“યુવા જાગૃત – દેશ જાગૃત, યુવા સુરક્ષિત – દેશ સુરક્ષિત”

સેવા સંકલ્પ અભિયાન અંતર્ગત 500 મેડિકલ કોલેજ વિદ્યાર્થીઓ અને નર્સિંગ સ્ટાફે માર્ગ સલામતી અગ્રદૂત તાલીમ મેળવી, નિઃશુલ્ક હેલ્મેટ પ્રાપ્ત કર્યા

વર્ષ 2047 સુધીમાં વિકસિત ભારત સાથે માર્ગ અકસ્માત મુક્ત રાષ્ટ્રના નિર્માણનો સંકલ્પ લો – સતીશ પટેલ, કમિશનર, ગુજરાત રોડ સેફ્ટી ઓથોરિટી

માર્ગ અકસ્માતોમાં થતા મૃત્યુમાં ભારતનું પ્રથમ સ્થાને રહેવું અત્યંત ચિંતાજનક – સાબરમતીના ધારાસભ્ય હર્ષદભાઈ પટેલ

વિશ્વના પ્રથમ આદર્શ વાહનચાલક દ્વારકાધીશ – ડૉ. વીરેન્દ્રસિંહ રાઠોડ, નાયબ પરિવહન કમિશનર (માર્ગ સલામતી), રાજસ્થાન

—————–

અમદાવાદ
તારીખ: 24 સપ્ટેમ્બર, 2026

સેવા સંકલ્પ અભિયાન: “સેવા મારું યોગદાન” પખવાડિયા હેઠળ ગુજરાત રોડ સેફ્ટી ઓથોરિટી તથા મોટર વાહન વિભાગ, ગુજરાતની પ્રેરણાથી આવાસ ફાઇનાન્સિયર્સ લિમિટેડ, રાજસ્થાન રોડ સેફ્ટી સોસાયટી અને સ્ટીલબર્ડના સંયુક્ત ઉપક્રમે, ગુજરાત મેડિકલ એજ્યુકેશન એન્ડ રિસર્ચ સોસાયટી (GMERS), મેડિકલ કોલેજ, સોલા સિવિલ હોસ્પિટલના સહયોગથી “આવાસ યુથ રોડ સેફ્ટી એજ્યુકેશન એન્ડ અવેરનેસ કેમ્પેઈન” અંતર્ગત માર્ગ સલામતી અગ્રદૂત તાલીમ તથા નિઃશુલ્ક હેલ્મેટ વિતરણ કાર્યક્રમ યોજાયો. આ કાર્યક્રમ સાબરમતીના ધારાસભ્ય હર્ષદભાઈ પટેલના મુખ્ય આતિથ્ય, નારણપુરાના ધારાસભ્ય જિતેન્દ્રકુમારની અધ્યક્ષતા તથા ગુજરાત રોડ સેફ્ટી ઓથોરિટીના કમિશનર સતીશ પટેલ અને આવાસ ફાઇનાન્સિયર્સ લિ.ના CSR સબ હેડ અમિત વ્યાસના વિશિષ્ટ આતિથ્યમાં યોજાયો.

તાલીમ બાદ 500 મેડિકલ વિદ્યાર્થીઓ અને નર્સિંગ કર્મીઓએ માર્ગ સલામતી અગ્રદૂત તરીકે દેશમાં સ્વચ્છ, સ્વસ્થ અને સુરક્ષિત માર્ગ સંસ્કૃતિ વિકસાવવાની તેમજ વર્ષ 2047 સુધીમાં માર્ગ અકસ્માત મુક્ત રાષ્ટ્રના નિર્માણની શપથ લીધી. આ શપથ કાર્યક્રમના અતિ વિશિષ્ટ અતિથિ, ગુજરાત રોડ સેફ્ટી ઓથોરિટીના કમિશનર સતીશ પટેલે લેવડાવી, સાથે જ “સુરક્ષિત માર્ગો – સમૃદ્ધ ભારત” બનાવવા અપીલ કરી. સાબરમતી અને નારણપુરાના ધારાસભ્યો સહિત તમામ મહેમાનોએ વિશેષ માર્ગ સલામતી સંદેશ લખેલા, સ્ટીલબર્ડ નિર્મિત હેલ્મેટનું વિતરણ કર્યું.

