Google Data Theft | ગૂગલના (Google) એક પૂર્વ સોફ્ટવેર એન્જિનિયર લિનવેઈ ડિંગ (Linwei Ding) પર કંપનીના અત્યંત ગુપ્ત આર્ટિફિશિયલ ઇન્ટેલિજન્સ (AI) ડેટાની ચોરી કરી ચીની કંપનીઓને આપવાનો ગંભીર આરોપ સાબિત થયો છે. અમેરિકાના સેન ફ્રાન્સિસ્કોની ફેડરલ જ્યુરીએ ડિંગને જાસૂસી અને ડેટા ચોરીના મામલામાં દોષિત જાહેર કર્યો છે.
શું હતી સમગ્ર ઘટના?
38 વર્ષીય ચીની નાગરિક લિનવેઈ ડિંગે ગૂગલમાં નોકરી કરતી વખતે ગુપ્ત રીતે બે ચીની ટેકનોલોજી કંપનીઓ માટે કામ કરવાનું શરૂ કર્યું હતું. તેણે ગૂગલના સુપરકોમ્પ્યુટિંગ ડેટા સેન્ટર (Data Center) ના હાર્ડવેર ઈન્ફ્રાસ્ટ્રક્ચર અને સોફ્ટવેર પ્લેટફોર્મ સાથે જોડાયેલી હજારો પાનાની ગોપનીય માહિતીની ચોરી કરી હતી.
ચોરી કરવામાં આવેલી વિગતો
અભિયોજન પક્ષના જણાવ્યા અનુસાર, ડિંગે ખાસ કરીને ચિપ બ્લૂપ્રિન્ટ્સ (Chip Blueprints) ચોર્યા હતા. આ બ્લૂપ્રિન્ટ્સ ગૂગલને તેના હરીફ માઈક્રોસોફ્ટ (Microsoft) અને એમેઝોન (Amazon) કરતા આગળ રાખવા માટે તેમજ Nvidia પરની નિર્ભરતા ઘટાડવા માટે તૈયાર કરવામાં આવી હતી. આ ડેટા ચીની કંપનીઓને મળવાથી વૈશ્વિક AI રેસમાં મોટું નુકસાન થઈ શકે છે.
15 વર્ષ સુધીની જેલની સજા
લિનવેઈ ડિંગ પર આર્થિક જાસૂસી (Economic Espionage) અને ટ્રેડ સિક્રેટની ચોરીના સાત-સાત કેસ નોંધાયા છે. જો તેને મહત્તમ સજા થાય, તો તેને 15 વર્ષની જેલ અને 5 મિલિયન ડોલર સુધીનો દંડ થઈ શકે છે. ગૂગલે આ મામલે તપાસ એજન્સીઓને પૂરો સહયોગ આપ્યો છે અને સુરક્ષા વ્યવસ્થા વધુ કડક કરી છે.