હોર્મુઝમાં હંગામો: ટ્રમ્પની ઈરાનને આખરી ચેતવણી, ‘જો નાકાબંધી તોડી તો જહાજોને ઉડાવી દઈશું’

અમેરિકન રાષ્ટ્ર પ્રમુખ (President) ડોનાલ્ડ ટ્રમ્પે ફરી એકવાર ઈરાન (Iran) ને આકરા શબ્દોમાં ધમકી આપી છે. ટ્રમ્પે સ્પષ્ટ ચેતવણી આપી છે કે જો હોર્મુઝ (Hormuz) માં અમેરિકન નેવી (US Navy) ની નાકાબંધી દરમિયાન કોઈ પણ ઈરાની જહાજ દખલગીરી કરશે, તો તેને તબાહ કરી દેવામાં આવશે. પાકિસ્તાનમાં ઈરાન સાથેની મંત્રણા નિષ્ફળ ગયા બાદ ટ્રમ્પ આક્રમક મૂડમાં છે. ‘ટ્રુથ સોશિયલ’ (Truth Social) પર પોસ્ટ કરતા તેમણે લખ્યું કે, ઈરાની નેવીને સંપૂર્ણપણે ખતમ કરી દેવામાં આવશે.

અમેરિકન નૌસેનાની નાકાબંધી: અમેરિકાએ ઈરાનના બંદરોની નાકાબંધી (Blockade) શરૂ કરવાની જાહેરાત કરી છે. ‘યુએસ સેન્ટ્રલ કમાન્ડ’ (CENTCOM) એ જણાવ્યું કે આ નિયમ તમામ દેશોના જહાજો પર લાગુ થશે જે ઈરાની સીમામાં પ્રવેશ કરશે. જોકે, બિન-ઈરાની બંદરો વચ્ચે મુસાફરી કરતા જહાજોને હોર્મુઝ સ્ટ્રેટ (Strait of Hormuz) માંથી પસાર થવાની મંજૂરી મળશે.

શું છે ‘ફાસ્ટ એટેક શિપ્સ’ (Fast Attack Ships)? ઈરાન પાસે નાની પણ અત્યંત ઝડપી અને હથિયારોથી સજ્જ નૌકાઓ છે, જેનું સંચાલન ‘રિવોલ્યુશનરી ગાર્ડ કોર્પ્સ નેવી’ (IRGC) દ્વારા કરવામાં આવે છે. ટ્રમ્પે આ જહાજોને દરિયાના તળિયે મોકલવાની વાત કરી છે. બીજી તરફ ઈરાને પણ વળતો પ્રહાર કરતા કહ્યું છે કે, ‘જો તમે લડશો, તો અમે પણ લડીશું.’ ઈરાનના ટોચના અધિકારીઓએ પણ જવાબી કાર્યવાહીની તૈયારી બતાવી છે.