મુખ્ય મહેમાન ધારાસભ્ય હર્ષદભાઈ પટેલે આવાસ ફાઇનાન્સિયર્સ લિ.ની ટીમ, રાજસ્થાન રોડ સેફ્ટી સોસાયટીના અધ્યક્ષ ઋતુ ચૌહાણ તથા તેમની ટીમના પ્રોજેક્ટ કો-ઓર્ડિનેટર પી. સી. જૈનની, ગુજરાત રોડ સેફ્ટી ઓથોરિટી સાથે મળીને આ પ્રકારનું અભિયાન ચલાવી લોકોના જીવ બચાવવાના કાર્ય બદલ ભરપૂર પ્રશંસા કરી અને દેશમાં વધી રહેલા માર્ગ અકસ્માતોને અટકાવવા સૌને અપીલ કરી. તેમણે જણાવ્યું કે વડાપ્રધાન નરેન્દ્ર મોદીએ સ્વચ્છ ભારત અને સ્વસ્થ ભારત અભિયાન ચલાવી દેશને નવી દિશા આપી છે; હવે આપણે સૌએ સાથે મળીને સુરક્ષિત માર્ગો માટે “સુરક્ષિત ભારત” અભિયાનમાં જોડાઈ, માર્ગ સલામતી અગ્રદૂત બની માર્ગ અકસ્માત મુક્ત રાષ્ટ્રના નિર્માણ માટે આગળ આવવું જોઈએ.

કાર્યક્રમની અધ્યક્ષતા કરી રહેલા નારણપુરાના ધારાસભ્ય જિતેન્દ્રકુમારે આ અનોખા અભિયાન અને તાલીમ મોડ્યુલની પ્રશંસા કરી આભાર વ્યક્ત કર્યો. સૌને સંબોધતા તેમણે કહ્યું કે માર્ગ સલામતી પોતાના અને પરિવાર માટે અત્યંત જરૂરી છે. માર્ગ અકસ્માતોમાં સૌથી વધુ યુવાનોના મૃત્યુ થાય છે તે બાબત ચિંતાજનક ગણાવી તેમણે સૌને સલામતીની અપીલ કરી. તેમણે “માર્ગ સલામતી – જીવન રક્ષા” તથા “સર સલામત તો સબ સલામત” ના નારા પણ લગાવડાવ્યા.

મુખ્ય તાલીમકાર તરીકે રાષ્ટ્રીય માર્ગ સલામતી પુરસ્કારથી સન્માનિત તથા માર્ગ સલામતી ક્ષેત્રે ગોલ્ડ મેડલિસ્ટ, નાયબ પરિવહન કમિશનર (માર્ગ સલામતી), રાજસ્થાનના ડૉ. વીરેન્દ્રસિંહ રાઠોડે તાલીમ પહેલાં 10 પ્રશ્નોની પ્રશ્નોત્તરી આપી, માર્ગ સલામતી અગ્રદૂતો પાસેથી એક-એક પ્રશ્નના જવાબ પૂછ્યા. 90 ટકાથી વધુ લોકો સાચા જવાબ આપી શક્યા નહીં, ત્યારે ડૉ. રાઠોડે કહ્યું કે આપણા દેશના 99.99 ટકા માર્ગ વપરાશકર્તાઓને માર્ગના નિયમો અને વિનિયમોનું અધૂરું જ્ઞાન હોવાને કારણે વર્ષ 2006 થી માર્ગ અકસ્માતોમાં થતા મૃત્યુમાં દેશ પ્રથમ સ્થાને ચાલ્યો આવે છે. ડૉ. રાઠોડે ઘરેથી નીકળી સુરક્ષિત રીતે ઘરે પહોંચવા માટે પોતે તૈયાર કરેલા માર્ગ સલામતી ચક્ર તથા લખેલી માર્ગ સલામતી પોકેટ બુક દ્વારા ઉદાહરણો સાથે રસપ્રદ રીતે સમજાવ્યું. તેમણે રાહવીર યોજના હેઠળ રોકડ પુરસ્કાર અને પ્રશસ્તિ પત્ર મળવા અંગે જણાવી, અકસ્માતગ્રસ્તોની મદદ માટે આગળ આવવા અપીલ કરી. રાઠોડે સૌને આહ્વાન કર્યું કે ભારત વિશ્વના પ્રથમ આદર્શ વાહનચાલક ભગવાન કૃષ્ણ (દ્વારકાધીશ)ની જન્મભૂમિ છે. મહાભારત કાળમાં “રથ વિધિ” રૂપે વિશ્વમાં સૌ પ્રથમ બિન-મોટરચાલિત રથની ચાલક સંહિતા બની હતી, જેને આધાર બનાવી વિશ્વના અનેક દેશોએ મોટર વાહન કાયદા બનાવ્યા. તે જ દેશ છેલ્લાં 19 વર્ષથી વિશ્વમાં માર્ગ અકસ્માતોમાં મૃત્યુ પામનારાઓની સંખ્યામાં પ્રથમ ક્રમે છે. તેમણે 2047 સુધીમાં માર્ગ અકસ્માત મુક્ત રાષ્ટ્રના નિર્માણ માટે માર્ગ સલામતી સંબંધિત જરૂરી માહિતી આપી. સાથે જ તમામ વિદ્યાર્થીઓને માર્ગ સલામતી સંબંધિત વિવિધ જોગવાઈઓમાં ટ્રાફિક નિયમોનો ભંગ કરનારાઓ માટે રિફ્રેશર ટ્રેનિંગ અને સામુદાયિક સેવાની જોગવાઈઓ વિશે પણ માહિતગાર કર્યા.

