‘પપ્પા, તમે મારી જિંદગી બનાવી દીધી…’ દીકરીએ સંભળાવી ઓટો ડ્રાઈવર પિતાના સંઘર્ષની ભાવુક કહાની

આ હૃદયસ્પર્શી વીડિયો ઇન્સ્ટાગ્રામ (Instagram) પેજ ‘Growing with Artha’ દ્વારા શેર કરવામાં આવ્યો છે. વીડિયોમાં દીકરી લખે છે કે, “મારા પપ્પા છેલ્લા 35 વર્ષથી ઓટો ચલાવે છે. આજે પણ જ્યારે હું બેંગલુરુ (Bengaluru) થી ઘરે પાછી ફરું છું, ત્યારે તેઓ મને પોતાના ઓટોમાં બસ સ્ટેન્ડ (Bus Stand) પર લેવા અને મૂકવા આવે છે.”

લગ્ન માટે નહીં, દીકરીઓના ભણતર પાછળ ખર્ચ્યા પૈસા દીકરી આગળ જણાવે છે કે તેનું નર્સરી (Nursery) થી લઈને ડિગ્રી (Degree) સુધીનું શિક્ષણ પિતાની તૂટતી મહેનતની કમાણીથી જ પૂરું થયું છે.

તેમની આસપાસના ઘણા પરિવારો જ્યાં દીકરીઓના લગ્ન માટે પૈસા ભેગા કરી રહ્યા હતા, ત્યાં આ પિતાએ સમાજની પરવા કર્યા વિના દીકરીઓના હાયર એજ્યુકેશન (Higher Education) ને પ્રાથમિકતા આપી હતી.

જોકે, દીકરીના મતે પિતા તરફથી મળેલી સૌથી મોટી ભેટ માત્ર શિક્ષણ નહોતી. તે વીડિયો કેપ્શનમાં લખે છે કે, “તેમણે અમને આત્મનિર્ભર (Self-reliant) બનતા શીખવ્યું. તેમણે ક્યારેય અમને એવો અહેસાસ થવા ન દીધો કે દીકરીઓ હોવાને કારણે અમે કંઈ ન કરી શકીએ.

તેમણે અમારા પર પૂરો ભરોસો રાખ્યો, અમને એકલા મુસાફરી કરવા દીધી, પોતાના નિર્ણયો લેવાની આઝાદી (Freedom) આપી અને આત્મવિશ્વાસ સાથે જીવતા શીખવ્યું.”

કોરોનામાં શરૂ કર્યો ફાર્મ, આજે પિતા જ સંભાળે છે બધું આજે બંને બહેનો પોતપોતાની કરિયર (Career) માં ખૂબ જ સફળ છે. કોરોના મહામારી (Corona Pandemic) દરમિયાન બંને બહેનોએ માતા-પિતા માટે એક ફાર્મ (Farm) શરૂ કરીને આપ્યું હતું, જેને હવે તેમના પિતા પૂરા સમર્પણ સાથે સંભાળી રહ્યા છે.

દીકરી જ્યારે માતા બની ત્યારે પિતાએ ફરી નિભાવી જવાબદારી દીકરીએ પોતાના જીવનની વધુ એક ઈમોશનલ (Emotional) ક્ષણ શેર કરી છે. માતા બન્યા પછી તે નોકરી છોડવા અંગે ભારે મૂંઝવણમાં હતી. તે સમયે તેના પિતા તેની વહારે આવ્યા અને કહ્યું, “અમે તારા બાળકને ઉછેરવામાં મદદ કરીશું, તું તારી નોકરી (Job) બિલકુલ ન છોડતી.” ત્યારબાદ તેમણે પોતાની પત્ની એટલે કે દીકરીની માતાને બેંગલુરુ મોકલી દીધી, જેથી તે પોતાની દોહિત્રીની સંભાળ રાખી શકે.

જ્યારે માતા બેંગલુરુમાં રહે છે, ત્યારે ગામડે પિતા એકલા હાથે આખું ઘર સંભાળે છે. તેઓ રેશનની દુકાન (Ration Shop) ચલાવે છે, ખેતીની સંભાળ રાખે છે, જાતે રસોઈ બનાવે છે, ઘરકામ કરે છે અને દિવસ દરમિયાન ઓટો પણ ચલાવે છે. વીડિયોના અંતમાં દીકરી લખે છે, “હવે મને સમજાયું છે કે માતા-પિતાની સૌથી મોટી ભેટ પૈસા નથી, પરંતુ બાળકોને આત્મનિર્ભર બનાવવા અને જીવનભર તેમની સાથે ખડતલ બનીને ઊભા રહેવું તે છે.”

 

View this post on Instagram

 

A post shared by Growing with Artha (@arthasfirstbites)

યુઝર્સે આપી અદ્ભુત પ્રતિક્રિયાઓ આ વીડિયો સોશિયલ મીડિયા પર જોરદાર વાયરલ (Viral) થઈ રહ્યો છે અને તેના પર હજારો લોકો કમેન્ટ્સ (Comments) કરી રહ્યા છે. એક યુઝરે લખ્યું, “આ જ એક સાચા પિતાની ઓળખ છે.

મહાન વ્યક્તિને મારા સલામ.” બીજા યુઝરે લખ્યું, “તમે ખૂબ નસીબદાર છો કે તમને આવા પિતા મળ્યા.” જ્યારે અન્ય એક વ્યક્તિએ ભાવુક થઈને લખ્યું, “આ વીડિયોએ મારી આંખોમાં આંસુ લાવી દીધા. માતા-પિતા આપણા માટે કેટલા મોટા ત્યાગ કરે છે, તેનો અહેસાસ ઘણીવાર આપણને મોડો થાય છે.” આ વીડિયો ઇન્ટરનેટ પર લોકોના દિલ જીતી રહ્યો છે.