પાકિસ્તાની પીએમના બીજિંગ પ્રવાસ બાદ ભારત-ચીન વચ્ચે મોટી બેઠક, LAC અને નદીઓ પર થઈ ચર્ચા

India China Meeting | પાકિસ્તાન (Pakistan) ના વડાપ્રધાન શહબાઝ શરીફનો બીજિંગ (Beijing) પ્રવાસ પૂર્ણ થતાંની સાથે જ ભારત અને ચીન વચ્ચે એક મહત્વપૂર્ણ બેઠક યોજાઈ છે. ચીનની રાજધાની બીજિંગમાં આયોજિત આ હાઈ-લેવલ મીટિંગ (High-Level Meeting) દરમિયાન પૂર્વ લદ્દાખમાં વાસ્તવિક નિયંત્રણ રેખા (LAC) ની સ્થિતિ પર રચનાત્મક અને ભવિષ્યના સકારાત્મક માહોલને લઈને વિસ્તૃત વાર્તાલાપ થયો હતો.

બંને પક્ષોએ સ્વીકાર્યું છે કે બોર્ડર (Border) પર શાંતિ અને સ્થિરતા જાળવી રાખવાથી જ દ્વિપક્ષીય સંબંધોને સામાન્ય બનાવવાની દિશામાં પ્રગતિ થઈ શકી છે. ભારતીય વિદેશ મંત્રાલય (MEA) ના જણાવ્યા અનુસાર, બીજિંગમાં WMCC ની 35મી બેઠક દરમિયાન ટ્રાન્સ બોર્ડર રિવર (Trans Border River) અને સરહદ સુરક્ષા સાથે જોડાયેલા અતિ મહત્વના મુદ્દાઓ પર ગંભીર ચર્ચા કરવામાં આવી હતી.

ભારતીય વિદેશ મંત્રાલયે આ વાર્તાના 1 દિવસ બાદ સત્તાવાર નિવેદન જાહેર કરીને જણાવ્યું કે, આ ચર્ચાઓ અત્યંત રચનાત્મક (Constructive) અને ભવિષ્યની સ્થિતિને ધ્યાનમાં રાખીને કરવામાં આવી હતી.

મંત્રાલયે કહ્યું કે બંને દેશોના પ્રતિનિધિઓએ ભારત-ચીન સરહદી વિસ્તારોની વર્તમાન સ્થિતિની ઊંડી સમીક્ષા કરી હતી. સરહદી વિસ્તારોમાં શાંતિ અને સૌહાર્દ જાળવી રાખવામાં મળેલી સફળતા અંગે બંને પક્ષોએ સંતોષ વ્યક્ત કર્યો હતો, જેનાથી દ્વિપક્ષીય સંબંધોના ક્રમિક સામાન્યીકરણની દિશામાં આગળ વધી શકાયું છે.

ભારત-ચીન સરહદ મામલાઓ પર પરામર્શ અને સમન્વય માટેના કાર્ય પદ્ધતિ (WMCC) ની આ 35મી બેઠક 27 મે ના રોજ બીજિંગમાં યોજાઈ હતી. જેમાં ભારતીય પ્રતિનિધિમંડળનું નેતૃત્વ સંયુક્ત સચિવ (પૂર્વ એશિયા) સુજીત ઘોષે કર્યું હતું, જ્યારે ચીની પ્રતિનિધિમંડળનું નેતૃત્વ વિદેશ મંત્રાલયના સરહદ અને મહાસાગર બાબતોના વિભાગના મહાનિર્દેશક હોઉ યાનકીએ કર્યું હતું.

આ મહત્વપૂર્ણ બેઠકમાં સરહદ વ્યવસ્થાપન, સંયુક્ત તંત્રનું નિર્માણ અને સરહદ પાર પરસ્પર સહયોગ સંબંધિત મુદ્દાઓ પર સકારાત્મક ચર્ચા થઈ હતી. ભારતીય પક્ષે સરહદ પારથી વહેતી નદીઓ (Cross-Border Rivers) ના મુદ્દે આગામી નિષ્ણાત-સ્તરની બેઠક વહેલી તકે યોજવા પર ખાસ ભાર મૂક્યો હતો.

આ ઉપરાંત, બંને દેશો રાજદ્વારી અને સૈન્ય સ્તરે (Military Level) નિયમિત સંપર્ક જાળવી રાખવા માટે સંમત થયા છે. આ પ્રક્રિયાના ભાગરૂપે બંને પક્ષો વિશેષ પ્રતિનિધિઓની આગામી બેઠક માટે નક્કર તૈયારી કરવા માટે સાથે મળીને કામ કરશે, જેનું આયોજન હવે પછી ચીનમાં થવાનું છે.

પ્રવાસ દરમિયાન ભારતીય પ્રતિનિધિઓએ ચીનના વિદેશ મંત્રાલયના એશિયન બાબતોના વિભાગના મહાનિર્દેશક લિયુ જિનસોંગ અને ચીનના સહાયક વિદેશ મંત્રી હોંગ લેઈ સાથે પણ સૌહાર્દપૂર્ણ મુલાકાત કરી હતી.

રસપ્રદ વાત એ છે કે, ભારત અને ચીન વચ્ચેની આ બેઠક પાકિસ્તાનના પીએમનો પ્રવાસ પૂરો થતાં જ યોજાઈ છે. પાકિસ્તાનના વડાપ્રધાન શહબાઝ શરીફ 26 મે સુધી ચીનના પ્રવાસે હતા, જ્યાં તેમણે ચીનના રાષ્ટ્રપતિ શી જિનપિંગ (Xi Jinping) સાથે મુલાકાત કરી હતી.

આ મુલાકાત બાદ ચીન અને પાકિસ્તાને સંયુક્ત નિવેદન (Joint Statement) જાહેર કરીને જમ્મુ-કાશ્મીરનો મુદ્દો ઉઠાવ્યો હતો, જેનાથી વિવાદ સર્જાયો હતો. જોકે, ભારતે આ કાશ્મીર મુદ્દા પર ચીન અને પાકિસ્તાનના વલણનો જડબાતોડ જવાબ આપતા બે ટૂંક શબ્દોમાં સ્પષ્ટ કરી દીધું હતું કે, જમ્મુ-કાશ્મીર ભારતનો આંતરિક ભાગ છે અને આ બાબતમાં કોઈપણ ત્રીજા દેશની દખલગીરી સહન કરવામાં આવશે નહીં.