India US Relations | ભારત અને અમેરિકા (America) ના સંબંધો આગામી મહિનાઓમાં નવી ઊંચાઈઓને આંબી શકે છે. તેનું સૌથી મોટું કારણ રાષ્ટ્રપતિ ડોનાલ્ડ ટ્રમ્પ (Donald Trump) નો સંભવિત ભારત પ્રવાસ છે.
અમેરિકી વિદેશ મંત્રી માર્કો રુબિયો (Marco Rubio) અને રાષ્ટ્રપતિ ટ્રમ્પના નજીકના સહયોગી અને રાજદૂત સર્જિયો ગોરે (Sergio Gor) ભારત-અમેરિકા સંબંધોને લઈને કેટલાક મોટા સંકેતો આપ્યા છે. બંને નેતાઓનું કહેવું છે કે બંને દેશો વચ્ચે ટ્રેડ ડીલ (Trade Deal) લગભગ અંતિમ તબક્કામાં છે અને આગામી વર્ષની શરૂઆતમાં ટ્રમ્પના ભારત પ્રવાસની તૈયારીઓ ચાલી રહી છે.
વિદેશ મંત્રી માર્કો રુબિયોએ જણાવ્યું કે ભારત અને અમેરિકાના સંબંધો “ખૂબ જ મજબૂત” છે. તેમણે માહિતી આપી કે G7 સંમેલનમાં વડાપ્રધાન નરેન્દ્ર મોદી (Narendra Modi) અને રાષ્ટ્રપતિ ટ્રમ્પ વચ્ચે શાનદાર મુલાકાત થઈ હતી. બંને દેશો વચ્ચે વ્યાપાર કરારને અંતિમ ઓપ આપવાની દિશામાં ઝડપથી કામ ચાલી રહ્યું છે અને હવે વાતચીત છેલ્લા તબક્કામાં પહોંચી ગઈ છે.
રુબિયોએ આશા વ્યક્ત કરી કે આગામી વર્ષની શરૂઆતમાં રાષ્ટ્રપતિ ટ્રમ્પ ભારતની મુલાકાત લઈ શકે છે. તેમણે એમ પણ કહ્યું કે તેઓ પોતે પણ આ વર્ષના અંત સુધીમાં ભારત આવવાની યોજના બનાવી રહ્યા છે.
રુબિયોએ ભારતને અમેરિકાનો સૌથી નજીકનો ભાગીદાર ગણાવતા કહ્યું કે પીએમ મોદી અને રાષ્ટ્રપતિ ટ્રમ્પ વચ્ચેના વ્યક્તિગત સંબંધો બંને દેશોની ભાગીદારીને વધુ મજબૂત બનાવી રહ્યા છે. તેમના મતે બંને દેશોના હિતો વેપાર, સપ્લાય ચેઈન (Supply Chain), ક્રિટિકલ મિનરલ્સ (Critical Minerals), ઊર્જા સુરક્ષા (Energy Security), સંરક્ષણ સહયોગ (Defense Cooperation) અને દરિયાઈ માર્ગોની સુરક્ષા જેવા ઘણા મહત્વના ક્ષેત્રોમાં જોડાયેલા છે.
અમેરિકી રાજદૂત સર્જિયો ગોરે પણ ભારત-અમેરિકા સંબંધોને લઈને હકારાત્મક ચિત્ર રજૂ કર્યું હતું. તેમણે કહ્યું કે ફ્રાન્સ (France) માં મોદી-ટ્રમ્પની મુલાકાત ૧ કલાકથી વધુ સમય સુધી ચાલી હતી, જેમાં વેપાર, સંરક્ષણ અને વ્યૂહાત્મક મુદ્દાઓ પર વિગતવાર ચર્ચા થઈ હતી.
ટ્રેડ ડીલ અંગે સર્જિયો ગોરે કહ્યું કે હવે માત્ર કાનૂની પાસાઓને આખરી ઓપ આપવામાં આવી રહ્યો છે. તેમણે તાજેતરમાં દિલ્હીમાં અમેરિકી વ્યાપાર પ્રતિનિધિ અને કેન્દ્રીય વાણિજ્ય મંત્રી પીયૂષ ગોયલ (Piyush Goyal) સાથેની બેઠકોને ખૂબ જ સફળ ગણાવી હતી. ૧.૫ વર્ષથી ચાલી રહેલી વાતચીત હવે તેના અંતિમ તબક્કામાં છે.
સર્જિયો ગોરે એ પણ જણાવ્યું કે રાષ્ટ્રપતિ ટ્રમ્પ પોતે ભારત આવવા માટે ઉત્સાહિત છે. તાજેતરમાં ઓવલ ઓફિસ (Oval Office) માં ટ્રમ્પે તેમને પૂછ્યું હતું કે તેમનો ભારત પ્રવાસ ક્યારે થશે. ભારત-અમેરિકાની ભાગીદારી પર વાત કરતા સર્જિયો ગોરે કહ્યું કે આર્ટિફિશિયલ ઇન્ટેલિજન્સ (Artificial Intelligence), સેમિકન્ડક્ટર (Semiconductor), ડેટા સેન્ટર (Data Center), ઇન્ફોર્મેશન ટેકનોલોજી (Information Technology) અને ડિજિટલ ઇન્ફ્રાસ્ટ્રક્ચર જેવા ક્ષેત્રોમાં અપાર સંભાવનાઓ છે. અમેઝોન (Amazon), માઇક્રોસોફ્ટ (Microsoft), ગુગલ (Google) અને માઇક્રોન (Micron) જેવી મોટી અમેરિકી કંપનીઓ ભારતમાં સતત રોકાણ વધારી રહી છે.