સ્પેનમાં 5 લાખ બિનદસ્તાવેજીકૃત ઇમિગ્રન્ટ્સને મળશે કાયદેસર રહેઠાણ અને વર્ક પરમિટ

Spain Migrant Law | યુરોપિયન દેશ સ્પેન (Spain) દ્વારા ત્યાં રહેતા બિનદસ્તાવેજીકૃત વિદેશી નાગરિકો (Undocumented Migrants) ને કાયદેસર કરવા માટે એક નવો કાયદો અમલમાં મૂકવામાં આવ્યો છે. આ ઐતિહાસિક નિર્ણય હેઠળ, પાત્રતા ધરાવતા ઇમિગ્રન્ટ્સ કામચલાઉ રહેઠાણ (Residence Permit) અને વર્ક પરમિટ (Work Permit) મેળવી શકશે.

આ યોજના હેઠળ અરજી કરવાની પ્રક્રિયા શરૂ થઈ ગઈ છે અને તેની છેલ્લી તારીખ 30 June 2026 નક્કી કરવામાં આવી છે. સ્પેનિશ સરકારના આ સુધારાથી અંદાજે 500,000 (5 Lakh) લોકો પ્રભાવિત થવાની ધારણા છે જેઓ અત્યારે કોઈપણ કાયદેસરના દસ્તાવેજ વિના ત્યાં વસવાટ કરી રહ્યા છે.

આ યોજનાનો લાભ લેવા માટે અરજદારે કેટલીક ચોક્કસ પાત્રતા (Eligibility) પૂર્ણ કરવી પડશે. જે વિદેશી નાગરિકો 1 January 2026 પહેલા સ્પેન પહોંચ્યા હોય અને અરજી કરતા પહેલા ઓછામાં ઓછા 5 મહિના સુધી સતત ત્યાં રોકાયા હોય, તેઓ આ માટે લાયક ગણાશે.

આ ઉપરાંત, અરજદારની ઉંમર 18 વર્ષથી વધુ હોવી જોઈએ અને છેલ્લા 5 વર્ષનો તેમનો ક્રિમિનલ રેકોર્ડ (Criminal Record) એકદમ ક્લીન હોવો અનિવાર્ય છે. અરજદારે રોજગારનો પુરાવો અથવા ફેમિલી ટાઈઝ (Family Ties) જેવા માપદંડો પણ દર્શાવવા પડશે.

સફળ અરજદારોને શરૂઆતમાં 1 વર્ષની પરમિટ આપવામાં આવશે, જેને ભવિષ્યમાં લંબાવી પણ શકાશે. આ કાયદા હેઠળ બિનદસ્તાવેજીકૃત સ્થળાંતર કરનારાઓના બાળકોને પણ વિશેષ રાહત આપવામાં આવી છે.

સ્પેનમાં જન્મેલા બાળકો કોઈપણ જન્મતારીખના ભેદભાવ વિના ડિપેન્ડન્ટ રેસિડન્સ (Dependent Residence) માટે અરજી કરી શકશે. સરકારનું માનવું છે કે આ સુધારાથી દેશમાં શ્રમની અછત (Labour Shortage) દૂર થશે અને વૃદ્ધ થતી વસ્તીને કારણે ઊભા થયેલા ડેમોગ્રાફિક પડકારોનો સામનો કરવામાં મદદ મળશે. જોકે, વિપક્ષી પાર્ટીઓએ આ કાયદાને કોર્ટમાં પડકારવાની જાહેરાત કરી છે.