ભારતીય એસ્સાર ગ્રુપ આયોવામાં રૂ. 1.25 લાખ કરોડના ખર્ચે યુએસના ઈતિહાસનો સૌથી મોટો સ્ટીલ પ્લાન્ટ બનાવશે

Essar Steel Iowa | અમેરિકાના પ્રમુખ ડોનાલ્ડ ટ્રમ્પે સોમવારે આયોવા (Iowa) રાજ્યમાં $15 Billion (આશરે રૂ. 1.25 લાખ કરોડ) ના વિરાટ ખર્ચે નવો સ્ટીલ ઉત્પાદન પ્લાન્ટ સ્થાપવાની ઐતિહાસિક યોજનાની જાહેરાત કરી છે.

ભારતીય બહુરાષ્ટ્રીય કંપની એસ્સાર ગ્રુપ (Essar Group) ના સંપૂર્ણ માલિકી ધરાવતી કંપની મેસાબી મેટાલિક્સ (Mesabi Metallics) દ્વારા આ પ્રોજેક્ટ વિકસાવવામાં આવશે.

વ્હાઇટ હાઉસના જણાવ્યા અનુસાર, આ અમેરિકાના ઈતિહાસમાં અત્યાર સુધીનો સૌથી મોટો સ્ટીલ મેન્યુફેક્ચરિંગ પ્લાન્ટ બની રહેશે.

આ પ્લાન્ટ દક્ષિણ-પૂર્વ આયોવાના લી કાઉન્ટી (Lee County) માં સ્થાપવામાં આવશે. કંપનીના અંદાજ મુજબ, 2030 માં આ પ્લાન્ટમાં વાણિજ્યિક ઉત્પાદન શરૂ થવાની અપેક્ષા છે અને તે પૂર્ણ ક્ષમતાએ વાર્ષિક 10 Million ટન સ્ટીલનું ઉત્પાદન કરશે.

ઓવલ ઓફિસ ખાતે કરવામાં આવેલી આ જાહેરાત પ્રસંગે મેસાબી મેટાલિક્સના ચેરમેન રેવંત રૂઇયા, પ્રશાંત રૂઇયા, આયોવાના ગવર્નર કિમ રેનોલ્ડ્સ અને વાણિજ્ય મંત્રી હોવર્ડ લુટનિક હાજર રહ્યા હતા.

આ મહાકાય પ્રોજેક્ટથી સ્થાનિક સ્તરે મોટો રોજગાર સર્જાશે. અંદાજ મુજબ આયોવામાં 1,750 કાયમી નોકરીઓ અને નિર્માણ કાર્ય દરમિયાન 5,000 થી 6,000 બાંધકામ ક્ષેત્રની નોકરીઓ ઊભી થશે.

આ પ્લાન્ટ માટે જરૂરી કાચો માલ એટલે કે આયર્ન ઓર (લોખંડની કાચી ધાતુ) મિનેસોટાના નેશવોક સ્થિત મેસાબી મેટાલિક્સની ખાણમાંથી પૂરો પાડવામાં આવશે, જ્યાં કંપનીએ અગાઉથી જ $2.5 Billion (આશરે રૂ. 21,000 કરોડ) નું રોકાણ કરેલું છે. આ રોકાણથી અમેરિકામાં ખાણકામથી લઈને સ્ટીલ ઉત્પાદન સુધીની એક સંપૂર્ણ સ્થાનિક સપ્લાય ચેઈન તૈયાર થશે.

ડોનાલ્ડ ટ્રમ્પે જણાવ્યું હતું કે તેમની સરકારે આયાતી સ્ટીલ પર લાદેલા 50% ટેરિફના કારણે વિદેશી કંપનીઓ અમેરિકામાં મેન્યુફેક્ચરિંગ ક્ષેત્રે મોટું રોકાણ કરવા પ્રોત્સાહિત થઈ છે.

1969 માં શશી અને રવિ રૂઇયા દ્વારા સ્થાપિત એસ્સાર ગ્રુપ ઉર્જા, ઈન્ફ્રાસ્ટ્રક્ચર, મેટલ્સ અને ટેકનોલોજી ક્ષેત્રે વૈશ્વિક સ્તરે મોટું નામ ધરાવે છે.

Cover photo credit: The White House.