Andhra Pradesh student Accident In USA | અમેરિકાના ન્યુ જર્સી (New Jersey) માં બનેલા એક ગંભીર કાર અકસ્માતમાં આંધ્રપ્રદેશ (Andhra Pradesh)ના પાલનાડુ જિલ્લાના વિનુકોંડા મંડળની 27 વર્ષીય વિદ્યાર્થિની મક્કેના પ્રસન્ના (Makkena Prasanna) નું કરૂણ મોત નીપજ્યું છે.
ઉચ્ચ શિક્ષણ પૂર્ણ કરીને નોકરીની શોધમાં રહેલી યુવતીના અચાનક અવસાનથી તેના વતન ઉમ્માદીવરમ ગામમાં શોકનું મોજું ફરી વળ્યું છે.
મળતી વિગતો અનુસાર, ખેડૂત દંપતી મક્કેના વેંકટેશ્વરલુ અને ગોવિંદમ્માની મોટી પુત્રી પ્રસન્ના વર્ષ 2022માં માસ્ટર્સ (Master’s Degree) નો અભ્યાસ કરવા માટે USA ગઈ હતી. તાજેતરમાં જ અભ્યાસ પૂર્ણ કર્યા બાદ તે નોકરી શોધી રહી હતી.
મંગળવારે 14 જુલાઈના રોજ પ્રસન્ના તેના 3 મિત્રો સાથે એક કાર્યક્રમમાંથી ભાડાની કાર (Rented Car) માં પરત ફરી રહી હતી. તે સમયે કાર પરનું નિયંત્રણ ગુમાવતા વાહન રસ્તા કિનારે આવેલા એક ઝાડ સાથે જોરદાર રીતે અથડાયું હતું.
આ અકસ્માતમાં પ્રસન્નાનું ઘટનાસ્થળે જ મોત નીપજ્યું હતું, જ્યારે કારમાં સવાર તેના અન્ય ત્રણેય મિત્રો ગંભીર રીતે ઘાયલ થયા હતા. હાલ પ્રસન્નાના મૃદ્દેહને ન્યુ જર્સીની કુપર યુનિવર્સિટી હોસ્પિટલ (Cooper University Hospital) માં રાખવામાં આવ્યો છે.
આ દુઃખદ ઘટનાની જાણ થતાં જ વિનુકોંડાના ધારાસભ્ય અને આંધ્રપ્રદેશ સરકારના ચીફ વ્હિપ જી.વી. અંજનેયુલુએ (G.V. Anjaneyulu) પ્રસન્નાના પિતા સાથે ફોન પર વાત કરીને સાંત્વના પાઠવી હતી. તેમણે પરિવાહને ખાતરી આપી હતી કે તેઓ મૃદ્દેહને વહેલી તકે ભારત લાવવા માટે જરૂરી સત્તાવાળાઓ સાથે સંકલન કરશે.
આ ઉપરાંત, આંધ્રપ્રદેશ નોન-રેસિડન્ટ તેલુગુ સોસાયટી (APNRTS) એ પણ ઘટના પર દુઃખ વ્યક્ત કર્યું છે અને ભારતીય દૂતાવાસ (Indian Embassy) સાથે મૃદ્દેહને ભારત લાવવા (Repatriation) માટે જરૂરી કાનૂની અને પોસ્ટમોર્ટમ (Post-Mortem) ની પ્રક્રિયા ઝડપથી પૂર્ણ કરવા માટે સંકલન શરૂ કર્યું છે. શોકગ્રસ્ત પરિવારે સરકાર પાસે પાર્થિવ દેહને વતનમાં લાવવા માટે તાત્કાલિક મદદની ગુહાર લગાવી છે.
