Mobile Recovery Gujarat | ટેલિકોમ વિભાગ (Department of Telecommunications) અને ગુજરાત પોલીસના સંયુક્ત પ્રયાસોથી ગુજરાત રાજ્યે મોબાઈલ હેન્ડસેટ રિકવરીમાં રાષ્ટ્રીય ફલક પર નોંધપાત્ર સિદ્ધિ હાંસલ કરી છે.
ભારત સરકારના ‘સંચાર સાથી’ (Sanchar Saathi) પોર્ટલ અને CEIR મોડ્યુલના અસરકારક ઉપયોગ દ્વારા ગુજરાત, દેશના મોટા રાજ્યોની યાદીમાં રિકવરીની ટકાવારીમાં 3 જો ક્રમ મેળવ્યો છે.
ગુજરાત પોલીસે 46.71 ટકાના રિકવરી રેટ (Recovery Rate) સાથે છેલ્લા એક વર્ષમાં 53,564 હેન્ડસેટ સફળતાપૂર્વક મૂળ માલિકને પરત કર્યા છે.
રાષ્ટ્રીય કક્ષાએ મોબાઈલ રિકવરીનો દર 32.6 ટકા છે, જેની સરખામણીએ ગુજરાત પોલીસનો દેખાવ અત્યંત પ્રભાવશાળી રહ્યો છે.
રાજ્યમાં મોબાઈલ રિકવરીમાં શ્રેષ્ઠ કામગીરી બદલ અમદાવાદ શહેર (Ahmedabad City), ડાંગ (Dang) અને ભાવનગર (Bhavnagar) જિલ્લાના નોડલ અધિકારીઓને રાજ્ય પોલીસ વડા (DGP) ડો. કે. એલ. એન. રાવ દ્વારા શીલ્ડ અને પ્રમાણપત્ર આપીને સન્માનિત કરાયા હતા.
વર્ષ 2025-26 ના ડેટા મુજબ CEIR રેન્કિંગમાં જિલ્લાવાર કામગીરીની વિગતો નીચે મુજબ છે:
અમદાવાદ શહેર: સૌથી વધુ 25,500 બ્લોક વિનંતીઓ (Block Requests) સામે 4,935 હેન્ડસેટ રિકવર કરીને 56.70 ના ફાઈનલ સ્કોર સાથે રાજ્યમાં પ્રથમ ક્રમે રહ્યું છે.
ડાંગ જિલ્લો: 328 બ્લોક વિનંતીઓ અને 77.33 ટકાના ઊંચા એક્યુરસી સ્કોર (Accuracy Score) સાથે 54.89 પોઈન્ટ્સ મેળવીને બીજા ક્રમે રહ્યો છે.
ભાવનગર જિલ્લો: 634 બ્લોક વિનંતીઓ સામે 273 મોબાઈલ રિકવર કરી 53.44 ના સ્કોર સાથે ત્રીજું સ્થાન મેળવ્યું છે.
સમગ્ર ભારતમાં અત્યાર સુધીમાં 50,48,516 મોબાઈલ બ્લોક કરવામાં આવ્યા છે, જેની સામે ગુજરાતમાં કુલ 1,83,985 હેન્ડસેટ બ્લોક (Blocked) કરવામાં આવ્યા છે.
આ પહેલનો મુખ્ય ઉદ્દેશ્ય રાષ્ટ્રીય સુરક્ષા (National Security) વધારવાનો, ચોરાયેલા હેન્ડસેટનો દુરુપયોગ રોકવાનો અને ટેલિકોમ સંબંધિત છેતરપિંડી (Fraud) પર અંકુશ મેળવવાનો છે. બ્લોક થયેલા 1,14,670 ટ્રેસ થયેલા હેન્ડસેટને શોધવામાં ગુજરાતના નોડલ અધિકારીઓએ મહત્વની ભૂમિકા ભજવી છે.
