ગુજરાતની પંચાયતો અને નગરપાલિકાઓનુ દેવું વધ્યું: પાણીનું કરોડોનું બિલ બાકી

Unpaid Water Dues | ગુજરાતની સ્થાનિક સ્વરાજ્યની સંસ્થાઓ હાલમાં મોટી આર્થિક કટોકટીનો સામનો કરી રહી છે.

રાજ્યમાં ગ્રામ પંચાયતો અને નગરપાલિકાઓ પર કરોડો રૂપિયાનું દેવું વધી ગયું છે. સરકાર દ્વારા નાગરિકોને પીવાનું પાણી પૂરું પાડવા માટે લાખો-કરોડો રૂપિયાનો ખર્ચ કરવામાં આવે છે, પરંતુ સ્થાનિક સંસ્થાઓ દ્વારા પાણી વેરાની સમયસર ચૂકવણી કરવામાં આવતી નથી.

નવા આંકડા મુજબ, માત્ર પંચાયતો દ્વારા જ પાણી વેરા પેટે 236 કરોડ રૂપિયા ચૂકવવાના બાકી છે.

રાજ્ય સરકારના પાણી પુરવઠા બોર્ડ દ્વારા ગામડાઓ અને શહેરોમાં નિયમિત ધોરણે નર્મદા અને અન્ય સ્ત્રોતોમાંથી પાણીનું વિતરણ કરવામાં આવે છે. પરંતુ, પંચાયતો અને નગરપાલિકાઓ લોકો પાસેથી પાણી વેરો વસૂલવામાં અથવા સરકારને તે ફંડ જમા કરાવવામાં નિષ્ફળ રહી છે.

પરિણામે, સ્થાનિક સ્વરાજ્યની સંસ્થાઓ સંપૂર્ણપણે દેવામાં ડૂબી ગઈ છે. આ બાકી બિલના કારણે ભવિષ્યના વિકાસ કાર્યોને પણ સીધી અસર થઈ રહી છે, કારણ કે સંસ્થાઓ પાસે ફંડનો મોટો અભાવ છે.

અધિકારીઓના જણાવ્યા અનુસાર, પાણી વેરા પેટે બાકી રહેલી 236 કરોડની રકમ ઘણી મોટી છે અને તેની સીધી અસર ગ્રામીણ વિકાસ તથા ઇન્ફ્રાસ્ટ્રક્ચર પ્રોજેક્ટ્સ પર પડે છે.

નગરપાલિકાઓની સ્થિતિ પણ સમાન છે, જ્યાં 40 કરોડથી વધુના પાણીના બિલ ચૂકવ્યા વિના પેન્ડિંગ છે. વારંવારની નોટિસ છતાં આ રકમ વસૂલવામાં વહીવટી તંત્રને મુશ્કેલી પડી રહી છે.

સરકારે અગાઉ પણ પંચાયતોને આર્થિક રીતે સક્ષમ બનાવવા અનેક ગ્રાન્ટ ફાળવી છે, છતાં જાળવણીના અભાવે આ દેવું ચિંતાજનક સ્તરે પહોંચ્યું છે.

સરકારે હવે તમામ અધિકારીઓને બાકી રકમની વસૂલાત માટે કડક આદેશ આપ્યા છે. જો આ રકમ સમયસર નહીં ચૂકવાય તો આગામી સમયમાં નવી યોજનાઓ લાગુ કરવામાં મુશ્કેલી સર્જાઈ શકે છે.