર્ટમાં રજૂ થયેલા સીસીટીવી અને ડેશકેમ ફૂટેજના આધારે તપાસમાં સામે આવ્યું હતું કે અકસ્માત પહેલાં હાર્દીપ ભાચુ પોતાની ઓડી કારમાં અને જસકમલ રિયાત કાળી બીએમડબલ્યુ એમ135આઈ કારમાં એકબીજા સાથે રેસ લગાવી રહ્યા હતા.

બંને એકબીજાને અગાઉથી ઓળખતા નહોતા. ટ્રાફિક સિગ્નલ પર બંનેની કાર નજીક આવી હતી અને ત્યાં તેમની વચ્ચે કારની શક્તિ અંગે વાતચીત થઈ હતી. ત્યારબાદ બંનેએ પૂરઝડપે વાહનો દોડાવવાનું શરૂ કર્યું હતું.

કોર્ટમાં જણાવાયું હતું કે અકસ્માત પહેલાં ઓડી કારની ઝડપ આશરે 89 માઇલ પ્રતિ કલાક (લગભગ 143 કિલોમીટર પ્રતિ કલાક) સુધી પહોંચી હતી, જ્યારે તે માર્ગ પર ઝડપ મર્યાદા 40 માઇલ પ્રતિ કલાક હતી અને આગળનો વિસ્તાર 30 માઇલ પ્રતિ કલાકની મર્યાદામાં આવતો હતો.

રિયાત પોતાની બીએમડબલ્યુમાં ભાચુની કારની પાછળ પૂરઝડપે આવી રહ્યો હતો. અકસ્માત પહેલાં તેણે પોતાના મોબાઇલ ફોનથી ઓડી કારનું વીડિયો રેકોર્ડિંગ પણ કર્યું હતું.

હાર્દીપ ભાચુએ જૂન 2024માં જોખમી રીતે વાહન ચલાવીને માતા-દીકરીનાં મોત નીપજાવવાના બંને આરોપો સ્વીકારી લીધા હતા. જ્યારે જસકમલ રિયાતે પોતાની સામેના આરોપોનો ઇનકાર કર્યો હતો. જોકે, ઓગસ્ટ 2026માં ટ્રાયલ બાદ તેને પણ બંનેનાં મોત માટે જવાબદાર ઠેરવી દોષિત જાહેર કરવામાં આવ્યો હતો.

લીડ્ઝ ક્રાઉન કોર્ટમાં 26 ઓક્ટોબર, 2026ના રોજ સજા સંભળાવવામાં આવી હતી. જજે બંનેને 12 અને 16 વર્ષની જેલની સજા ફટકારી હતી. સાથે જ બંને પર 6 વર્ષનો ડ્રાઇવિંગ પ્રતિબંધ મૂકાયો હતો અને ફરી વાહન ચલાવવા માટે વિસ્તૃત ડ્રાઇવિંગ ટેસ્ટ આપવાની શરત રાખવામાં આવી હતી.

સજા સંભળાવતી વખતે જજે સ્પષ્ટ શબ્દોમાં જણાવ્યું હતું કે જાહેર રસ્તો રેસિંગ ટ્રેક નથી અને શક્તિશાળી કાર હોવાનો અર્થ એ નથી કે રસ્તા પર તેની ઝડપની મર્યાદા ચકાસવામાં આવે. આ ઘટનાએ બેદરકારીપૂર્વકની હાઈસ્પીડ ડ્રાઇવિંગનાં ગંભીર પરિણામો ફરી એકવાર સામે લાવ્યાં છે.