સુરત જિલ્લાના માંડવી તાલુકામાં આવેલા એક ગામના લોકોની લાંબા સમયની માગણીનો આખરે સુખદ અંત આવ્યો છે. ગામના અજીબોગરીબ નામને કારણે વર્ષોથી ક્ષોભજનક સ્થિતિનો સામનો કરી રહેલા ‘ચુડેલ’ ગામનું નામ હવે સત્તાવાર રીતે બદલીને ‘ચંદનપુર’ કરી દેવામાં આવ્યું છે.
કેન્દ્ર સરકારના ગૃહ મંત્રાલય (Ministry of Home Affairs) તરફથી લીલી ઝંડી મળ્યા બાદ, ગુજરાત સરકારના સામાન્ય વહીવટ વિભાગ (GAD) દ્વારા 7મી જુલાઇ, 2026ના રોજ આ અંગેનું સત્તાવાર જાહેરનામું (Official Notification) બહાર પાડવામાં આવ્યું છે.
આ સરકારી આદેશ અન્વયે તમામ સરકારી રેકોર્ડમાં (Government Records) જરૂરી સુધારા કરીને ગામનું નવું નામ દાખલ કરવા તાકીદ કરાઈ છે.
સરકારી દસ્તાવેજોમાં ગુજરાતીમાં ચંદનપુર, દેવનાગરીમાં चंदनपुर અને રોમનમાં CHANDANPUR લખવાનું રહેશે. ગામના સરપંચના જણાવ્યા અનુસાર, વર્ષ 2018થી ગ્રામ પંચાયત (Gram Panchayat) દ્વારા તાલુકા, જિલ્લા અને કલેક્ટર કચેરી (Collector Office) સ્તરે લેખિત રજૂઆતો કરાતી હતી.
આશરે 8 વર્ષની લાંબી વહીવટી પ્રક્રિયા (Administrative Process) અને સ્થાનિકોના સતત પ્રયાસો બાદ આ સફળતા મળી છે. અંદાજે 1200 લોકોની વસ્તી ધરાવતા આ ગામના લોકો બહાર નામ લેતા સંકોચ અનુભવતા હતા, પરંતુ હવે નવું નામ ‘ચંદનપુર’ થતાં ગ્રામજનોમાં ભારે આનંદનો માહોલ છે.
