બંગામાં ટીએમસીએ કોંગ્રેસ સાથે હાથ ન મિલાવી કરી ભૂલ? આટલી બેઠકો પર પડ્યો ફટકો

West Bengal Election |  પાંચ રાજ્યોની વિધાનસભા ચૂંટણીમાં કોંગ્રેસ (Congress) ભલે માત્ર કેરળમાં જીત મેળવી શકી હોય, પરંતુ પશ્ચિમ બંગાળ (West Bengal) ના પરિણામોએ સાબિત કરી દીધું છે કે તેના વિના ‘INDIA’ ગઠબંધનના સાથી પક્ષો માટે જીત મેળવવી આસાન નથી.

પશ્ચિમ બંગાળમાં ભાજપ વિરોધી મતોનું વિભાજન થવાના કારણે સત્તાધારી તૃણમૂલ કોંગ્રેસ (TMC) ને અંદાજે 3 ડઝન જેટલી બેઠકોનું મોટું નુકસાન વેઠવું પડ્યું છે.

ચૂંટણી પરિણામોના આંકડા દર્શાવે છે કે 1 ડઝનથી વધુ બેઠકો પર કોંગ્રેસે સીધી રીતે ટીએમસીની રમત બગાડી છે. વર્ષ 2021 ની ચૂંટણીમાં આમાંથી 10 બેઠકો ટીએમસી પાસે હતી. પરંતુ આ વખતે કોંગ્રેસને ટીએમસી અને ભાજપ (BJP) વચ્ચેની જીતના તફાવત (Margin) કરતાં પણ વધુ મતો મળ્યા છે.

આ ઉપરાંત ટીએમસીએ નોટા (NOTA) ના કારણે પણ 6 બેઠકો ગુમાવવી પડી છે. પશ્ચિમ બંગાળની કુલ 294 વિધાનસભા બેઠકોમાંથી ટીએમસીના ખાતામાં માત્ર 80 બેઠકો આવી છે, જ્યારે ભાજપે 207 બેઠકો પર પ્રચંડ વિજય મેળવ્યો છે. આ ચૂંટણીમાં કોંગ્રેસને 2 અને લેફ્ટ (Left) ને 1 બેઠક મળી છે.

બંગાળમાં આ વખતે ભાજપને મુસ્લિમ મતોના વિભાજનનો સીધો ફાયદો મળ્યો છે. મુર્શિદાબાદ, માલદા અને ઉત્તર દિનાજપુરની કુલ 43 બેઠકોમાંથી ભાજપે 20 બેઠકો પર જીત મેળવી છે. જ્યારે વર્ષ 2021 ની ચૂંટણીમાં આ મતદારો ટીએમસીના પક્ષમાં એકજૂથ હતા, જેના કારણે તે સમયે ટીએમસીને 35 બેઠકો અને ભાજપને માત્ર 8 બેઠકો મળી શકી હતી.

રાજકીય વિશ્લેષકોનું (Political Analysts) માનવું છે કે લેફ્ટ ફ્રન્ટ પાસે આજે પણ અંદાજે 7 ટકા જેટલી વોટ બેન્ક (Vote Bank) મજબૂત છે. મમતા બેનરજીએ જો સમય રહેતા આ સમીકરણ સમજી લીધું હોત, તો તેમણે કારમી હારનો સામનો ન કરવો પડત.

કોંગ્રેસના વરિષ્ઠ નેતાએ જણાવ્યું કે, હવે સમય આવી ગયો છે કે તમામ વિપક્ષી દળો ફરી એકવાર એકજૂથ થાય અને પ્રાદેશિક પક્ષોએ (Regional Parties) પણ જમીની હકીકત સમજવી પડશે.

વિપક્ષી મતો વહેંચાઈ જવાનો ફાયદો ભાજપને મળ્યો હોય તેવું આ પહેલીવાર નથી. વર્ષ 2022 ની ગુજરાત (Gujarat) અને 2025 ની દિલ્હી (Delhi) વિધાનસભા ચૂંટણીમાં પણ આવું જ વિભાજન જોવા મળ્યું હતું, જ્યાં આમ આદમી પાર્ટી (AAP) ના કારણે ગુજરાતમાં કોંગ્રેસને 39 બેઠકોનું ભારે નુકસાન થયું હતું.