ગુજરાતમાં હેલ્મેટ અને સીટબેલ્ટ ન પહેરવાના કારણે 2024માં 3,924 લોકોના મોત, રોડ સેફ્ટી રિપોર્ટમાં ચોંકાવનારો ખુલાસો!

Gujarat Accident Report | ગુજરાતમાં ટ્રાફિક નિયમોના (Traffic rules) ઉલ્લંઘનને કારણે માર્ગ અકસ્માતો (Road accidents) ચિંતાજનક રીતે વધી રહ્યા છે. ગુજરાત રોડ સેફ્ટી ઓથોરિટીના (Gujarat Road Safety Authority) તાજેતરના અહેવાલમાં વાહન ચાલકોની ઘોર બેદરકારીનો ખુલાસો થયો છે.

વર્ષ 2024 દરમિયાન રાજ્યમાં માત્ર હેલ્મેટ (Helmet) અને સીટ બેલ્ટ (Seat belt) ન પહેરવા જેવી ગંભીર લાપરવાહીના કારણે 3,924 લોકોએ પોતાના જીવ ગુમાવ્યા છે. માર્ગ સુરક્ષાના નિયમો પ્રત્યેની આ ઉદાસીનતા સીધી રીતે મોટા જોખમને આમંત્રણ આપી રહી છે.

રોડ સેફ્ટી રિપોર્ટના (Road Safety Report) આંકડા સ્પષ્ટ દર્શાવે છે કે, મોટાભાગના જીવલેણ અકસ્માતોમાં જો ચાલકોએ સુરક્ષાના સાધનોનો યોગ્ય ઉપયોગ કર્યો હોત, તો તેમનો કિંમતી જીવ બચાવી શકાયો હોત.

ખાસ કરીને ટુ-વ્હીલર (Two-wheeler) વાહન ચાલકોમાં હેલ્મેટ વિના ડ્રાઇવિંગ (Driving) કરવાનું ચલણ ખૂબ વધારે છે, જેના કારણે વર્ષ 2024 માં માત્ર હેલ્મેટ ન પહેરવાને લીધે 3,021 લોકો મૃત્યુ પામ્યા છે.

બીજી તરફ, ફોર-વ્હીલર (Four-wheeler) ચાલકોમાં સીટબેલ્ટ પ્રત્યે ભારે અરુચિ જોવા મળી રહી છે, જેના પરિણામે 903 વાહન ચાલકો અકસ્માત દરમિયાન કાળનો કોળિયો બન્યા છે.

ટ્રાફિક પોલીસ (Traffic Police) અને પરિવહન વિભાગ દ્વારા અવારનવાર દંડનીય કાર્યવાહી તેમજ જાગૃતિ અભિયાન (Awareness campaigns) ચલાવવામાં આવતા હોવા છતાં, વાહન ચાલકો પોતાની સુરક્ષાને ગંભીરતાથી લેતા નથી.

આ ચોંકાવનારા આંકડા સામે આવ્યા બાદ તંત્ર દ્વારા લોકોને અપીલ કરવામાં આવી છે કે હેલ્મેટ અને સીટબેલ્ટ એ માત્ર પોલીસના દંડથી (Fines) બચવા માટે નથી, પરંતુ તે અકસ્માત સમયે જીવન બચાવવા માટેનું સુરક્ષા કવચ (Safety shield) છે.

આ સ્થિતિને કાબૂમાં લેવા માટે હવે નિયમોનો ભંગ કરનારા બેજવાબદાર ચાલકો સામે પરિવહન વિભાગ વધુ કડક કાયદાકીય પગલાં લેવાની પૂરેપૂરી તૈયારી કરી રહ્યું છે.