ઇન્કમ ટેક્સ એક્ટમાં મોટો સુધારો: વિદેશી રોકાણકારો માટે સરકારી બોન્ડ્સ પરનો ટેક્સ સંપૂર્ણ માફ થશે

Income Tax Ordinance | ભારતીય બજારને વધુ મજબૂત કરવા અને વિદેશી રોકાણને આકર્ષિત કરવા માટે કેન્દ્રીય કેબિનેટે (Cabinet) એક બહુ મોટો નિર્ણય લીધો છે. સરકાર ઇન્કમ ટેક્સ એક્ટ (Income Tax Act) માં મોટો સુધારો કરવા જઈ રહી છે.

આ નવા બદલાવ હેઠળ, વિદેશી પોર્ટફોલિયો રોકાણકારો (FPIs) ને સરકારી બોન્ડ્સમાંથી થનારી કમાણી પર હવે કોઈ ટેક્સ ચૂકવવો નહીં પડે, એટલે કે ટેક્સ સંપૂર્ણપણે માફ કરવામાં આવશે. પીએમ મોદીની અધ્યક્ષતામાં મળેલી કેબિનેટ બેઠકમાં આ વટહુકમ (Ordinance) ને મંજૂરી આપવામાં આવી છે.

દેશમાં વિદેશી મૂડીના પ્રવાહને ઝડપી બનાવવા અને ઇરાન યુદ્ધના કારણે અર્થતંત્ર (Economy) પર પડી રહેલી નકારાત્મક અસરોને ઘટાડવા માટે કેન્દ્ર સરકારે આ મોટું પગલું ભર્યું છે. આ નવા નિર્ણય હેઠળ, સરકાર FPIs દ્વારા ભારતીય સરકારી જામીનગીરીઓ (Government Bonds) માં કરવામાં આવેલા રોકાણ પર લાગતા કેપિટલ ગેન્સ ટેક્સ (Capital Gains Tax) ને સંપૂર્ણપણે નાબૂદ કરવા જઈ રહી છે.

વર્તમાન ટેક્સ નિયમો અને બદલાવ

હાલના નિયમો પ્રમાણે, જો કોઈ વિદેશી રોકાણકાર 12 મહિનાથી વધુ સમય માટે બોન્ડ રાખે, તો તેમણે 12.5% લોન્ગ-ટર્મ કેપિટલ ગેન્સ (LTCG) ટેક્સ ભરવો પડતો હતો. આ સિવાય, સરકારી બોન્ડ્સમાંથી મળતા વ્યાજ પર પણ 20% વિથહોલ્ડિંગ ટેક્સ (Withholding Tax) ચૂકવવો પડતો હતો.

મિડલ ઈસ્ટના તણાવને લીધે ચાલુ વર્ષે વિદેશી રોકાણકારોએ ભારતીય બજારમાંથી આશરે ₹2.5 લાખ કરોડ જેવી મોટી રકમ પાછી ખેંચી લીધી હતી. હવે સરકારના આ મોટા નીતિગત ફેરફારને કારણે ભારતીય બોન્ડ માર્કેટમાં ફરીથી વિદેશી નાણાંનો પ્રવાહ વધવાની પૂરી આશા છે, જેનાથી ભારતીય રૂપિયા (Indian Rupee) ને પણ મજબૂતી મળશે.