UKનો સરકારી બિલાડો ‘લેરી’: 6 PM બદલાયા પણ 15 વર્ષથી ‘સત્તા’માં!

Larry the Cat | રાજકારણમાં નેતાઓ આવતા-જતા રહે છે, પણ યુનાઇટેડ કિંગડમ (UK) માં એક એવો શખ્સ છે જે છેલ્લા 15 વર્ષથી સત્તાના કેન્દ્ર ’10 ડાઉનિંગ સ્ટ્રીટ’ (10 Downing Street) માં સ્થિર છે. વાત થઈ રહી છે ‘લેરી’ (Larry) નામના બિલાડાની, જે બ્રિટિશ વડાપ્રધાનના સત્તાવાર નિવાસસ્થાનનો કાયમી સભ્ય બની ગયો છે. લેરી માત્ર એક પાલતુ પ્રાણી નથી, પણ બ્રિટનના ‘સોફ્ટ પાવર’ (Soft Power) નું પ્રતિક છે.

આશ્રયસ્થાનથી સત્તાના ગઢ સુધીની સફર: લેરીનો જન્મ 2007માં રસ્તા પર થયો હતો અને બાદમાં તેને લંડનના પ્રાણી આશ્રયસ્થાનમાં લઈ જવાયો હતો. 2011માં તત્કાલીન PM ડેવિડ કેમેરોને તેને દત્તક લીધો અને તે ’10 ડાઉનિંગ સ્ટ્રીટ’નો હિસ્સો બન્યો. લેરી એક ‘ગ્રે-એન્ડ-વ્હાઇટ ટેબી’ (Grey-and-white tabby) પ્રજાતિનો બિલાડો છે.

લેરીની સત્તાવાર ભૂમિકા: : લેરી પાસે ‘ચીફ માઉસર ટુ ધ કેબિનેટ ઓફિસ’ (Chief Mouser to the Cabinet Office) નું સત્તાવાર બિરુદ છે. તેનું મુખ્ય કામ સરકારી ઇમારતમાં ઉંદરોને પકડવાનું અને તેમને દૂર રાખવાનું છે. તે મોટેભાગે નિવાસસ્થાનના મુખ્ય દરવાજા પાસે ચોકી કરતો જોવા મળે છે. ખાસ વાત એ છે કે લેરીનો ખર્ચ જનતાના ટેક્સના પૈસાથી નહીં, પણ ત્યાંના સ્ટાફના ફાળાથી નીકળે છે.

15 વર્ષમાં 6 વડાપ્રધાનના સાક્ષી : બ્રિટિશ રાજકારણમાં ભારે ઉથલપાથલ વચ્ચે પણ લેરીની ખુરશી સલામત રહી છે. તેણે ડેવિડ કેમેરોનથી લઈને થેરેસા મે, બોરિસ જોન્સન, લિઝ ટ્રસ, ઋષિ સુનક અને હવે કીર સ્ટાર્મર સુધીના 6 વડાપ્રધાનોનો કાર્યકાળ જોયો છે.

વૈશ્વિક નેતાઓ સાથેનો અંદાજ : લેરીએ વિશ્વના અનેક દિગ્ગજ નેતાઓ સાથે મુલાકાત કરી છે. અમેરિકી પ્રમુખ બરાક ઓબામા (Barack Obama) તેને પસંદ હતા, જ્યારે 2019માં ડોનાલ્ડ ટ્રમ્પની મુલાકાત વખતે લેરી તેમની બખ્તરબંધ કાર ‘The Beast’ નીચે આરામ કરતો જોવા મળ્યો હતો.

સોશિયલ મીડિયા સ્ટાર : સોશિયલ મીડિયા પ્લેટફોર્મ X (ટ્વિટર) પર લેરીના 8.7 લાખથી વધુ ફોલોઅર્સ છે. ભલે તે હવે 18 વર્ષનો થઈ ગયો હોય અને તેની ઝડપ ઓછી થઈ હોય, પણ તેની લોકપ્રિયતા આજે પણ કોઈ મોટા નેતા કરતા ઓછી નથી. એકવાર તેને આળસના કારણે પદ પરથી હટાવાયો હતો, પણ તેની લોકપ્રિયતાને કારણે તેને ફરીથી ‘ચીફ માઉસર’ તરીકે નિયુક્ત કરવો પડ્યો હતો.