સોના-ચાંદીના ભાવમાં ઐતિહાસિક કડાકો: ચાંદીમાં ₹12,700 અને સોનામાં ₹3,000થી વધુની પીછેહઠ

Gold Silver Price Drop | ભારતીય વાયદા બજાર (MCX) માં આજે એટલે કે 22 જાન્યુઆરી, 2026ના રોજ સોના અને ચાંદીના ભાવમાં મોટો ભૂકંપ જોવા મળ્યો છે. છેલ્લા ઘણા સમયથી રેકોર્ડ ઊંચાઈ પર ટ્રેડ (Trade) કરતી આ બંને કિંમતી ધાતુઓમાં ભારે નફારૂપી વેચવાલી (Profit Booking) ને કારણે રોકાણકારોમાં ફાળ પડી છે.

ચાંદીના ભાવમાં આજે ઐતિહાસિક ઘટાડો નોંધાયો છે. બુધવારે ₹3,18,492 પર બંધ થયેલી ચાંદી આજે કારોબાર દરમિયાન ગગડીને ₹3,05,753ની નીચી સપાટીએ પહોંચી હતી. આમ, એક જ દિવસમાં ચાંદીમાં ₹12,700થી વધુનો કડાકો (Crash) જોવા મળ્યો છે. હાલમાં બજારમાં ભારે વેચવાલીનું દબાણ જોવા મળી રહ્યું છે.

સોનાના ભાવમાં પણ મોટી નરમાઈ જોવા મળી છે. ગઈકાલના ₹1,52,862ના બંધ ભાવ સામે આજે સોનું ₹1,48,777 સુધી નીચે ઉતરી આવ્યું હતું. સોનામાં ₹3,200થી વધુનો ઘટાડો નોંધાતા તે ફરી ₹1.50 લાખની સપાટીની નીચે સરક્યું છે.

કેમ ભાવ ઘટ્યા?
બજારના નિષ્ણાતોના મતે, આંતરરાષ્ટ્રીય સ્તરે ભૂ-રાજકીય તણાવ (Geopolitical Tension) ઘટવાના સંકેતો મળતા રોકાણકારોએ સુરક્ષિત ગણાતા સોના-ચાંદીમાંથી નાણાં ખેંચવાનું શરૂ કર્યું છે. ખાસ કરીને અમેરિકા દ્વારા ટેરિફ (Tariff) મુદ્દે લેવાયેલા હકારાત્મક નિર્ણયોની સીધી અસર બુલિયન માર્કેટ (Bullion Market) પર જોવા મળી રહી છે.