મારુતિ સુઝુકીનો ગુજરાતમાં ડંકો: ₹4,960 કરોડના નવા પ્લાન્ટની જાહેરાત

Maruti Suzuki New Plant Gujarat | ગુજરાત ઔદ્યોગિક ક્ષેત્રે હરણફાળ ભરી રહ્યું છે તેનો વધુ એક મજબૂત પુરાવો સામે આવ્યો છે. દેશની સૌથી મોટી કાર ઉત્પાદક કંપની અને ઓટોમોબાઈલ જાયન્ટ (Automobile Giant) મારુતિ સુઝુકી ઈન્ડિયા લિમિટેડ (MSIL) એ ગુજરાતમાં પોતાના સામ્રાજ્યના વિસ્તરણની સત્તાવાર જાહેરાત કરી છે. કંપનીએ ગુજરાતમાં પોતાનો બીજો પ્લાન્ટ સ્થાપવા માટે જમીન ખરીદવા અને પ્રાથમિક પ્રવૃત્તિઓ માટે ₹4,960 કરોડના જંગી રોકાણ (Investment) ને મંજૂરી આપી દીધી છે.

બોર્ડ ઓફ ડિરેક્ટર્સનો મહત્વનો નિર્ણય

સ્ટોક એક્સચેન્જ (Stock Exchange) ને આપેલી માહિતી મુજબ, મારુતિ સુઝુકી (Maruti Suzuki)ના બોર્ડ ઓફ ડિરેક્ટર્સ (Board of Directors) ની બેઠકમાં આ ઐતિહાસિક નિર્ણય લેવાયો હતો. કંપની સાણંદ તાલુકાના ખોરાજ ગામ ખાતે આવેલા ઔદ્યોગિક વિકાસ નિગમ (GIDC) પાસેથી જમીન સંપાદિત કરશે. આ નવા પ્લાન્ટનો મુખ્ય ઉદ્દેશ્ય વાર્ષિક 10 લાખ (1 Million) યુનિટ્સની વધારાની ઉત્પાદન ક્ષમતા (Production Capacity) ઊભી કરવાનો છે.

ઉત્પાદન ક્ષમતામાં મોટો ઉછાળો

હાલમાં મારુતિ સુઝુકી (Maruti Suzuki) હરિયાણાના ગુરુગ્રામ, માનેસર, ખારખોડા અને ગુજરાતના હાંસલપુર ખાતે પ્લાન્ટ ધરાવે છે. કંપનીની હાલની કુલ વાર્ષિક ઉત્પાદન ક્ષમતા આશરે 2.6 મિલિયન યુનિટ છે. નવા પ્લાન્ટના નિર્માણ બાદ ગુજરાતમાં મારુતિની પકડ વધુ મજબૂત બનશે અને કુલ ઉત્પાદન આંક નવો ઇતિહાસ રચશે.

રોકાણ અને ફંડિંગની વિગત (Investment Details)

કુલ લક્ષ્ય: સુઝુકી મોટર કોર્પોરેશનના ચેરમેન તોશીહિરો સુઝુકીએ અગાઉ ₹35,000 કરોડના કુલ રોકાણની જાહેરાત કરી હતી.
પ્રથમ તબક્કો: હાલ મંજૂર થયેલા ₹4,960 કરોડ જમીન સંપાદન અને પ્રારંભિક કામગીરી માટે વપરાશે.
ફંડિંગ: આ પ્રોજેક્ટ માટેના ભંડોળની વ્યવસ્થા કંપનીના ‘આંતરિક ઉપાર્જન’ (Internal Accruals) અને જરૂર પડ્યે બાહ્ય ઉધાર (External Borrowing) દ્વારા કરવામાં આવશે.

ગુજરાતને શું ફાયદો થશે?

આ વિશાળ પ્રોજેક્ટથી ગુજરાતમાં ઓટોમોબાઈલ સેક્ટરમાં હજારો નવી રોજગારીની તકો (Employment Opportunities) સર્જાશે. આ સાથે જ પૂરક ઉદ્યોગો (Ancillary Industries) ને પણ વેગ મળશે, જે રાજ્યની અર્થવ્યવસ્થાને નવી ઊંચાઈ પર લઈ જશે.