અમેરિકામાં 2024ની રાષ્ટ્રપતિ ચૂંટણીમાં ગેરકાયદે મતદાન કરનાર ભારતીય નાગરિક દોષિત

Illegal Voting | અમેરિકાની રાષ્ટ્રપતિ ચૂંટણીમાં ગેરકાયદે મતદાન કરવા અને અમેરિકી નાગરિક હોવાનો ખોટો દાવો કરીને મતદાર તરીકે નોંધણી કરાવવા બદલ એક ભારતીય નાગરિકને ફેડરલ જ્યુરીએ દોષિત ઠેરવ્યો છે. આ કેસમાં દોષિત ઠરેલા ખલવિંદર સિંહ ભેંગુરા અમેરિકામાં કાયદેસર કાયમી નિવાસી હતા, પરંતુ અમેરિકાના નાગરિક નહોતા.

29 ઓક્ટોબર 2026ના રોજ સામે આવેલી માહિતી અનુસાર, ટેક્સાસના ફોર્ટ વર્થમાં 27 ઓક્ટોબર 2026ના રોજ બે દિવસ ચાલેલી સુનાવણી બાદ જ્યુરીએ તેમને દોષિત જાહેર કર્યા હતા. આ સુનાવણી અમેરિકી જિલ્લા ન્યાયાધીશ માર્ક ટી. પિટમેન સમક્ષ યોજાઈ હતી.

અમેરિકાના ન્યાય વિભાગના જણાવ્યા અનુસાર, ભેંગુરાને 29 જૂન 2022ના રોજ કાયમી નિવાસીનો દરજ્જો મળ્યો હતો. સામાન્ય રીતે આ દરજ્જાને ગ્રીન કાર્ડ તરીકે ઓળખવામાં આવે છે. જોકે, તેઓ અમેરિકાના નાગરિક નહોતા અને તેમણે ક્યારેય અમેરિકી નાગરિકતા માટે અરજી પણ કરી નહોતી.

ફેડરલ સરકારી વકીલોના જણાવ્યા અનુસાર, 1 ઓગસ્ટ 2024ના રોજ ટેક્સાસના ટેરન્ટ કાઉન્ટીમાં ડ્રાઇવિંગ લાઇસન્સ માટે અરજી કરતી વખતે તેમણે પોતાને અમેરિકી નાગરિક દર્શાવ્યા હતા. અરજીમાં તેમણે અમેરિકી નાગરિક હોવાનો અને મતદાર તરીકે નોંધણી કરાવવાની ઇચ્છા દર્શાવતા વિકલ્પો પસંદ કર્યા હતા. તેના આધારે તેમની મતદાર તરીકે નોંધણી થઈ હતી.

ત્યારબાદ 5 નવેમ્બર 2024ના રોજ તેમણે ટેક્સાસના આર્લિંગ્ટન શહેરના ઈસ્ટ લાઇબ્રેરી એન્ડ રિક્રિએશન સેન્ટરમાં રૂબરૂ મતદાન કર્યું હતું. આ ચૂંટણીમાં રાષ્ટ્રપતિ, ઉપરાષ્ટ્રપતિ, અમેરિકી સેનેટ અને હાઉસ ઓફ રિપ્રેઝન્ટેટિવ્સની બેઠકો માટે મતદાન થયું હતું.

અમેરિકાના ફેડરલ કાયદા મુજબ કાયમી નિવાસીઓને ફેડરલ ચૂંટણીમાં મતદાન કરવાની મંજૂરી નથી. આ અધિકાર માત્ર અમેરિકી નાગરિકોને જ છે. જ્યુરીએ ભેંગુરાને બિનનાગરિક હોવા છતાં ફેડરલ ચૂંટણીમાં મતદાન કરવા અને મતદાર નોંધણી માટે અમેરિકી નાગરિક હોવાનો ખોટો દાવો કરવા એમ બે ગુનામાં દોષિત ઠેરવ્યા છે.

હવે તેમને 11 ફેબ્રુઆરી 2027ના રોજ સજા સંભળાવવામાં આવશે. અમેરિકી નાગરિક હોવાનો ખોટો દાવો કરવા બદલ તેમને મહત્તમ 5 વર્ષની જેલ અને 2,50,000 ડોલર સુધીના દંડની સજા થઈ શકે છે.

જ્યારે બિનનાગરિક તરીકે મતદાન કરવાના ગુનામાં મહત્તમ 1 વર્ષની જેલ અને 1,00,000 ડોલર સુધીના દંડની જોગવાઈ છે. આ ઉપરાંત જેલની સજા પૂર્ણ થયા બાદ તેમને અમેરિકામાંથી દેશનિકાલ કરવાની કાર્યવાહી પણ થઈ શકે છે.