India Military Spending SIPRI | વૈશ્વિક સ્તરે વધતા સૈન્ય તણાવ વચ્ચે ભારત હવે દુનિયાનો 5મો સૌથી મોટો લશ્કરી ખર્ચ (Military Spender) કરતો દેશ બની ગયો છે.
સ્ટોકહોમ ઈન્ટરનેશનલ પીસ રિસર્ચ ઈન્સ્ટિટ્યૂટ (SIPRI) ના વર્ષ 2025 ના તાજેતરના અહેવાલ મુજબ, ભારતે પોતાના સંરક્ષણ બજેટ (Defense Budget) માં 8.9% નો તોતિંગ વધારો કર્યો છે. આ વધારા સાથે ભારતનો કુલ સૈન્ય ખર્ચ 92.1 અબજ ડૉલર પર પહોંચી ગયો છે.
આ યાદીમાં અમેરિકા (USA) પ્રથમ સ્થાને છે, જ્યારે ચીન (China), રશિયા (Russia) અને જર્મની (Germany) અનુક્રમે બીજા, ત્રીજા અને ચોથા ક્રમે છે.
મે 2025 માં ભારત અને પાકિસ્તાન (Pakistan) વચ્ચે થયેલા ટૂંકા ગાળાના સંઘર્ષ બાદ ભારતે પોતાની સુરક્ષા વ્યવસ્થાને વધુ આધુનિક બનાવવાની દિશામાં મિસાઈલ (Missile), ડ્રોન (Drone) અને લડાકુ વિમાનો પાછળ ખર્ચ વધાર્યો છે.
બીજી તરફ, પાકિસ્તાને પણ તેના સૈન્ય ખર્ચમાં 11% નો વધારો કરીને 11.9 અબજ ડૉલર ખર્ચ્યા છે. ચીન સતત 31 મા વર્ષે પોતાનું બજેટ વધારીને 336 અબજ ડૉલર સુધી પહોંચ્યું છે.
સમગ્ર એશિયા-ઓશિનિયા (Asia-Oceania) વિસ્તારમાં સંરક્ષણ ખર્ચમાં 8.1% નો ઉછાળો જોવા મળ્યો છે, જે દર્શાવે છે કે વૈશ્વિક સ્તરે હથિયારોની હોડ વધી રહી છે. ભારત હવે માત્ર ગણતરીના ચાર દેશોથી પાછળ છે, જે દેશની વધતી જતી સૈન્ય તાકાત અને વૈશ્વિક પ્રભુત્વનો પુરાવો છે.
