ગ્રેટ સ્મોકી માઉન્ટેન્સમાં ગુમ થયેલા ટેક્સાસના હાઇકર સાહિલ જીલાની મૃત હાલતમાં મળી આવ્યા

Smoky Mountains Hiker | ટેક્સાસના 24 વર્ષીય હાઇકર સાહિલ જીલાનીનો ગ્રેટ સ્મોકી માઉન્ટેન્સ નેશનલ પાર્ક (Great Smoky Mountains National Park )માંથી દુઃખદ મૃતદેહ મળી આવ્યો છે.

સાહિલ જીલાની 5 ઓક્ટોબરે હાઇકિંગ દરમિયાન ગુમ થઈ ગયા હતા, ત્યારબાદ પરિવારજનો અને અધિકારીઓ દ્વારા તેમની શોધખોળ શરૂ કરવામાં આવી હતી. ત્રણ દિવસની ભારે શોધખોળ બાદ ડાઇવિંગ ટીમોએ એબ્રામ્સ ફોલ્સના પાણીમાંથી તેમનો મૃતદેહ બહાર કાઢ્યો હતો.

પરિવારના જણાવ્યા અનુસાર, સાહિલ જીલાની હાઇકિંગ દરમિયાન પાણીના શક્તિશાળી પ્રવાહ અને વમળમાં ફસાઈ ગયા હતા, જેના કારણે કથિત રીતે પાણીમાં ડૂબી જવાથી તેમનું મોત નીપજ્યું હતું.

ઘટનાના દિવસે તેમનું લોકેશન શેરિંગ બંધ થઈ ગયું હતું અને ફોનનો સંપર્ક ન થતાં પરિવારે ચિંતા વ્યક્ત કરી હતી. બાદમાં પાર્કિંગ લોટમાંથી તેમની કાર મળી આવી હતી અને નજીકથી તેમનો ફોન, ચાવીઓ તેમજ કપડાં મળી આવ્યા હતા.

પરિવારે જણાવ્યું હતું કે ઝરણાંની આસપાસ પાણીના અંડરકરન્ટ્સ ખૂબ જ ખતરનાક હોય છે, જે મજબૂત તરવૈયાઓને પણ પોતાની તરફ ખેંચી શકે છે. નેશનલ પાર્ક સર્વિસ દ્વારા પ્રવાસીઓને ચેતવણી આપવામાં આવી છે કે સુરક્ષાના નિયમોનું પાલન કરવું અનિવાર્ય છે.

સાહિલ જીલાની તાજેતરમાં જ કાકા બન્યા હતા અને તેઓ પોતાના પરિવારમાં ખૂબ જ લોકપ્રિય અને ઉત્સાહી યુવાન હતા. આ અચાનક બનેલી દુર્ઘટનાથી સમગ્ર પરિવારમાં શોકનું મોજું ફરી વળ્યું છે અને પરિવારજનો દ્વારા ઓનલાઈન ફંડ રેઈઝર દ્વારા આ દુઃખદ સમાચાર શેર કરવામાં આવ્યા છે. નેશનલ પાર્ક અધિકારીઓ દ્વારા આ મામલે વધુ તપાસ હાથ ધરવામાં આવી છે.