કાર્યક્રમમાં ગુજરાત રોડ સેફ્ટી ઓથોરિટીના સંયુક્ત કમિશનર પ્રશાંત માંગુડાએ મહેમાનો અને તમામ અગ્રદૂતોનું સ્વાગત કરી અપીલ કરી. RTO અમદાવાદના બાલમુકુંદે જણાવ્યું કે આવા કાર્યક્રમો દ્વારા લોકોમાં જાગૃતિ લાવી માર્ગ અકસ્માતોમાં ઘટાડો લાવી શકાશે. સાથે જ જે વિદ્યાર્થીઓ દ્વિચક્રી વાહન લઈને કોલેજ આવે છે, તે સૌને હેલ્મેટ પહેરીને આવવાની અપીલ કરી.

કે. આર. વ્યાસ (CMO) અને સોલા સિવિલ હોસ્પિટલની ટીમે સૌનું સ્વાગત-સત્કાર કર્યું. આવાસ ફાઇનાન્સિયર્સ લિમિટેડના CSR સબ હેડ અમિત વ્યાસે હેલ્મેટની ઉપયોગિતા વિશે જણાવતા માર્ગ સલામતી ક્ષેત્રે ચાલી રહેલા કાર્યક્રમો વિશે વિગતવાર માહિતી આપી. તેમણે જણાવ્યું કે આ અભિયાન હેઠળ સોસાયટી મારફતે અત્યાર સુધીમાં 40 હજાર માર્ગ સલામતી અગ્રદૂત બનાવી વિશેષ માર્ગ સલામતી સંદેશ લખેલા હેલ્મેટનું વિતરણ કરવામાં આવ્યું છે. આવાસ ફાઇનાન્સિયર્સ લિ.ના ગુજરાત સ્ટેટ હેડ ચિરાગ ઠક્કરે આવાસના CSR હેઠળ થતી પ્રવૃત્તિઓ વિશે જણાવતા કહ્યું કે આવાસ સામાન્ય લોકોને સસ્તા વ્યાજદરે ઘર બનાવવામાં મદદ કરવાની સાથે તેમાં રહેનારની માર્ગ પરની સુરક્ષાને પણ પ્રાથમિકતા આપે છે, અને આવું અભિયાન રાજસ્થાન રોડ સેફ્ટી સોસાયટી સાથે મળીને છેલ્લાં 6 વર્ષથી ચલાવી રહી છે.

રાજસ્થાન રોડ સેફ્ટી સોસાયટીના પ્રોજેક્ટ કો-ઓર્ડિનેટર પી. સી. જૈને અભિયાન વિશે પ્રકાશ પાડતા જણાવ્યું કે સોસાયટી દ્વારા અત્યાર સુધીમાં લગભગ એક લાખ વીસ હજારથી વધુ લોકોને તાલીમ અને હેલ્મેટ આપીને માર્ગ સલામતી અગ્રદૂત બનાવવામાં આવ્યા છે અને 10 લાખ લોકોને માર્ગ સલામતી પ્રત્યે જાગૃત કરવામાં આવ્યા છે, જેનાથી ચોક્કસપણે માર્ગ અકસ્માતો ઘટી શકશે.

આ પ્રસંગે મંચ પર ડૉ. હિતેશ બ્રહ્મભટ્ટ (એડિશનલ ડિરેક્ટર, મેડિકલ સર્વિસીસ), ડૉ. પાર્થ જ્યાણી (સ્ટેટ મેડિકલ રિઈમ્બર્સમેન્ટ સેલ અધિકારી) અને વિવેક ટાંક (એડમિન, GMERS) ઉપસ્થિત રહ્યા. તે ઉપરાંત મોટર વાહન નિરીક્ષક યુ. કે. પટેલ, મોટર વાહન નિરીક્ષક સલમાન, નિવૃત્ત ARTO જે. એન. બારેવારિયા, અમિત જોષી સહિત મેડિકલ કોલેજના સ્ટાફ ઉપસ્થિત રહ્યા.

તમામને માર્ગ સલામતી પોકેટ બુક અને તાલીમ પ્રમાણપત્રો આપવામાં આવ્યા.

તમામ મહેમાનોને આવાસ ફાઇનાન્સિયર્સ લિમિટેડ તરફથી ઉપનિષદમાં લખાયેલા માર્ગ સલામતી શ્લોકવાળું સ્મૃતિ ચિહ્ન અર્પણ કરવામાં આવ્યું.