અમેરિકામાં પૂરના પાણીમાં કાર તણાઈ જતાં આંધ્રપ્રદેશના યુવાનનું કરુણ મોત

Indian Graduate Dies | અમેરિકાના (America) કેન્સાસ (Kansas) રાજ્યમાં ભારે વરસાદ અને પૂરના કારણે એક મોટી દુર્ઘટના સામે આવી છે. વેલિંગ્ટન (Wellington) નજીક આવેલા શક્તિશાળી પૂરના પાણીમાં કાર તણાઈ જવાથી આંધ્રપ્રદેશના (Andhra Pradesh) એક 33 વર્ષીય ભારતીય યુવાનનું મોત નીપજ્યું છે. સત્તાવાળાઓ દ્વારા આ ઘટના અંગે સત્તાવાર માહિતી આપવામાં આવી છે.

મૃતક યુવાનની ઓળખ દોપ્પાલપુડી વેંકટેશ (Doppalapudi Venkatesh) તરીકે થઈ છે. તે મૂળ આંધ્રપ્રદેશના બાપટલા (Bapatla) જિલ્લાના દેવરાપલ્લી ગામનો વતની હતો અને હાલમાં નેબ્રાસ્કાના (Nebraska) એલ્કહોર્ન (Elkhorn) ખાતે રહેતો હતો. વેંકટેશ ઉચ્ચ શિક્ષણ મેળવવા માટે યુનાઇટેડ સ્ટેટ્સ (United States) ગયો હતો અને માસ્ટર્સ ડિગ્રી (Master’s degree) પૂર્ણ કર્યા બાદ ત્યાં નોકરી કરતો હતો.

સમનર કાઉન્ટી શેરિફ ઓફિસના (Sumner County Sheriff’s Office) જણાવ્યા અનુસાર, આ અકસ્માત શનિવારે 27 જૂનના રોજ સમનર કાઉન્ટીમાં સર્જાયો હતો, જ્યાં અતિભારે વરસાદને કારણે સર્વત્ર પૂરની સ્થિતિ હતી.

એક પ્રત્યક્ષદર્શીએ વેંકટેશની કારને સાઉથ ઓલિવ રોડ (South Oliver Road) પર પૂરના પાણીમાં પ્રવેશતી જોઈ હતી. રસ્તા પર મુકેલા મલ્ટિપલ બેરિકેડ્સ (barricades) પસાર કર્યા પછી કાર હાઈડ્રોપ્લેન (hydroplaned) થઈને પૂરના ખાડામાં ખાબકી હતી. પાણીનો પ્રવાહ એટલો ઝડપી હતો કે તે કારને ઘસડીને બ્રિજ (bridge) સુધી લઈ ગયો હતો.

ઘટનાની જાણ થતાં જ વેલિંગ્ટન ફાયર ડિપાર્ટમેન્ટ (Fire Department), શેરિફ ઓફિસ અને કેન્સાસ હાઈવે પેટ્રોલની (Kansas Highway Patrol) એર યુનિટ તથા ડ્રોન (drone) ટીમો દ્વારા મોટું સર્ચ ઓપરેશન (search operation) શરૂ કરવામાં આવ્યું હતું.

જોકે, ખરાબ હવામાનને કારણે રાત્રે ઓપરેશન રોકવું પડ્યું હતું. બીજા દિવસે રવિવારે સવારે ફરી શોધખોળ શરૂ કરાતા વેંકટેશનો મૃતદેહ નદીના પ્રવાહમાંથી મળી આવ્યો હતો.

મિત્રો દ્વારા શરૂ કરાયેલા ફંડરેઝિંગ (fundraising) કેમ્પેઈન મુજબ, વેંકટેશ પોતાના પરિવારના સારા ભવિષ્ય માટે અમેરિકા આવ્યો હતો. તે હ્યુસ્ટનની (Houston) મુલાકાત લઈને ઓમાહા (Omaha) પરત ફરી રહ્યો હતો ત્યારે આ ફ્લેશ ફ્લડનો (flash flood) ભોગ બન્યો હતો. તે ઓપ્શનલ પ્રેક્ટિકલ ટ્રેનિંગ (OPT) પ્રોગ્રામ હેઠળ પોતાની કારકિર્દી બનાવી રહ્યો હતો.

સ્થાનિક ધારાસભ્ય એલુરી સાંબાસિવા રાવે પણ આ મામલે કેન્દ્ર સરકારને મદદ માટે અપીલ કરી હતી. હવે તેના મૃતદેહને ભારત પરત લાવવા (repatriate) માટે મિત્રો દ્વારા આર્થિક મદદ એકત્રિત કરવામાં આવી રહી છે.