Hakabha Gadhvi Accident | ગુજરાતના જાણીતા લોકસાહિત્યકાર અને હાસ્ય કલાકાર હકાભા ગઢવી (Hakabha Gadhvi) ની ફોર્ચ્યુનર કાર સુરેન્દ્રનગર (Surendranagar) જિલ્લાના ધ્રાંગધ્રા (Dhrangadhra) તાલુકાના બૈસાબગઢ પાસે એક નદીમાં ખાબકી હતી. આ અકસ્માત મોડી રાત્રે આશરે 1 વાગ્યે થયો હતો, જ્યારે હકાભા ગઢવી માતાજીના દર્શન કરીને પરત ફરી રહ્યા હતા.
રસ્તા પર અચાનક સાપ આવી જતાં તેને બચાવવાના પ્રયાસમાં ગાડીનું સ્ટેયરિંગ કાબૂ બહાર ગયું હતું અને કાર નદીના પાણીમાં ખાબકી હતી. ગાડી અડધી પાણીમાં ડૂબી જતાં અને પાણીનો ભરાવો થતાં કારના દરવાજા લોક થઈ ગયા હતા.
ઘટનાની જાણ થતાં જ આસપાસના સ્થાનિકો તાત્કાલિક સ્થળ પર પહોંચી ગયા હતા. કારમાં પાણી વધી રહ્યું હોવાથી છાતીસમા પાણીમાં ઉતરીને સ્થાનિક યુવકોએ ભારે જહેમત ઉઠાવી હતી. દરવાજા ન ખુલતાં બારીના કાચમાંથી હકાભા ગઢવી અને તેમના સાથીને મહામહેનતે સુરક્ષિત બહાર કાઢવામાં આવ્યા હતા.
આ અકસ્માતમાં હકાભા ગઢવીનો ચમત્કારિક બચાવ થયો છે. તેમને પગના ભાગે સામાન્ય ઈજાઓ થઈ હતી. ઘટના બાદ હકાભા ગઢવીએ પોતે સંપૂર્ણ સ્વસ્થ હોવાની માહિતી આપી હતી અને તેમનો જીવ બચાવનાર સ્થાનિક યુવકોનો આભાર માન્યો હતો. આ સમાચાર મળતાં જ તેમના ચાહકોએ રાહતનો શ્વાસ લીધો હતો.
