ભારતીય મૂળના પ્રોફેસર હર્ષા ગંગાધરબતલા UNC હસમેન સ્કૂલ ઓફ જર્નાલિઝમના એન્ટરિમ ડીન બનાવાયા

Harsha Gangadharbatla Dean | અમેરિકાની પ્રતિષ્ઠિત યુનિવર્સિટી ઓફ નોર્થ કેરોલિના (University of North Carolina – UNC) ના પ્રોવોસ્ટ મેગ્નસ ઇગરસ્ટેડ દ્વારા 29 જુલાઈના રોજ એક મહત્વપૂર્ણ જાહેરાત કરવામાં આવી છે.

ભારતીય મૂળના શૈક્ષણિક વિદ્વાન હર્ષા ગંગાધરબતલા (Harsha Gangadharbatla) ને ‘UNC હસમેન સ્કૂલ ઓફ જર્નાલિઝમ એન્ડ મીડિયા’ (UNC Hussman School of Journalism and Media) ના એન્ટરિમ ડીન (Interim Dean) તરીકે નિમણૂક કરવામાં આવી છે.

હર્ષા ગંગાધરબતલા 1 ઓગસ્ટથી આ પદ સંભાળશે. તેઓ હાલમાં આ સ્કૂલના સેકન્ડ એસોસિએટ ડીન અને હ્યુ મોર્ટન ડિસ્ટિંગ્વિશ્ડ પ્રોફેસર (Hugh Morton Distinguished Professor) તરીકે સેવા આપી રહ્યા છે.

તેઓ રાઉલ રેઇસ (Raul Reis) નું સ્થાન લેશે, જેમણે 4 વર્ષ સુધી ડીન તરીકે સેવા આપ્યા બાદ સંશોધન અને શિક્ષણ પર ધ્યાન કેન્દ્રિત કરવા માટે રાજીનામું આપ્યું છે.

હર્ષા ગંગાધરબતલા ઉચ્ચ શિક્ષણ ક્ષેત્રે 10 વર્ષથી વધુનો વહીવટી અનુભવ (Administrative Experience) ધરાવે છે. UNC માં જોડાયા પહેલા તેમણે યુનિવર્સિટી ઓફ કોલોરાડો બોલ્ડર (University of Colorado Boulder) ખાતે કોલેજ ઓફ મીડિયા, કોમ્યુનિકેશન એન્ડ ઇન્ફર્મેશનની સ્થાપનામાં મહત્વની ભૂમિકા ભજવી હતી. તેઓ ‘અમેરિકન એકેડેમી ઓફ એડવર્ટાઇઝિંગ’ (American Academy of Advertising) ના પ્રમુખ પણ રહી ચૂક્યા છે.

તેમના શિક્ષણની વાત કરીએ તો, તેમણે ભારતની મોતીલાલ નેહરુ નેશનલ ઇન્સ્ટિટ્યૂટ ઓફ ટેકનોલોજી (MNNIT) માંથી ઇલેક્ટ્રિકલ એન્જિનિયરિંગમાં ગ્રેજ્યુએશન કર્યું છે. ત્યારબાદ તેમણે મિશિગન સ્ટેટ યુનિવર્સિટીમાંથી માસ્ટર્સ (Master’s Degree) અને યુનિવર્સિટી ઓફ ટેક્સાસ એટ ઓસ્ટિનમાંથી પીએચડી (PhD) ની ડિગ્રી મેળવી હતી.

તેમને શ્રેષ્ઠ શિક્ષણ અને ફેકલ્ટી કાર્ય માટે ‘ચાર્લ્સ એચ. સેન્ડેજ એવોર્ડ’ અને ‘વિલિયમ પેડન એવોર્ડ’ જેવા બહુમાનો મળેલા છે. યુનિવર્સિટી ટૂંક સમયમાં જ કાયમી ડીનની શોધ શરૂ કરશે.